Narviežski sud admoviŭsia vypuścić Brejvika, vinavataha ŭ zabojstvie 77 čałaviek
Sud narviežskaj akruhi Telemark admoviŭ u daterminovym vyzvaleńni nieanacystu Andersu Brejviku, jaki zabiŭ u 2011 hodzie 77 čałaviek, dziela, jak jon śćviardžaŭ, «abarony biełaj rasy» ad multykulturalizmu i mihracyi. U pastanovie suda havorycca, što Brejvik nie demanstruje prykmiet vypraŭleńnia, piša Bi-bi-si.
Na pieršym vyjaznym pasiadžeńni Sudovaj kamisii pa jaho vyzvaleńni 18 studzienia Brejvik, jak i padčas usich minułych pasiadžeńniaŭ, uskinuŭ ruku ŭ nacysckim pryvitańni.
Na sudzie Brejvik ŭskłaŭ vinu za ździejśnienaje im masavaje zabojstva na prapahandystaŭ radykalizmu.
«U tym, što mnie pramyli mazhi, niama majoj viny. Tyja, chto pramyvaje mazhi ludziam, radykalizujučy ich u internecie, praktyčna całkam vinavatyja ŭ tym, što zdaryłasia 22 lipienia [2011]»,
— skazaŭ jon.
«Ja daju vam słova honaru, što ŭsio heta (vierahodna, Brejvik maje na ŭvazie hvałtoŭnyja dziejańni - Bi-bi-si) ja pakinuŭ zzadu. Ale heta nie značyć, što ja nie budu zmahacca za nacyjanał-sacyjalistyčny zachop Narviehii i Zachadu»,
— cytuje słovy Brejvika ahienctva Reuter.
Sud, adnak, paličyŭ, što vyzvalać Brejvika niebiaśpiečna. «Bo jahony psichałahičny stan nie źmianiŭsia, isnuje vidavočnaja ryzyka taho, što jon praciahnie liniju pavodzin, jakaja pryviała da napadu 22 lipienia», — havorycca ŭ zajavie suda akruhi Tielemark.
Anders Brejvik 22 lipienia 2011 hoda zładziŭ vybuch u centry Osła, u vyniku čaho zahinuli vosiem čałaviek. Zatym jon nakiravaŭsia na vostraŭ Utoja, dzie byŭ raźmieščany moładzievy łahier, i adkryŭ tam stralaninu. Jahonymi achviarami na vostravie stali 69 čałaviek, u asnoŭnym padletki. Zabojstva 77 čałaviek stała samym kryvavym złačynstvam u Narviehii z časoŭ Druhoj suśvietnaj vajny.
Paźniej Brejvik kazaŭ, što maryŭ ździejśnić terakt pa prykładzie «Al-Kaidy»: zachapić i abiezhałović pierad videakamieraj byłuju premjerku Narviehii Hru Charlem Bruntłand, pierad hetym prymusiŭšy jaje ŭstać na kaleni i malić ab litaści.
U 2012 hodzie Brejvika prysudzili da 21 hoda źniavoleńnia. Ale, u adpaviednaści z narviežskim zakanadaŭstvam, termin Brejvika budzie padoŭžany paśla jaho zakančeńni, kali sud paličyć jaho pa-raniejšamu niebiaśpiečnym dla hramadstva. Ciapier ža, paśla taho, jak jamu ŭ pieršy raz admovili ŭ vyzvaleńni, jon maje prava padavać anałahičnyja chadajnictvy kožny hod.
Novy sud nad Brejvikam znoŭ prykavaŭ da jahonaj postaci ŭvahu publiki. Heta aburaje svajakoŭ zabitych Brejvikam na vostravie Utoja aktyvistaŭ levych arhanizacyj.
Ciapier čytajuć
Čamadanava raskazała, što kateharyčna nielha abmiarkoŭvać na kuchniach16
Čamadanava raskazała, što kateharyčna nielha abmiarkoŭvać na kuchniach
«Ludzi, budźcie pilnyja! U takoj situacyi moža apynucca kožny žychar ES!» Hramadzianin Litvy, asudžany ŭ Biełarusi da 13 hadoŭ za «špijanaž», pieradaŭ list z kałonii3939
Kamientary