«Biełuju Ruś» uznačaliŭ Hienadź Davydźka
Kiraŭnik Biełteleradyjokampanii Hienadź Davydźka abrany staršynioj «Biełaj Rusi».
Rašeńnie prymałasia za zakrytymi dźviaryma, kali ŭ zale zastałasia nievialikaja častka delehataŭ. Potym adbyłosia ahulnaje hałasavańnie.
«Karystajecca aŭtarytetam, paznavalny ŭ hramadstvie, ź lidarskimi jakaściami», — pachvalili jaho delehaty.
«Davydźka — nadziejny čałaviek, heta harantyja pośpiechu našaj arhanizacyi», — miarkuje vice-śpikier Savieta respubliki Maryjana Ščotkina.
«Pierafarmatavali rabotu infarmacyjna-prapahandysckich hrup, i Hienadź Branisłavavič vyjazdžaŭ tudy zaŭsiody. Jaho ŭ krainie viedajuć amal usie.
My ŭčora z prezidentam abmiarkoŭvali, jak budzie prachodzić źjezd, pra transfarmacyju ŭ partyju: śpiašacca nie treba, treba vyśpieć, kali ludzi zachočuć. Siońnia pakul niama takoha masavaha žadańnia», — tłumačyć kiraŭnica Administracyi prezidenta Natalla Kačanava.
U svaim vitalnym słovie Hienadź Davydźka paabiacaŭ pavialičyć uvahu da dziejnaści «Biełaj Rusi» ŭ efiry Biełteleradyjokampanii. «Zroblenaje i pamnožanaje na siłu miedyja robicca zroblenym u bolšym maštabie», — patłumačyŭ jon.
U kułuarach treciaha źjezda «Biełaj Rusi» Hienadź Davydźka adkazaŭ na niekalki pytańniaŭ «Našaj Nivy».
Tak, my nahadali jamu vyniki sacyjałahičnaha apytańnia IAC, pavodle jakoha ŭ rejtynhu samych lubimych kanałaŭ rasijski kanał TNT abahnaŭ «Biełaruś-1». Ci ličyć Davydźka heta prablemaj i jakija šlachi vyrašeńnia bačyć?
«Usio vielmi prosta: narod, prynamsi moładź, choča zabaŭlacca. Infarmacyi joj dastatkova i ŭ internecie, u tym liku i na vašym sajcie. A ŭ volny čas jana zabaŭlajecca, hledziačy toj ža TNT», — skazaŭ Davydźka.
Dyk a čamu Biełaruś nie stvoryć taki kanał? Kolki hrošaj na heta treba?
«Šmat, šmat hrošaj. Vielmi šmat. Kali kazać pra naš chołdynh, to my nie paciahniem — vy viedajecie, naprykład, kolki treba srodkaŭ, kab prosta zabiaśpiečyć pieradaču sihnału? Heta vializnyja sumy. Ale heta pa-pieršaje. Taki kanał — heta jašče sprava talentu i pamknieńniaŭ. Skažam, vakoł tych ža STS, TNT akumulavanyja vielmi vialikija moładzievyja siły, u tym liku — biełaruskija. Ale čamu jany tam? Čamu tyja ž ukraincy takoje mohuć rabić? Adkazvaju: u ich amal što nie isnuje praviłaŭ u śfiery tielebačańnia. Vy pryjedźcie va Ukrainie, pasprabujcie zrabić zabaŭlalnuju pieradaču. Kali jana cikavaja, to vy nie ŭbačycie, dzie treba raśpisacca, za jakija hrošy — vy ich u kanviercie atrymajecie. A ŭ nas ad idei prajekta da realizacyi časam hod prachodzić! Jon užo stareje! Hetak pracuje vializnaja mašyna. Vam viadomaje zakandaŭstva pra zakupki? Kali treba zrabić humarystyčnuju prahramu, nam treba abvieścić zakupku. Jana idzie, potym zryvajecca… potym znoŭ idzie… A hladač uvieś hety čas hladzić TNT, atrymlivajecca. A biudžetnyja srodki traciacca tolki na toje, što zaćvierdžana», — skazaŭ jon.
Taksama my pacikavilisia, jak asabista Hienadź Branisłavavič budzie adznačać 100-hodździe abviaščeńnia BNR.
«Tut jašče šmat pytańniaŭ, kankretna ŭ mianie: a chto byli tyja ludzi, što abviaščali BNR? Jak jany skončyli, z čaho pačynali? I jakija pamyłki rabili? Viadoma, što byli ramantyčnyja nastroi, chacieli niezaležnaści. A što z hetaha atrymałasia? A što bolš paŭpłyvała na los siońniašniaj našaj niezaležnaści? Mahčyma, što kali b nie było BNR, to nie było b BSSR, ale heta nie fakt.
My — Biełteleradyjokampanija — budziem aśviatlać hetuju datu: zrobim maksimalna ščyraje histaryčnaje daśledavańnie. Adno tolki mnie chočacca, kab hetaja data pracavała na kansalidacyju: my pavinny razam śviatkavać ci adznačać, ale nie musim šukać rečy, jakija nas raźjadnoŭvajuć», — padsumavaŭ jon.
Biełaruskim top-čynoŭnikam u Vałhahradzie razdali kałaradskija stužki. Marzaluk zastaŭsia ź jabłynievaj FOTY8
Kamientary