«Kali nichto nie budzie zmahacca, ludziej zrobiać rabami»: Błohiera z Oršy zarehistravali kandydatam u deputaty
Źmicier Kazłoŭ viadzie błoh «Sieryj kot», heta i jahonaje chobi, i praca. U Pałatu pradstaŭnikoŭ jon vyrašyŭ balatavacca, kab dahrukacca da ludziej, jakija nie hladziać palityčnych błohieraŭ u internecie. U pieramohu vieryć słaba, ale nia suprać arhanizavać tranślacyju z pasiedžańniaŭ parlamentu, piša «Radyjo Svaboda».
Źmitru 31 hod, žyvie ŭ Voršy, paśpieŭ papracavać na avijaramontnym zavodzie i lnokambinacie i ŭžo niekalki hadoŭ zajmajecca svaim błoham. Razam ź im u akruzie kandydatami ŭ deputaty zarehistravanyja 7 čałaviek. Svaboda raspytała Źmitra pra deputackija ambicyi i prablemy ludziej.
Pra vybarčuju kampaniju i ludziej
«Ja dumaŭ, što spačatku buduć pravakacyi ci falsyfikacyi, ale, na dziva, usio było spakojna. Dumaŭ, što buduć cisnuć na ludziej ź inicyjatyŭnaj hrupy. Ničoha takoha nie było. U mianie było ŭsio dobra z dakumentami, ja padavaŭsia pa partyjnych śpisach BNF. Śpiarša ja źbiraŭ podpisy, ale paśla pajšoŭ pa śpisach. Ja sabraŭ kala 350 podpisaŭ.
Ludziej, jakija byli na pikietach i jakich abychodziŭ, možna padzialić na niekalki katehoryj. Samaja vialikaja — heta ludzi, jakija ciabie prosta nie zaŭvažajuć. Siarod tych, chto ŭsio ž padychodziŭ, šmat ludziej nie razumiejuć, jakija paŭnamoctvy ŭ deputataŭ. Ludzi pytalisia pra haračuju vadu, pra dobraŭparadkavańnie dvaroŭ. Jość častka, jakija ličać, što treba zmahacca, što treba davać darohu maładym. Byŭ navat adzin prarasiejski manarchist, jaki skazaŭ, što ŭ nas car Uładzimir Uładzimiravič. Taki mužčyna z hieorhijeŭskaj stužkaj na rovary».
Pra dziejnaść u Pałacie pradstaŭnikoŭ
«Ja nie źjaŭlajusia siabram «Eŭrapiejskaj Biełarusi», ale ja idu ź imi pa adzinaj prahramie. Asnoŭnyja jaje tezisy: abarona suverenitetu, viartańnie svabodnych vybaraŭ, palapšeńnie dabrabytu ludziej i ekalohija, zakryćcio AES, źnižeńnie kolkaści dziaržaŭnych pradpryjemstvaŭ. Na žal, u našym lalečnym parlamencie deputat naŭrad ci surjozna zmoža na niešta ŭździejničać. Jość dośvied Hanny Kanapackaj i Aleny Anisim, ale ahułam deputataŭ 110. Navat pry vialikim žadańni jany nia mohuć zablakavać pryniaćcie dekretaŭ Łukašenki.
Ale kali ŭ parlamencie jość niechta adekvatny, chto moža danosić idei da eŭrapiejskich palitykaŭ, da ludziej, uździejańnie mahčymaje. Bo kali nia budzie kandydataŭ ad apazycyi, ničoha dobraha nia budzie. Nu budzie siadzieć čarhovy były načalnik RAUSa ci niejkaha pradpryjemstva i hałasavać «jak treba». A biudžetnyja srodki ž na heta traciacca».
Pra pracu i hrošy
«Błoh — heta majo chobi i praca adnačasova. Ja zarablaju na hetym dziakujučy danatam (achviaravańni padpisčykaŭ). Heta ja i deklaravaŭ pry rehistracyi kandydatam, i pytańniaŭ nia ŭźnikła. Paśla škoły ja pastupiŭ u Horackuju sielskahaspadarčuju akademiju, pravučyŭsia tam 4 hady, ale nia skončyŭ.
Uznaŭlacca tudy nie chaču, bo ciapier u mianie inšy zaniatak, hrošy na heta treba. Dyj vyklučać, kali pabačać na mitynhu. Z 2014 hodu ja aficyjna «darmajed». Ja pracavaŭ i na avijaramontnym zavodzie, 6 hadoŭ pracavaŭ na lnokambinacie».
Pra biełaruskuju palityku
«Kali nie zajmacca palityčnymi pytańniami, možna akazacca ŭ drennaj sytuacyi. Zaraz jość dekret ab «darmajedach», jość prablemy z adterminoŭkami ad vojska ŭ studentaŭ. Kali nichto nia budzie supraciŭlacca, buduć usio novyja i novyja padatki i pabory, dojdzie da rabstva prosta. Upieršyniu ŭ palityku ja trapiŭ, kali vyjšaŭ na «Marš darmajedaŭ» u Voršy ŭ 2017 hodzie. Paśla hetaha ja pačaŭ chadzić na mitynhi, vieści błoh z padziejaŭ».
Pra strym z parlamentu
«Kali b mnie takoje dazvolili, ja b pasprabavaŭ. Ja b paraiŭsia ź jurystami i padrychtavaŭ by zakonaprajekt, jaki b dazvoliŭ zrabić tranślacyju z usich pasiedžańniaŭ. Ale ja razumieju, što vybaraŭ u nas niama. Tamu my vykarystoŭvajem ahitacyju, kab možna było lehalna pracavać ź ludźmi. Bo adzinaja mahčymaść dahrukacca da ludziej, jakija nie hladziać u internecie palityčnyja kanały, heta sustreć ich na pikiecie ci pryjści da ich damoŭ. Ale dumaju, što mohuć puścić u parlament zusim lajalnych pradstaŭnikoŭ apazycyi».
Kamientary