25-hadovy kurd pamior u toj samy dzień, kali dabraŭsia da Niamieččyny praź Biełaruś
Kali ŭ kurdski horad Sulejmani pryjšła navina pra śmierć Bachcijara Anvara, jaki dajechaŭ da Niamieččyny praź Biełaruś, ale ŭ toj ža dzień pamior, u horadzie pačalisia šmattysiačnyja pratesty moładzi. Pra rospač maładych kurdaŭ, pratesty i jašče adnu śmierć mihranta piša kurdski navinavy partał Rudaw.
Adzin z udzielnikaŭ pratestu, Musa Ali, raskazvaje, što ŭ aŭtorak daviedaŭsia pra śmierć svajho stryječnaha brata, Bachcijara, jaki za miesiac da hetaha źjechaŭ z Sulejmani ŭ Biełaruś.
Bachcijaru Anvaru ŭdałosia pierajści miažu, pieražyć načnyja marazy ŭ lesie i navat dabracca da Niamieččyny, raskazvaje Musa Ali. Ale paśla pieraachałodžvańnia ŭ puščy jaho arhanizm doŭha nie vytrymaŭ, i ŭ toj ža dzień, kali dabraŭsia da zapavietnaj Niamieččyny, jon pamior.
Heta była nie pieršaja sproba maładoha kurda prarvacca praź biełaruska-polskuju miažu — u vieraśni jaho departavali ŭ Irak, ale jon zapłaciŭ jašče vosiem tysiač dalaraŭ i ŭsio ž palacieŭ u Biełaruś jašče raz.
Bachcijar byŭ biežancam ad samaha pačatku svajho žyćcia — jon naradziŭsia ŭ 1996 hodzie u łahiery dla kurdskich uciekačoŭ u Iraku. Usio žyćcio byŭ vymušany pierajazdžać, to ŭciakajučy ad arabskich sunitaŭ, to viartajučysia ŭ Kurdystan. Paśla škoły jon nie znajšoŭ lepšaj pracy, jak pradavać šarbiet (padsałodžany fruktovy sok), ale pry hetym z zachapleńniem samastojna zajmaŭsia prahramavańniem.
Heta jon vioŭ adzin z repartažaŭ ź mitynhu mihrantaŭ u Minsku, bo mieŭ nadzvyčaj vialikuju aŭdytoryju ŭ Fejsbuku — 10 tysiač čałaviek.
«Darahi Bachcijar, kali łaska, padymisia znoŭ, — napisaŭ adzin ź jaho siabroŭ, Saravan Azim, u sacyjalnych sietkach. — Ty narešcie ździejśniiŭ svaju maru — uratavaŭsia z hetaj praklataj ziamli. Majo serca raźbitaje. Heta jak son, ale niama kamu mianie abudzić».
Pratesty moładzi ŭ Kurdystanie byli vyklikanyja nie śmierciu mihranta, a palitykaj urada Kurdystana, ale mihrancki kryzis sam pa sabie — nastupstva hetaj palityki.
Palityčnaja cenzura, biespracoŭje, palityka žorstkaj ekanomii i šturchajuć ludziej na masavyja ŭcioki ŭ Jeŭropu lubym koštam.
Čatyry dni zapar, ź niadzieli da sierady, u kurdskich haradach Erbili, Sulejmani dy inšych prachodzili šmattysiačnyja pratesty. Pratestoŭcy patrabavali reformaŭ u Kurdystanie, kab ludzi nie ŭciakali i nie hinuli. Siłaviki stralali pa pratestoŭcach humovymi kulami, vykarystoŭvali ślezaciečny haz, i navat užyvali bajavyja kuli. Adzin student byŭ paranieny.
«Studenty vyjšli na demanstracyju, kab damahčysia viartańnia stypiendyj, svaich zakonnych pravoŭ, ale ŭłady vykarystali suprać ich niepraparcynuju siłu i hvałt», — raskazaŭ Al-Džaziry Mustafa Chalid, žychar Sulejmani.
«I kali kahości cikaviła pryčyna, čamu mihranty pajechali na miažu Biełarusi — dyk voś vam pryčyna», — dadaŭ jon.
«Niekatoryja havaryli, što pradali ŭsio i hetyja hrošy ŭ ich tut adabrali». Nastaŭnica anhlijskaj movy ź Lidy raskazała, što ŭbačyła ŭ «Bruzhach»
«My ciapier zachraśli tut na ŭsio žyćcio». Kurdy, jakija viarnulisia ź Biełarusi tydzień tamu, trapili ŭ jašče bolšuju niavykrutku
Ciapier čytajuć
26‑hadovaha supracoŭnika elitnaha padraździaleńnia mytni asudzili na 16 hadoŭ pa nabory palitartykułaŭ. Siarod ich i «zdrada dziaržavie»6
Kamientary