Kryminalnaja sprava paeta-pčalara Mikoły Papieki: što viadoma na hety momant
Rankam 30 listapada z ułasnaj chaty ŭ vioscy Linava Pružanskaha rajona zabrali paeta i pčalara Mikołu Papieku. U čym jaho abvinavačvajuć?
Žonka Mikoły Śviatłana Papieka kaža, što heta adbyłosia prykładna a 6:45 ranku. «U jaho biassońnica, to jon siadzieŭ u pakoi, hladzieŭ televizar. Ja była ŭ spalni. Čuła, što mašyny padjazdžajuć, ale dumała, mo siabry jakija na rybałku pryjechali zabrać», — raskazvaje Śviatłana.
Mikoła navat nie skazaŭ žoncy, što jaho zatrymlivajuć, pajšoŭ ź milicyjanierami. «Ja navat nie viedaju, chto pa jaho pryjazdžaŭ. Prykładna ab 11-j hadzinie jon patelefanavaŭ mnie z mabilnaha našaha ŭčastkovaha, skazaŭ, što viazuć u Brest», — padzialilisia žonka.
Bresckija pravaabaroncy kažuć, što im udałosia daviedacca, što Papieka na hety momant znachodzicca ŭ izalatary časovaha ŭtrymańnia Leninskaha RUUS. Siabry miarkujuć, što zatrymańnie źviazanaje z kryminalnaj spravaj za «karahod» 13 vieraśnia.
Tady ŭ Breście na niadzielnuju prahułku sabrałasia šmat ludziej, ale kali siłaviki pieraharadzili im šlach, to ludzi zładzili karahod na skryžavańni bulvara Kasmanaŭtaŭ i praśpiekta Mašerava. Suprać ludziej navat užyvali vadamiot.
U vyniku była zaviedzienaja kryminalnaja sprava pa častcy 1 artykuła 342 «Arhanizacyja i padrychtoŭka dziejańniaŭ, jakija hruba parušajuć hramadski paradak, albo ŭdzieł u ich». Pa hetaj spravie ŭ izalatary bolš za 2 miesiacy praviała bresckaja nastaŭnica Maryna Hłazava, jakuju tolki niadaŭna pieraviali pad chatni aryšt. Ahułam u spravie niekalki dziasiatkaŭ fihurantaŭ.
Žonka kaža, što Mikoła časta pryjazdžaŭ u Brest, sprava ŭ tym, što tam žyvie adzin z synoŭ. «Pastajanna z ramontam dapamahaŭ, jon tam časta byvaŭ. Ci byŭ u toj dzień, ja ŭžo i nie pomniu».
Mikołu Papieku 58 hadoŭ, jon rodam ź Ivacevickaha rajona, ale pryžyŭsia ŭ Pružanskim. Spačatku pracavaŭ pčalarom u laśnictvie, a potym zasiarodziŭsia na ŭłasnaj haspadarcy. U Mikoły bolš za 60 vulloŭ.
Kali pakarańnie na «chimii» ŭ Pružanskim rajonie adbyvaŭ Pavieł Sieviaryniec, to Papieka ŭvieś čas dapamahaŭ jamu.
Taksama Papieka paet, aŭtar niekalkich vieršavanych zbornikaŭ. U 1999 hodzie navat atrymaŭ premiju «Hliniany Viales». Dy i sam jon źjaŭlajecca zasnavalnikam «Miadovaj premii» za paeziju, jaje łaŭreat atrymlivaje ŭ padarunak viadro miodu.
Ciapier čytajuć
Hałyhina prymusili apraŭdvacca za zvarot da siłavikoŭ u 2020-m2
Hałyhina prymusili apraŭdvacca za zvarot da siłavikoŭ u 2020-m
Historyja ŭ EHU — heta histfak vašaj mary. Jeŭrapiejski dypłom z navučańniem na biełaruskaj movie pry intensiŭnym vyvučeńni anhlijskaj. I poŭnaja svaboda11
Historyja ŭ EHU — heta histfak vašaj mary. Jeŭrapiejski dypłom z navučańniem na biełaruskaj movie pry intensiŭnym vyvučeńni anhlijskaj. I poŭnaja svaboda1
«Vajna ŭsio śpiša». Biełaruskim udzielnikam hiej-prajda ŭ Vilni pahražali raspravaj ad imia biełaruskich vajaroŭ za vykarystańnie bieła-čyrvona-biełaha ściaha219219
Kamientary