Były ŭładalnik «Novaj haziety Smarhoni» Ramuald Ułan — padazravany pa kryminalnaj spravie ab paklopie
Ramuald Ułan, były ŭładalnik i hałoŭny redaktar «Novaj haziety Smarhoni», — padazravany ŭ ramkach kryminalnaj spravy pa artykule 188 Kryminalnaha kodeksa (paklop). U jaho doma i ŭ ofisie prajšli pieratrusy, kanfiskavana arhtechnika, telefony, piša BAŽ.
26 vieraśnia byŭ zatrymany Ramuald Ułan, były ŭładalnik i hałoŭny redaktar «Novaj haziety Smarhoni» (NHS). Zaraz jon źjaŭlajecca indyvidualnym pradprymalnikam — akazvaje pasłuhi pa druku.
Doma i ŭ ofisie Ułana ŭ adzin čas adbylisia pieratrusy, była kanfiskavana arhtechnika —usiaho 13 pazicyj. Hetaja technika patrebna była pradprymalniku dla pracy, ciapier jaho biznes paralizavany.
Ramuald Ułan raspavioŭ, što zabrali navat novy knopkavy telefon, nabyty na dniach dla pažyłoha cieścia.
Pradprymalnik raspavioŭ, što supracoŭniki milicyi Smarhoni raspačali kryminalnuju spravu pa artykule 188 KK Respubliki Biełaruś za raspaŭsiud zaviedama iłžyvych, jakija hańbiać inšuju asobu źviestak (paklop). Pa horadzie byli rasklejenyja ŭlotki z danymi supracoŭnikaŭ milicyi, jakija, na dumku miascovych žycharoŭ, iłžeśviedčyli ŭ sudzie suprać udzielnikaŭ pratestnych akcyj.
«Ja nijakaha dačynieńnia da hetych ulotak nie maju. Kali ich ubačyŭ u horadzie, sfatahrafavaŭ i apublikavaŭ u haradskim pabliku Ukantakcie. U čaćvier ja apublikavaŭ hetyja fota, a siońnia pryjšli da mianie. Adčuvałasia, što supracoŭnikaŭ milicyi hetyja ŭlotki vielmi zakranuli», — kaža Ramuald Ułan.
Jon znachodzicca ŭ statusie padazravanaha, paśla pieratrusu i dopytu ŭ RAUS jaho adpuścili pad padpisku ab niavyjeździe.
«Novaja hazieta Smarhoni» była adzinym zarehistravanym niezaležnym vydańniem na terytoryi Smarhonskaha rajona. U 1996 hodzie vydańnie pačynałasia ź listka farmatu A4 z dvuch bakoŭ. U 2003 hodzie hazieta była zakryta, na toj čas u redakcyi pracavali 28 čałaviek.
-
Šlacham Cichanoŭskaha: redaktarka rajonki i łukašenkaŭski błohier tak zachapilisia prablemami Barysava, što pryjšli da kramolnych vysnovaŭ
-
Dzie ciapier Kirył Kazakoŭ — były kiraŭnik STB, «chrosny baćka» Azaronka i inšych prapahandystaŭ?
-
Biełaruskamoŭny dziciačy časopis «Matulina soniejka» prypyniŭ svoj vychad
Kamientary