Upieršyniu ŭ Minsku: siońnia adkryvajecca vystava, pryśviečanaja zasnavalniku «Našaj Nivy» Ivanu Łuckieviču
20 žniŭnia a 17.00 u Dziaržaŭnym litaraturnym muziei Janki Kupały adbudziecca adkryćcio vystavy «U narod i kraj svoj tolki vieru». Prajekt padrychtavany da 100-hodździa z dnia śmierci znanaha hramadskaha dziejača, palityka, archieołaha Ivana Łuckieviča, paviedamlaje pres-słužba muzieja.
Upieršyniu ŭ Biełarusi ŭ miežach asobnaj vystavy budzie adlustravany šlach Ivana Łuckieviča, jaki źjaŭlajecca prykładam samaachviarnaha słužeńnia svajoj Radzimie.
Starejšyja braty Łuckievičy adyhrali važnuju staronku ŭ žyćci Janki Kupały. Mienavita Ivan i Anton Łuckievičy zaprasili paeta na pracu ŭ redakcyju haziety «Naša Niva», tym samym dałučyli jaho da biełaruskaha ruchu. Małodšy brat Stefan uratavaŭ jahonaje žyćcio, akazaŭšy pieršuju miedycynskuju dapamohu, kali Piaśniar učyniŭ sprobu samahubstva ŭ listapadzie 1930 hoda padčas stalinskich represij.
Zbory znakamitych słuckich pajasoŭ, rycarskija daśpiechi i inšyja rarytety Ivana Łuckieviča dazvolili zasnavać znakamity «Biełaruski muzej», fondy jakoha paśla rasfarmiravańnia ŭ paślavajenny čas skłali asnovu mnohich muziejnych kalekcyj Biełarusi i Litvy. U hetym muziei acaleli rukapisnyja zborniki Janki Kupały «Paŭlinka», «Son na kurhanie», «Šlacham žyćcia», jany taksama buduć pradstaŭleny na ekspazicyi.
Na praciahu doŭhich hadoŭ Janka Kupała padtrymlivaŭ pryjaznyja kantakty z bratami Łuckievičami, pra što śviedčać listavańnie, padpisanyja fotazdymki, jakija buduć pradstaŭleny na vystavie. Sami ž Łuckievičy pieršymi vyznačyli paeta jak praroka Biełaruskaha Adradžeńnia.
U miežach vystavy buduć pradstaŭleny materyjały sa zboraŭ Dziaržaŭnaha litaraturnaha muzieja Janki Kupały, Biełaruskaha dziaržaŭnaha archiva-muzieja litaratury i mastactva, Hramadskaj arhanizacyi «Biełaruski muziej imia Ivana Łuckieviča» (Vilnia, Litva). Realizacyja prajekta stała mahčymaj dziakujučy Pasolstvu Litoŭskaj Respubliki ŭ Respublicy Biełaruś.
Taksama na vystavie ŭpieršyniu buduć demanstravacca asabistyja rečy Ivana Łuckieviča z pryvatnaha archiva siamji.
20 žniŭnia ŭ miežach adkryćcia vystavy adbudziecca aśviačeńnie pamiatnaha kamienia na kolišniaj siadzibie Łuckievičaŭ u parku Janki Kupały.
Viečar pamiaci Ivana Łuckieviča zavieršycca Śviatoj Imšoj u kaściole Śviatoha Rocha na Załatoj horcy a 18.30.
Vystavačny prajekt adrasavany naviedvalnikam roznych katehoryj. Dla arhanizavanych hrup pry papiarednim zapisie buduć praviedzieny tematyčnyja ekskursii. Naviedać vystavu možna da 11 vieraśnia 2019 hoda.
* * *
U prahramie śviatkavańnia jubileju ŭ Vilni:
16:00 Zbor kala bramy na mohiłkach Rosy (Rasų g. 32), uskładańnie kvietak na mahiłu bratoŭ Łuckievičaŭ, čytańni.
18:00 Śviataja Imša za Ivana Łuckieviča ŭ biełaruskim kaściole Sv. Bartałamieja na Zareččy (Užupio g. 17).
Kamientary