Heta — vynik šaścihadovaj supracy miž pryvatnymi asobami i niekamiercyjnymi arhanizacyjami, Bractwo Bartne ŭ Polščy i Braterstva bosych bortnikaŭ u Biełarusi, piša Zialony partał.
Čytajcie taksama: Biełaruskaje i polskaje bortnictva ŭnieśli ŭ Śpis niemateryjalnaj spadčyny JUNIESKA
Da XIX stahodździa bortnictva było najbolš raspaŭsiudžanym vidam pčalarstva va terytoryi byłoj Rečy Paspalitaj i Vialikaha Kniastva Litoŭskaha. Niahledziačy na raźvićcio technałohij pčalarstva, hetaja tradycyja dobra zachavałasia ŭ sielskich rajonach Paŭdniova-Uschodniaj Biełarusi i ŭ niekatorych nievialikich vioskach Padlašskaha rajona Polščy.
«Heta naša supolnaja spadčyna, toje, čym my možam dzialicca razam, što abjadnoŭvaje našy nacyi i dazvalaje nam skazać: «Hej, my hanarymsia hetym!» Ja viedaju, što biez nośbitaŭ ź Biełarusi ŭ nas nie było b dastatkova matyvacyi dla padtrymańnia i raźvićcia bortnictva ŭ Polščy», — havoryć Piotr Piłasievič, zasnavalnik Bractwo Bartne ŭ Polščy.
Abiedźvie arhanizacyi spadziajucca, što heta pryznańnie nie źjaŭlajecca finalnaj kropkaj — heta pačatak novaj dziejnaści, praciah starych tradycyj i zachavańnie kulturnaj tkaniny dla budučych pakaleńniaŭ. Heta ŭstojlivaje raźvićcio tvorčych praktyk, ramiostvaŭ, viedaŭ u hramadstvie i pieradača kultury bortnictva ŭ hramadstva i budučyniu.
«Samaje hałoŭnaje było atrymać zhodu supolnaści bortnikaŭ na ŭklučeńnie ŭ śpis i pačuć ad ich ułasnuju pazicyju: ci pavinna bortnictva stać niemateryjalnaj kulturnaj spadčynaj i nadalej zachoŭvacca. Padčas dźviuch ekśpiedycyj my apytali kala 50 siemjaŭ bortnikaŭ i ŭsie ŭ adzin hołas skazali: «Heta važnaja sprava! Bortnictva pavinna praciahvać isnavać!» — kaža Ivan Osipaŭ, zasnavalnik «Braterstva bosych bortnikaŭ» u Biełarusi. — Paśla takich ščyrych słoŭ našaj kamandzie śpiecyjalistaŭ stała zrazumieła, što treba iści dalej i pracavać nad tym, kab bortnictva stała niemateryjalnaj kulturnaj spadčynaj čałaviectva».
Kab dadać bortnictva u Nacyjanalny śpis Biełarusi, spatrebiłasia šmat pracy: pahutaryć z bortnikami, zapisać bolš za 20 hadzin videaintervju, zrabić bolš za 3000 fotazdymkaŭ i bolš za 20 hadzin aŭdyja.
Dla biełaruskaj supolnaści ŭklučeńnie źjavy ŭ śpis JUNIESKA vielmi važnaje, navat važniejšaje, čym dla ekśpiertaŭ — heta pieraasensavańnie praktyki, jaje novy važny status u hramadstvie, što vielmi važna dla supolnaści i navakolnaha asiarodździa na miascovym, nacyjanalnym uzroŭni i za miažoj.
U biełaruskaha i polskaha bortnictva šmat ahulnaha, pakazvajuć pracy prafiesara Kšyštafa Chiejkie, suaŭtara ŭniasieńnia źjavy ŭ Nacyjanalny śpis Polščy. Jon zafiksavaŭ i sfatahrafavaŭ bortnikaŭ pa ŭsioj Polščy, Biełarusi i Ukrainie, ubačyŭšy ahulnyja pryłady, movu, sposab razumieńnia pryrody i pčoł. Padobnyja tradycyi i praktyka, niahledziačy na toje, što supolnaści žyli izalavana adna ad adnoj.
Ciapier čytajuć
Małady biełarus nie chacieŭ siadzieć u Rasii za narkotyki, tamu prydumaŭ, jak chutka vyjści z kałonii — i vyjšaŭ na ŭkrainskija pazicyi pad Pakroŭskam44
Kamientary