U Biełarusi navučańnie arhanizataraŭ elektaralnych kampanij buduć pravodzić na pastajannaj asnovie. Pra heta zajaviŭ na sustrečy z členami terytaryjalnych i ŭčastkovych kamisij Bresckaj vobłaści staršynia Centravybarkama Ihar Karpienka, pieradaje BIEŁTA. Raniej kamisii farmavalisia pierad vybarami, i ich členy choć častkova mianialisia.
Ihar Karpienka zajaviŭ, treba adychodzić ad staroj praktyki, kali navučańnie členaŭ kamisij pačynajuć paśla abviaščeńnia daty vybaraŭ. Ciapier, pa jaho słovach, patrebnaja surjoznaja praca pa karektavańni Vybarčaha kodeksa, adpracoŭcy miechanizmu praviadzieńnia adzinaha dnia hałasavańnia.
«Užo 1 vieraśnia płanujem zapuścić sistemu pastajannaj vučoby patencyjnych udzielnikaŭ elektaralnych kampanij praz Akademiju kiravańnia pry prezidencie. My ŭžo zapytali ŭ rehijonach danyja pa patrebach u takim pavyšeńni kvalifikacyi. Heta budzie prykładna 36-hadzinnaja prahrama, raźličanaja na try-čatyry dni znachodžańnia ŭ Minsku. My pastaralisia zakłaści ŭ prahramu nie tolki zakanadaŭčyja i technałahičnyja aśpiekty arhanizacyi elektaralnych kampanij, ale i psichałahičnyja, palityčnyja, asobasnyja momanty», — adznačyŭ staršynia CVK.
U demakratyčnych krainach členaŭ kamisij «psichałahičnym i palityčnym momantam» nie vučać. Zadača členaŭ kamisij — vydać biuleteni i padličyć. Ale ŭ Biełarusi kamisii składajucca vyklučna z łajalnych Alaksandru Łukašenku ludziej.
Płanujecca, što da kanca hoda takija kursy projduć prykładna 600 čałaviek, u nastupnym hodzie — da 1200. Pa słovach Ihara Karpienki, heta stanie pastajannaj praktykaj, kab nie adciahvać uvahu na navučańnie ŭ pieryjad elektaralnaj kampanii. Kaho pasyłać na kursy, buduć vyznačać na miescach, ale ŭ pieršuju čarhu heta pavinny być «maładyja ci novyja členy vybarčych kamisij, u jakich niedastatkova vopytu takoj pracy».
Paralelna pa damoŭlenaści ź Biełaruskim tavarystvam «Viedy» budzie pravodzicca «aśvietnickaja rabota pa farmavańni pravavoj kultury vybarščykaŭ». Tavarystva «Viedy» ŭ łukašenkaŭskaj sistemie — heta adzin z elemientaŭ indaktrynacyi, jaho ŭznačalvaje prapahandyst i ruski nacyjanalist Vadzim Hihin.
Ciapier čytajuć
«Biełaruś ciabie lubić». Repartaž z raźvitańnia ź Mikitam Miełkazioravym6
Kamientary