Ludzi pasprabavali zapisacca ŭ «bryhadu Kaściuški». I voś što atrymałasia
Dniami ŭ siecivie pra svajo farmavańnie abvieściła «dobraachvotnickaja bryhada Kaściuški». Siarod bajcoŭ, što ciapier vajujuć va Ukrainie, pra jaje nichto nie čuŭ. Apublikavanaje videa taksama pakinuła šmat pytańniaŭ i było padobnym da pravakacyi. Niekalki čytačoŭ «Našaj Nivy» pasprabavali zapisacca ŭ bryhadu — i atrymali vielmi dziŭnyja zadańni.
Sproba №1
Tym, chto choča dałučycca, bryhada vysyłaje karotkuju ankietu. Prosić paviedamić uzrost, ci słužyŭ u vojsku, ci maješ bajavy vopyt i pa jakoj śpiecyjalnaści pracuješ.
Naš čytač vyrašyŭ pradstavicca 24-hadovym mularom. Słužyć słužyŭ, ale nie vajavaŭ.
Dalej prosiać nazvać svaju łakacyju. Čytač nazvaŭsia minčukom. Cikava, što bot składzieny na biełaruskaj movie, ale astatniaja kamunikacyja — pa-rusku.
«Dla paćviardžeńnia realnaści danych nieabchodna zrabić zapis: «1794». Na fasadzie doma ci inšaj pabudovy na adnoj z centralnych vulic, paśla dasłać nam łakacyju miesca i fatahrafiju zroblenaha zapisu», — kaža zadańnie.
Bryhada patłumačyła: zapis paćviardžaje miescaznachodžańnie čałavieka ŭ peŭnaj miascovaści, heta robicca dla ahulnaj biaśpieki.
Čytač «NN» fota dasłaŭ — nibyta jano zroblenaje ŭ słužbovym tualecie ŭ «Karonie» kala mietro «Maładziožnaja». «Bajcam» pa toj bok bota vykanańnie nie vielmi spadabałasia.
«Miesca musić być ahulnadastupnaje, kab naš čałaviek moh pravieryć najaŭnaść nadpisu, nie pryciahvajučy ŭvahi. Dzie harantyja, što ty — heta nie HUBAZ?» — napisali z bryhady.
Ci pajšli jany vieryfikavać navabranca, nieviadoma, ale bolš nie adkazvali. Moža, paśla vychadnych adhuknucca.
Sproba №2
Druhi naš čytač pa lehiendzie — 37-hadovy kiroŭca-mižnarodnik z Hrodna, jaki nie byŭ u armii. Bonusam da jaho idzie pikap Toyota.
Čytač spytaŭ, adkul treba budzie vyjazdžać va Ukrainu.
«Jość varyjant praz Polšču i RB», — adkazali z bryhady.
Ale ž miaža z Ukrainaj zakrytaja.
«Usie instrukcyi atrymajecie paśla vieryfikacyi», — zapeŭnili ŭ bocie.
Zadańnie chłopcu dasłali toje ž — zrabić nadpis na centralnaj vulicy horada. Na prośbu dać mahčymaść paćvierdzić svaju asobu inšym, mienš niebiaśpiečnym sposabam, admovili.
«Vieryfikacyi tolki takim čynam, dalej atrymlivajecie astatnija instrukcyi. Schiema adpracavanaja i najbolš aptymalnaja», — patłumačyła bryhada.
Što admietna — u abodvuch vypadkach kamunikacyja spyniałasia roŭna paśla 18:00 viečara. Vidać, u adkaznych za nabor navabrancaŭ zakančvaŭsia pracoŭny dzień.
Zadańnie zrabić nadpis u publičnym miescy vyhladaje padazrona jak minimum tamu, što čałavieka paśla možna vyličyć pa kamierach.
Nahadajem, što surazmoŭcy «Našaj Nivy» vykazvali zdahadku, što pad vyhladam niaisnaj hrupy biełaruskija śpiecsłužby sprabujuć zamanić u pastku ludziej, hatovych vajavać za svabodu i niezaležnaść Ukrainy. Kali jany napišuć u bot, ich vyličać i aryštujuć.
Ciapier čytajuć
Za «ekstremisckija» padpiski pry praviercy na miažy bolš nie sadžajuć na sutki11
Za «ekstremisckija» padpiski pry praviercy na miažy bolš nie sadžajuć na sutki
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam2929
Kamientary