Soncaachoŭny krem: kitajskija navukoŭcy stvaryli lepšy i bolš biaśpiečny
Padčas ekśpierymientaŭ novy UF-filtr abaraniaŭ myšej ad soniečnych apiokaŭ lepš, čym isnujučyja pradukty, a taksama akazaŭsia nietaksičnym dla karałaŭ.
Navukoŭcy z Kitaja paviedamlajuć, što jany pačali raspracoŭvać toje, što mahło b stać pieršym z novaha i ŭdaskanalenaha pakaleńnia soncaachoŭnych srodkaŭ. Na myšach ich ekśpierymientalny palimier zabiaśpiečvaŭ bolšuju abaronu ad ultrafijaletavaha vypramieńvańnia, čym kamiercyjnyja pradukty. Jon taksama nie pranikaŭ u skuru i, zdajecca, nie ŭjaŭlaŭ niebiaśpieki dla karałaŭ.
Ekśpierymientalny soncaachoŭny krem byŭ raspracavany daśledčykami z Univiersiteta Cinchua ŭ Piekinie. Vykarystoŭvajučy chimičnuju reakcyju, viadomuju jak reakcyja Bidžyneli, kamanda stvaryła malekuły ŭ formie koła, padobnyja da adnaho z raspaŭsiudžanych inhredyjentaŭ, jaki siońnia vykarystoŭvajecca ŭ soncaachoŭnych kremach. Zatym daśledčyki złučyli malekuły ŭ roznyja rastvaralnyja ŭ vadzie struktury, stvaryŭšy bolš bujnyja malekuły palimieraŭ, ź jakich była adabranaja najbolš pierśpiektyŭnaja na padstavie jaje zdolnaści pahłynać ultrafijaletavaje vypramieńvańnie.
U nastupnych testach na myšach vyjaviłasia, što ekśpierymientalny filtr bolš efiektyŭna praduchilaje apioki skury, źviazanyja z ultrafijaletam, u paraŭnańni z dvuma raspaŭsiudžanymi siońnia soncaachoŭnymi srodkami. Da taho ž nie było vyjaŭlena dokazaŭ taho, što ŭ skuru myšej pranik palimier, čaho daśledčyki čakali z-za bolšaha pamieru jaho malekuł. I narešcie, kali palimieram uździejničali na svabodna płavajučyja vodaraści i karały, to jany ad kantaktu z palimieram nie mianialisia.
Miž tym pry ŭździejańni na karały aksibienzonu i inšych padobnych złučeńniaŭ, jakija vykarystoŭvajucca ŭ sučasnych soncaachoŭnych kremach, nazirajecca tak zvanaje vybielvańnie karałaŭ — heta źjava, pry jakoj karały «vyhaniajuć» bahavińnie, što raście na ich, i časta paśla hetaha hinuć.
Niekalki daśledavańniaŭ apošnich hadoŭ, jakija dakazali hetuju źjavu, navat pryviali da taho, što ŭ niekatorych miescach (naprykład, na Havajach) zabaranili soncaachoŭnyja kremy ź blizkimi da aksibienzonu kampanientami. Ale, jak časta byvaje, navukovaja dyskusija nakont dakładnaj škody hetych soncaachoŭnych kremaŭ dla akijanaŭ dahetul tryvaje. Bolšaja častka daśledavańniaŭ była praviedziena ŭ łabaratornych umovach, jakija mocna adroźnivajucca ad pryrodnych; niekatoryja navukoŭcy śćviardžajuć, što vyšejzhadanyja chimikaty, jakija traplajuć u navakolnaje asiarodździe, mocna razbaŭlenyja i ŭ horšym vypadku mohuć akazać niaznačny ŭpłyŭ na karałavyja ryfy.
Aproč hetaha, jak raspaviadaje Gizmodo, niadaŭnija daśledavańni taksama pakazvajuć, što niekatoryja inhredyjenty sučasnych soncaachoŭnych kremaŭ lohka pranikajuć praz skuru ŭ našu kroŭ. A niekatoryja soncaachoŭnyja kremy navat niadaŭna byli adklikanyja z-za bolš vysokaha za rekamiendavany ŭzrovień kancerahienu bienzołu. Ale znoŭ ža jość niekatoryja ahavorki: hetyja daśledavańni nie pakazali suviazi pamiž jakimi-niebudź prablemami sa zdaroŭjem i ŭździejańniem chimičnych rečyvaŭ, jakija pranikajuć u arhanizm praz soncaachoŭnyja kremy. Tamu, uličvajučy ŭžo dakładna vyjaŭlenuju ryzyku ŭździejańnia na arhanizm ultrafijaletu, navukoŭcy rajać usio ž vykarystoŭvać lubyja isnujučyja siońnia soncaachoŭnyja kremy, čym ich poŭnaściu paźbiahać, chavajučysia ŭ cieni.
Na abiedzie Łukašenki i Si Czińpina prysutničała i adzinaja dačka kitajskaha lidara11
Kamientary