«Biełaruskimi tam mohuć być tolki humovyja nožki i nalepka «N». Što za noŭtbuk moh vypuścić «Haryzont»
Na vystup 1 vieraśnia pierad školnikami ŭ Pałacy Niezaležnaści Alaksandr Łukašenka prynios «unikalnuju biełaruskuju raspracoŭku» — noŭtbuk. Jon pryznaŭsia, što pakul biełaruskaha ŭ im kala 12%, ale ŭžo da kanca hoda budzie 30%. Što heta moža być za raspracoŭka?
Na sajcie «Haryzonta» nijakich kampjutaraŭ u prodažy niama — tolki televizary, mikrachvalovyja piečy, vodanahravalniki i hazavyja plity.
Nakolki viadoma «Našaj Nivie», apošnim časam na zavodzie techniku dla bytu nie raspracoŭvali — jany pieraklučylisia na vajskovyja raspracoŭki.
Jaki kampjutar vydali za haryzontaŭski, pa fota skazać składana. Jość padabienstva, naprykład, z madelami Lenovo.
«Sučasnyja noŭtbuki, jak i telefony źniešnie vielmi padobnyja adzin da adnaho. My bačym standartnyja ramki ekrana, dva USB i vychad pad navušniki ź levaha boku. Što tam sprava — nieviadoma, bo jaho nie pakazali ź inšaha rakursu. Korpus vielmi tonki, usio vyhladaje nibyta heta niejki kitajski ŭzor, na jaki načapili svoj łahatyp», — zaŭvažaje śpiecyjalist u halinie kampjutarnaj techniki (jon nie źviazany z zavodam).
Ekśpiert kaža, što ź ciažkaściu moža sabie ŭjavić, što składajuć hetyja 12% biełaruskaha.
«Mahčyma heta niejkija detali nakštałt humovych nožak, na jakich staić noŭtbuk, tearetyčna možna zrabić ułasny korpus. Ale što tyčycca ŭnutranaściaŭ, to ničoha biełaruskaha tam dakładna być nie moža. Tamu vielmi ciažka ŭjavić, jakim čynam jany źbirajucca ŭžo da kanca hoda łakalizavać jaho na 30%. Tym bolš, kab heta byŭ samy sučasny kampjutar na ŭzroŭni suśvietnych technałohij, pra jaki kaža Łukašenka».
Na dumku śpiecyjalista, pavialičyć uzrovień łakalizacyi ŭ peŭnaj stupieni možna za košt rasijskaha pracesara «Elbrus». Ale heta ŭsio adno nie budzie biełaruskaja detal.
Plus navat apošnija rasijskija pracesary pa sučasnych mierkach pracujuć pavolna i mocna nahrajucca.
«Jany majuć pakazčyki, jak u pracesary ad Intel ci AMD dziesiacihadovaj daŭniny. Vidavočna, što pry ich vykarystańni havorki pra «sučasny kampjutar na ŭzroŭni suśvietnych technałohij» iści nie moža. Inšaje, za košt čaho jany mohuć pavialičyć uzrovień łakalizacyi — heta ekran. Haryzont moža vyrablać svaje ekrany da noŭtbukaŭ, tamu, kali hladzieć mienavita na fizičnyja abjomy — možna budzie kazać, što tam kala 30% biełaruskaha, bo ekran heta i jość kala traciny ad usiaho kampjutara.
Tamu «biełaruski» noŭtbuk u lepšym vypadku moža vyhladać tak: ułasny korpus z humovymi nožkami, svoj ekran i nizkapradukcyjnych rasijski pracesar».
Tym nie mienš, śpiecyjalist schilny mierkavać, što situacyja z «biełaruskim» noŭtbukam budzie vyhladać, jak z matacykłami M1NSK i elektramabilam biełaruskaj vytvorčaści.
Pradstaŭleny siońnia «Haryzont» — nie pieršy «biełaruski» noŭtbuk. U 2009 hodzie ŭ nas užo byŭ «svoj» noŭtbuk — Integral M401S. Naturalna, što ničoha biełaruskaha ŭ im nie było.
Polšča pryznała Alaksandra Mašenskaha niepažadanaj asobaj27
Kamientary