Juryst: Sprava Ryanair nie maje terminu daŭniny, a ŭsich jaje fihurantaŭ zaraz čakajuć «vielmi niaprostyja časy»
Advakat češskaj kalehii advakataŭ, śpiecyjalist u halinie mižnarodnaha pravavoha supracoŭnictva Aleś Michalevič u kamientary Radyjo Svaboda raskazaŭ pra mahčymyja nastupstvy i dalejšaje raźvićcio historyi z abvinavačańniami biełaruskim čynoŭnikam, vystaŭlenyja amierykanskimi ŭładami paśla incydenta z samalotam Ryanair u Minsku. Pa słovach jurysta, sprava nie maje terminu daŭniny, a ŭsich jaje fihurantaŭ zaraz čakajuć «vielmi niaprostyja časy».
«Heta zusim nie farmalnaść, hetyja abvinavačańni vielmi i vielmi surjoznyja, — kaža Aleś Michalevič. — Adbyłosia vialikaje śledstva. Jašče padčas hetych padziej, kali samalot byŭ pasadžany, ja ŭžo tady źviartaŭ uvahu na toje, što samalot pasadzili z dapamohaj falšyvych abvinavačańniaŭ nakont bomby na borcie. Heta asnoŭnaje. Biełaruskija ŭłady vykarystali falšyvaje paviedamleńnie ab bombie, i heta vielmi surjozna. Dla tych ludziej, jakija pieraličvajucca ŭ abvinavaŭčych dakumientach, nadychodziać nialohkija časy».
Pa słovach jurysta, kali b biełaruskija ŭłady aficyjna zajavili, što patrabujuć pasadki samalota, bo tam znachodziacca złačyncy, heta nie mieła b takich surjoznych nastupstvaŭ. Historyja mahła b skončycca skandałam, ale nie pryviała b da kryminalnaha rasśledavańnia spravy ab teraryźmie.
Jašče adnym faktaram pavyšanaj cikavaści z boku ŭładaŭ ZŠA da incydentu stała toje, što na borcie samalota znachodzilisia čaćviora amierykanskich hramadzian. Kali b ich tam nie było, nastupstvaŭ dla biełaruskich čynoŭnikaŭ taksama mahło b być mienš.
Pa słovach Alesia Michaleviča, pradjaŭleńnie abvinavačańniaŭ čatyrom biełarusam z boku amierykanskich uładaŭ — tolki pačatak historyi.
«Dalej situacyja moža raźvivacca pa-roznamu. Hetym ludziam moža być vystaŭleny zavočny aryšt. Heta značyć, moža być pryniata rašeńnie, što ich treba aryštoŭvać. Dla hetaha mohuć zadziejničać usie dasiažnyja kanały, u tym liku Interpoł.
Paŭsiul, za vyklučeńniem terytoryi Biełarusi i Rasii, nazvanych čynoŭnikaŭ čakajuć surjoznyja nastupstvy. Zatrymańnie, ekstradycyja ŭ ZŠA, śpisy padazravanych i abvinavačanych u teraryźmie — usio voś heta. Ich mohuć zatrymać faktyčna ŭ kožnaj krainie».
Pa słovach Michaleviča, zhadanym u abvinavaŭčych dakumientach hramadzianam Biełarusi nasamreč moža pahražać pakarańnie ŭ vyhladzie jak minimum 20 hadoŭ pazbaŭleńnia voli, albo navat pažyćciovaje źniavoleńnie. Pry hetym pavodle amierykanskaha zakanadaŭstva takija złačynstvy nie majuć terminu daŭniny.
«U suśvietnaj praktycy heta davoli raspaŭsiudžanyja rečy, — kaža Michalevič. — Takija złačynstvy, jak teraryzm, navat zusim nie abaviazkova pryviazvać da svajoj terytoryi.
Amierykancy, naprykład, majuć prava rasśledavać usie ekanamičnyja złačynstvy, jakija byli ździejśnienyja ŭ dalarach ZŠA. A heta ŭ pryncypie bolšaść finansavych złačynstvaŭ u śviecie. Tak i tut, uładam ZŠA navat nie treba było abaviazkova zhadvać, što na borcie samalota znachodzilisia hramadzianie ZŠA».
Pa słovach Michaleviča, toje, što ŭ rasśledavańni FBR nie zhadanyja kankretnyja imiony supracoŭnikaŭ KDB Biełarusi, zusim nie značyć, što śledčym jany nie viadomyja. Imiony abvinavačanych mohuć nie nazyvać u intaresach dalejšaha rasśledavańnia.
«Niepryhoža, nieprystojna, niekarektna». U «Biełaeranavihacyi» prakamientavali abvinavačvańnie ŭ avijapiractvie
«Insceniravali pahrozu vybuchu, kab aryštavać žurnalista-dysidenta». ZŠA raskazali novyja padrabiaznaści incydentu z Ryanair
U ZŠA čatyroch biełaruskich aficyjnych asob abvinavacili ŭ avijapiractvie
Ciapier čytajuć
Akademiju KDB budujuć prosta na Załatahorskich mohiłkach. Ź ziamli dastajuć pareštki minčukoŭ, jakich tut chavali sotni hadoŭ25
Kamientary