Bumieranh dyktatury: sychod Muhabe aznačaje padzieńnie ŭsioj jaho siamji
Rašeńniem źjezda kirujučaj partyi Zimbabve Sajuz afrykanskaha naroda Zimbabve — Patryjatyčny front prezident krainy Robiert Muhabe źniaty z pasady jaje lidara. Razam z prezidentam z partyi vyklučyli i jaho žonku Hrejs. Muhabe pastavili ultymatum: abo jon padaść u adstaŭku sam, abo ŭ aŭtorak jamu budzie abvieščany impičmient.
Novym lidaram krainy faktyčna staŭ były vice-prezident krainy Emiersan Mnanhahva. Były, bo ŭsiaho paŭtara tydnia tamu Muhabe adpraviŭ jaho ŭ adstaŭku. Raniej Mnanhahva ŭznačalvaŭ śpiecsłužby Zimbabve, a paśla byŭ ministram abarony i zajmaŭ roznyja ministerskija pasady ŭ ekanamičnym błoku.
Mienavita adstaŭka Mnanhahva, na jakoj nastojvała žonka prezidenta, pryviała da palityčnych źmienaŭ u Zimbabve. Vajskoŭcy, jakija padtrymlivali Mnanhahvu, ŭviali ŭ stalicu krainy braniatechniku, zaniali telebačańnie, zabłakavali parłamient i budynak urada. Robierta Muhabe jany źmiaścili pad chatni aryšt, zapatrabavaŭšy viartańnia Mnanhahvy na pasadu vice-prezidenta. Paźniej pradstaŭniki vajskovaha kamandavańnia zapatrabavali adstaŭki Muhabe.
Sam prezident dobraachvotna pakidać svaju pasadu admoviŭsia, zajaviŭšy, što rašeńnie pavinna prymacca na partyjnym źjeździe. Tady siłaviki sabrali źjezd.
Muhabe kiravaŭ Zimbabve ad 1987 hoda, a pierad tym jon byŭ adnym ź lidaraŭ partyzan.
Źviartaje ŭvahu, jak skidańnie Muhabe adnačasova pastaviła kryž na karjery i ambicyjach usioj jaho siamji. Žonka Hrejs stała abjektam nianaviści, a častka svajakoŭ užo ŭciakła ŭ Paŭdniova-Afrykanskuju Respubliku.
Amal toje samaje niadaŭna adbyłosia va Uźbiekistanie: paśla śmierci Isłama Karymava jahonaja dačka nie tolki straciła pryvilei, ale i apynułasia ŭ turmie.
Muhabe trymaŭ uładu tak doŭha, bo nie vahajučysia ŭžyvaŭ siłu suprać svaich apanientaŭ.
Kampaniju cisku na Muhabe z metaj prymusić jaho da adstaŭki ŭznačalili vieterany siłavych struktur krainy. «Prezident sychodzić. Chaj žyvie novy prezident!» — uskliknuŭ kiraŭnik zimbabvijskaha Sajuza vieteranaŭ pierad hałasavańniem kiraŭničaj partyi, vynik jakoha byŭ pieradvyrašany.
Pieravarot byŭ praktyčna biaskroŭny.
Kamientary