Natalla Chierše, asudžanaja za sarvanuju bałakłavu, paŭtara miesiaca praviała ŭ ŠIZA
Palitźniavolenaja Natalla Chierše adbyvaje pakarańnie ŭ homielskaj kałonii №4. Ahułam užo paŭtara miesiaca jaje trymajuć u štrafnym izalatary.
U ŠIZA Chierše źmiaščali z 6 pa 23 maja, a taksama z 24 maja pa 3 červienia. Paśla čatyry dni žančyna praviała ŭ miedsančastcy, a z 8 červienia jaje znoŭ adpravili ŭ štrafny izalatar. Jana časova pazbaŭlenaja mahčymaści adpraŭlać listy i telefanavać.
Adzinaje, što brat Hienadź atrymaŭ za hety čas, — telehrama. Natalla pisała, što joj dali karotki balničny, skardziłasia na bol palcaŭ ruk i noh, tempieraturu 37,3.
Dakładnaj pryčyny, čamu siastru trymajuć u ŠIZA, Hienadź nie viedaje. U aficyjnym adkazie napisana, što «asudžanaja dapuskaje parušeńni vyznačanaha paradku adbyvańnia pakarańnia, za jakija pryciahvajecca da dyscyplinarnaj adkaznaści».
Brat miarkuje, što Natallu mahli pieravieści z pašyvu hramadzianskaha adzieńnia i miachoŭ na vytvorčaść formy dla siłavikoŭ, a jana źbirałasia admovicca heta rabić.
«Heta dla jaje pryncypova. Jana čakała ŭzmacnieńnia cisku i ŭ apošniaj našaj razmovie heta akcentavała», — kaža jon.
Raniej Chierše raspaviadała, što jaje časta nahružajuć zadańniami.
«Da adboju zastavałasia 30 chvilin, ja pavinna była pravieści pryborku vannaha pakoju — 8 umyvalnikaŭ, 7 unitazaŭ plus bide, pamyć padłohu i ścieny, vynieści śmiećcie. Praź piać chvilin pryjšli z pravierkaj i skazali, što jašče praź piać chvilin ja pavinna zakončyć. A drenna vykananaje dziažurstva ciahnie za saboj pakarańnie», — cytavaŭ list Hienadź. —
Nataša pisała, što adzin z supracoŭnikaŭ im tak i kazaŭ: kali na asudžanaha niama nivodnaha raparta, heta kaža pra drennuju pracu režymnaha supracoŭnika. U dadatak da ahulnych pravierak u jaje jašče dźvie dadatkovyja — u 10 i 20 hadzin.
Jana piša: «Prosta niemahčyma žyć u pamiaškańni, dzie šmat ludziej, i nikoli nie parušyć praviły ŭnutranaha rasparadku. Praviły ŭnutranaha rasparadku — sposab zaŭsiody mieć mahčymaść pakarać, kali heta budzie nieabchodna».
Ciapier čytajuć
«Mama płakała try dni, a tata nie razmaŭlaŭ hod». Kazaška vyjšła zamuž za biełarusa — i sutyknułasia z chejtam9
Kamientary