Aficyjny pradstaŭnik MZS Rasiei Maryja Zacharava zajaviła, što Narviehija parušaje dahavor 1920 hoda, jaki vyznačaje mižnarodna-pravavy status archipiełaha Špicbierhien, pakolki Osła admaŭlajecca ad praviadzieńnia dvuchbakovych kansultacyj pa hetym pytańni, piša RBK.
«Nie varta zabyvać, što da 1920 hoda Špicbierhien byŭ pieradadzieny pad suvierenitet Narviehii na peŭnych umovach. U apošnija hady Osła faktyčna parušaje pałažeńni damovy, jakija kankretyzujuć abaviazacielstvy narviežskich uładaŭ u hetaj suviazi», — zajaviła Zacharava.
Pavodle jaje słoŭ, padobny padychod nieprymalny, a rasijski bok jaho nie prymaje.
«Nam niezrazumieła ŭpartaje niežadańnie narviežskich uładaŭ šukać kanstruktyŭnyja šlachi pieraadoleńnia hetaha niehatyvu», — dadała jana.
Archipiełah Špicbierhien znachodzicca ŭ Paŭnočnym Ledavitym akijanie i maje admysłovy pravavy status. Pahadnieńnie pa archipiełahu, padpisanaje 9 lutaha 1920 hoda, ustanaviła suvierenitet Narviehii nad Špicbierhienam, adnak inšyja ŭdzielniki dahavora mohuć vykarystoŭvać jaho pryrodnyja resursy i terytaryjalnyja vody.
Kamientary