Tryvožnyja naviny z sanatoryja «Praleska»: karanavirus vyjavili ŭ niekatorych adpačyvalnikaŭ. Usie jany pažyłyja
Tryvožnyja naviny prychodziać z sanatoryja «Praleska» ŭ Ždanovičach. Učora «Naša Niva» pisała pra śmierć supracoŭnika sanatoryja ad pnieŭmanii. Elektryk Valer Š. skanaŭ ŭ noč na 2 krasavika ŭ minskaj infiekcyjnaj balnicy, kudy nakiroŭvajuć ludziej sa stanoŭčym analizam na karanavirus.
Jak raskazali supracoŭniki «Praleski», paśla śmierci mužčyny ich paprasili padać śpis kantaktaŭ pieršaha ŭzroŭniu.
Pa infarmacyi «Našaj Nivy», za niekalki dzion da hetaha karanavirus vyjavili ŭ dźviuch žančyn z adnaho z zajezdaŭ. Niekatorych rabotnikaŭ sanatoryja jak kantaktnych asobaŭ zabirali «chutkija».
Čytajcie: «A my praciahvali prymać adpačyvajučych». U infiekcyjoncy pamior supracoŭnik sanatoryja «Praleska» ŭ Ždanovičach
Ciapier paviedamlajuć, što na karanavirus zachvareli i inšyja adpačyvalniki. Jak piša Tut.by, siarod ich — 70-hadovy mužčyna. Jamu stała drenna 20 sakavika. 26-ha z adnabakovaj pnieŭmanijaj mužčynu špitalizavali ŭ 3-ju balnicu, a praź niekalki dzion, kali test na karanavirus pakazaŭ stanoŭčy vynik, pieraviali ŭ «infiekcyjonku».
«Ciapier jon na štučnaj vientylacyi lohkich. Prahnozy niesuciašalnyja», — raskazała Tut.by jaho dačka.
Taksama ŭ infiekcyjnaj balnicy lažać dźvie žančyny z karanavirusam, jakija adpačyvali ŭ sanatoryi. Adna ź ich — u ciažkim stanie.
Nahadajem, što ŭ razmovie z «Našaj Nivaj» administracyja sanatoryja admoviłasia kamientavać vypadki karanavirusa ci ich adsutnaść.
«Nu što vy, nie viedajecie artykuł 46 [artykuł ab miedyčnaj tajamnicy zakona ab achovie zdaroŭja]? Nijakaj infarmacyi dać nie mahu. Karancinu ŭ nas niama. Zdraŭnica pracuje ŭ štatnym režymie», — adkazaŭ dyrektar «Praleski» Siarhiej Padkavyraŭ.
Kamientary