U Lidzie pastaviać pomnik Hiedyminu — stała viadoma, jak jon budzie vyhladać VYJAVY
Ustalujuć jaho na skryžavańni vulic Hrunvaldskaj i Zamkavaj, kala paŭnočnaj ściany Lidskaha zamka.
U Lidzie, kala ścien staražytnaha zamka, ustalujuć trochtonny bronzavy pomnik zasnavalniku horada - vialikamu kniaziu Hiedyminu. Adkryćcio pomnika płanujecca ŭ vieraśni i budzie pryśviečana 75-hodździu Hrodzienskaj vobłaści, paviedamlaje «Hrodzienskaja praŭda».
- Heta budzie statuja na vysokim pastamiencie, kniaź u vobrazie vieršnika na kani, i ŭstalujuć jaje na skryžavańni vulic Hrunvaldskaj i Zamkavaj, kala paŭnočnaj ściany Lidskaha zamka, —
raspaviadaje namieśnik staršyni Lidskaha rajvykankama Viktar Praniuk. — Prajekt realizujecca vyklučna za košt pazabiudžetnych, biazvypłatnych (sponsarskich) achviaravańniaŭ hramadzian i arhanizacyj, u tym liku zaroblenych na subotnikach.
Ideja ŭstalavańnia pomnika ŭźnikła niekalki hadoŭ tamu. 2 kastryčnika 2017 hoda rašeńniem Lidskaha rajonnaha vykanaŭčaha kamiteta byŭ abvieščany konkurs na stvareńnie pomnika «Zasnavalnik zamka - kniaź Hiedymin».
Prafiesijnaje žury z udziełam viadučych skulptaraŭ, architektaraŭ i historykaŭ, a taksama pradstaŭnikoŭ Ministerstva kultury i ŭładaŭ Lidy abrała pieramožcu: sumiesny prajekt staličnych skulptaraŭ Siarhieja Ahanava i Volhi Niačaj u supracoŭnictvie z architektaram Siarhiejem Bahłasavym.
— Na apošnim pasiadžeńni mastackaj rady aŭtary pradstavili rabočuju madel pomnika ŭ maštabie 1:4, jakaja była pryniataja adzinahałosna, - raspaviadaje Natalla Leŭšunova, načalnik adździeła kultury Lidskaha rajvykankama. - Ciapier jaje pieravoziać na Minski mastacki kambinat, dzie da krasavika vyrabiać pomnik u miakkim materyjale ŭ poŭnuju vieličyniu. I tolki potym, paśla zaćviardžeńnia mastackaj radaj, vyljuć z bronzy.
Pa słovach mastaka Siarhieja Ahanava, Jaki stvaryŭ Vojta na Ratušnaj płoščy ŭ Minsku i Nastaśsiu Słuckuju ŭ Słucku, pomnik Hiedyminu — abjekt mižnarodnaha maštabu. Vobraz vialikaha kniazia budzie maksimalna adpaviadać histaryčnaj praŭdzie.
Pastaviać trochtonnuju bronzavuju skulpturu na pastamient z hranitu Ładažskaha radovišča barvova-šeraha koleru. Ustalavać pomnik płanujuć u žniŭni, a adkryć - u vieraśni na śviacie horada.
— Heta danina pavahi da histaryčnaj asoby i dziaržaŭnaha dziejača, jaki zmoh abjadnać multykulturnaje i roznamoŭnaje Vialikaje Kniastva Litoŭskaje, - padkreślivaje Viktar Praniuk. - Jon źjaŭlaŭsia adnym z samych jaskravych prykładaŭ mudraha kiraŭnika-patryjota, simvalizuje spraviadlivaść i adzinstva.
Kamientary