Amierykanskaja kampanija Biogen spačatku pastaviła kryž na sprobie raspracavać leki absalutna novaha typu ad chvaroby Alchiejmiera, ale ŭrešcie pryjšła da natchnialnaha vyniku.
Novy srodak maje atrymać nazvu adukanamab (aducanumab). Kampanija zajaviła pra namier pačać praces jaho rehistracyi ŭ pačatku nastupnaha hoda. Na infarmacyi pra heta akcyi kampanii padaraželi na 27 %, piša Rojterz.
Ad chvaroby Alchiejmiera pakutuje ŭsio bolš ludziej, bo praciahłaść žyćcia raście, a hetaja chvaroba raźvivajecca ŭ ludziej u staraści. Pry Alchiejmieru čałaviek hublaje pamiać, a paśla i elemientarnyja žyćciovyja navyki. Časam chvoryja zastajucca ŭ takim biezdapamožnym stanie hadami.
Vynachodka lekaŭ ad Alchiejmiera moža dać miljardnyja prybytki. Amierykanskaja kampanija ŭ zvyšsakretnym režymie pracuje nad adukanamabam i inšym ekśpierymientalnym lekam, viadomym jak BAN2401,u partniorstvie ź japonskaj kampanijaj «Ejsaj» (Eisai).
Niekatoryja ekśpierty, adnak, staviać pad sumnieŭ efiektyŭnaść novaha srodku, bo vyniki jaho pieršych vyprabavańniaŭ byli supiarečlivyja.
Novyja leki hruntujucca na tak zvanaj «amiłoidnaj hipotezie» — teoryi, što, kali nie dapuścić kancentracyi adnaho z prateinaŭ, z nazapašvańniem jakoha źviazvajuć chvarobu Alchiejmiera, jaje možna praduchilić. Mnohija anałahičnyja leki, jakija raspracoŭvalisia raniej, efiektu nie dali.
Kamientary