«U mianie mocnaja matyvacyja». U žniŭni 2020-ha łukašysty bili jaho piać hadzin, da reanimacyi. Historyja dobraachvotnika z pazyŭnym «Aŭhust» z bataljona Kalinoŭskaha
Usio pačałosia sa studenckaj supołki, a potym byli barykady ŭ Minsku, źbićcio, reanimacyja… Historyju dobraachvotnika bataljona imia Kastusia Kalinoŭskaha z pazyŭnym «Aŭhust» raskazvaje jutub-kanał Siarhieja Biaspałava.
Sapraŭdnaje imia hieroja nie nazyvajecca. Jaho pazyŭny — «Aŭhust». Čamu?
«Heta prosta łacinskaje imia, zvyšsakralnaha sensu tut niama», — raspaviadaje «kalinoviec». Ź dziacinstva ŭ kampjutarnych hulniach, u internecie jon padpisvaŭsia jak Aŭhust. I tak supała, što biełaruski narodny ŭzdym adbyŭsia mienavita ŭ žniŭni.
«Ja vyrašyŭ, što heta simvalična», — havoryć Aŭhust.
U Biełarusi jon byŭ hramadskim aktyvistam, pracavaŭ z moładziu, z 2012 hoda zajmaŭsia pravami studentaŭ, prablemami moładzi. U 2020 hodzie ŭdielničaŭ u pratestach. Byŭ siarod tych, chto budavaŭ barykady na Ryzie. Barykady tam byli simvaličnyja: niekalki śmiećcievych bakaŭ, para vazonaŭ, važnaje było śviedčańnie, što narod pratestuje suprać falsifikacyj i ŭzurpacyi ŭłady.
Aryštoŭvali dvojčy. Pieršy raz — jašče ŭ lipieni za rovarnyja zajezdy, jakija byli ŭ Minsku. A paśla — 11 žniŭnia. Jaho pryvieźli na Akreścina, ale tam chłopiec nie siadziaŭ. Tam jaho tolki bili.
«Mianie piać hadzin bili, było raśsiačeńnie hałavy, traŭmavańnie 65% cieła», — raspaviadaje Aŭhust. Adtul jaho advieźli ŭ reanimacyju. U balnicy zašyli, pakłali pad kropielnicu, kali jon pračnuŭsia, ustaŭ i prosta ŭ chirurhičnym spodnim źbieh z balnicy. Razumieŭ, što inakš jaho paśla mohuć zabrać u turmu.
Kali pačali masava zatrymlivać studenctva, vyrašyŭ vyjechać. Amal dva hady žyŭ u Lvovie.
Kali jašče da vajny ź siabrami abmiarkoŭvaŭ mahčymaść rasijskaj ahresii, hieroj pryniaŭ dla siabie rašeńnie, što dałučycca da ŭkrainskaha vojska.
Na treci dzień vajny ad znajomaha daviedaŭsia, što ŭ Kijevie stvarajecca biełaruski atrad — «tam było kala dziesiaci čałaviek na toj momant». Na čaćviorty dzień vajny jon byŭ užo ŭ biełaruskim atradzie, jaki paśla pieratvaryŭsia ŭ bataljon.
Aŭhust kaža, što była mahčymaść źjechać, praca heta dazvalała, ale jon pryniaŭ rašeńnie vajavać — «sa zbrojaj u rukach zmahacca suprać dyktataraŭ — Pucina, Łukašenki». Bo ŭ jaho «mocnaja matyvacyja — vyzvalić nie tolki Ukrainu, ale i Biełaruś». «Ja dumaju, šmat u kaho ŭ bataljonie takija ž dumki», — kaža chłopiec.
«Ja zaŭsiody vystupaŭ za ŭzbrojeny supraciŭ dyktataram. Kali b była takaja mahčymaść, ja b i ŭ Biełarusi zbroju ŭziaŭ, ale ŭ Biełarusi takoj mahčymaści nie było», — raspaviadaje Aŭhust.
Ciapier jon źjaŭlajecca kamandziram uzvoda, razam z astatnimi prachodzić padrychtoŭku, robić «šmat roznaj drobnaj i vialikaj pracy».
Aŭhust miarkuje, što budzie vajavać, pakul nie budzie vyzvalena Ukraina. «Ja dumaju, što vajna jašče praciahniecca paŭhoda, moža bolš. Tak što paŭhoda ja budu jašče tut, a dalej budu hladzieć pa abstavinach», — raspaviadaje jon.
Jon ličyć, što miesta biełarusaŭ, jakija chočuć bačyć Biełaruś volnaj, mienavita na hetaj vajnie.
«Ja b zaklikaŭ padrychtavanych, fizična raźvitych chłopcaŭ jechać da nas. Mnie padajecca, toje, što siońnia adbyvajecca, ‒ heta histaryčnaja padziei, i ad taho, nakolki biełarusy dałučacca da hetych padziej, nakolki nas budzie šmat, nakolki my budziem padrychtavanymi, sapraŭdy zaležyć los Biełarusi. I kali jość ludzi, jakija chočuć vyzvalić Biełaruś, to jany pavinny być tut.
Ja razumieju, što heta ciažka, tamu što jość praca, dzieci, siamja, inšyja płany, ale tak byvaje ŭ historyi, što treba rabić vybar i na niejki čas prymać takija składanyja rašeńni», — kaža jon.
«Chłopcy, kali jość rozum, niejkija dumki ŭ hałavie, to treba rabić toje, što pravilna, a nie toje, što vam kažuć, nie vykonvać hetyja zahady. Samy lepšy varyjant — pierachodzić miažu i dałučacca da bataljona. Horšy varyjant — prosta sabatavać hetyja zahady. Budziem ščyrymi, užo ŭsie razumiejuć — siońniašniaja ŭłada nie lehitymna. Heta dyktatura, i ŭsie, chto jaje abaraniaje, budzie takim ža złačyncam, jak byli złačyncami vykanaŭcy ŭ fašysckaj Hiermanii. Tamu rabicie vybar», — havoryć Aŭhust.
Na pytańnie pra pieramohu jon adkazvaje: «Ukraina dakładna pieramoža. Ja z druhoha-treciaha dnia ŭžo heta zrazumieŭ i nie sumniavaŭsia. Zaŭsiody staić tolki adno pytańnie — jakim koštam budzie heta pieramoha. A druhoje pytańnie — što budzie ź Biełaruśsiu. Ale heta my daviedajemsia ŭžo paśla pieramohi».
Svajakam, siabram, usim, chto ŭ Biełarusi, jon pieradaje: «Čakajcie, my chutka pryjdziem».
Paranieny na pratestach-2020, nosić z saboj hranatu na vypadak akružeńnia: chto taki dobraachvotnik «Janki» ŭ vobrazie vusataha husara
Jak zahinuŭ dobraachvotnik Źmicier Apanasovič? Raskazvajuć jaho paplečniki
«Va Ukrainie vyrašajecca los usiaho rehijona». Navošta biełarus pajechaŭ na vajnu
«Ja byŭ suprać, kab mianie mianiali na 20 rasijskich vajskoŭcaŭ. Nie zmoh by hladzieć u vočy ludziam, syny jakich siadziać»: pieršaje intervju eks-mera Chiersona
Kamientary