Były palitviazień Źmicier Furmanaŭ pajšoŭ pracavać u dastaŭku ježy
U Vilni mužčyna ŭładkavaŭsia kurjeram u słužby dastaŭki Wolt i Bolt food. Razvozić zamovy Źmicier na rovary. Były palitviazień raskazaŭ «Našaj Nivie», kolki ŭ jaho atrymlivajecca zarablać i čamu abraŭ takuju pracu.
Jašče ŭ 2019-m Źmicier chacieŭ uvajści ŭ IT. Tady pajšoŭ na kursy raspracoŭščykaŭ u PVT u Horadni.
Da hetaha mužčyna dziesiać hadoŭ adpracavaŭ inžynieram na dziaržaŭnym pradpryjemstvie «Hrodnaabłaŭtatrans».
«Praź nizki zarobak vyrašyŭ mianiać śfieru dziejnaści, — tłumačyć jon. — Pra IT dumaŭ daŭno. Chacieŭ na prahramista vučycca ŭ Horadzienskim dziaržaŭnym univiersitecie. Zdaŭ CT, prachodziŭ na płatnaje, ale ž na toj momant — u 2002-m — padaŭ užo dakumienty ŭ Maskoŭski dziaržaŭny adkryty ŭniviersitet (byŭ filiał ich u Horadni). Tam była zavočnaja forma navučańnia na inžyniera-miechanika, i ja prachodziŭ na biaspłatnaje. Tamu pajšoŭ tudy, kab nie płacić za navučańnie».
U 2020-m Źmicier paśpieŭ schadzić na sumoŭje tolki ŭ adnu IT-kampaniju. Paśla pačałasia pandemija, vakansij u hetaj śfiery amal što nie było.
«Tady na sumoŭi vyjaviłasia, što ŭ mianie niedastatkovy ŭzrovień anhlijskaj movy. U Horadni staŭ zajmacca na kursach. A paśla — aryšt, turma (Źmicier byŭ siabram inicyjatyŭnaj hrupy Śviatłany Cichanoŭskaj i byŭ zatrymany naŭprost na pikiecie pa zbory podpisaŭ 29 maja 2020 hoda, u vyniku jaho asudzili da dvuch hadoŭ kałonii pa «narodnym» artykule 342. — NN.) Kali vyjšaŭ — vosieńniu 2021-ha, vyrašyŭ, što budu znoŭ sprabavać iści ŭ IT.
Skončyŭ jašče adny kursy pa prahramavańni. Tut pačałasia vajna, znoŭ źjavilisia prablemy ŭ IT.
Atrymlivajecca, užo paŭhoda šukaju pracu ŭ IT. U roznyja kampanii adsyłaŭ reziume, ale nijakich prapanoŭ nie atrymaŭ. Žyć niejak dalej treba: i ŭ kramu chadzić, i kvateru zdymać. Pajšoŭ pracavać kurjeram».
Razvozić zamovy Źmicier na rovary. Pracuje 6 hadzin, za dzień u siarednim atrymlivaje kala 50 jeŭra «na ruki».
Za hadzinu, pa słovach mužčyny, možna zarabić ad 7 da 11 jeŭra.
«Pracuju 4-5 dzion na tydzień, — kaža jon. — Hrafik taki, što možna pracavać, kali zachočaš, navat nočču. Zarobak zaležyć ad dnia tydnia, u piatnicu i vychodnyja za košt taho, što šmat zamoŭ, bolš atrymlivaješ.
Učora, darečy, było dźvie zamovy ad biełarusaŭ. Biełarusaŭ paznaju pa imionach, ich u prykładańni bačna. To ja ź imi adrazu pa-biełarusku pačynaju razmaŭlać.
U Vilni navat isnuje cełaja supołka biełaruskich kurjeraŭ».
Kali idzieš pracavać u dastaŭku, afarmlaješ indyvidualnuju dziejnaść.
«Heta nieskładana: prosta padaješ zajaŭku, na nastupny dzień atrymlivaješ siertyfikat (heta pracuje tolki dla tych, chto maje vid na žycharstva ŭ Litvie). Taksama płaciš, viadoma, padatak. Jon kala 60 jeŭra ŭ miesiac.
Budu dalej šukać pracu ŭ IT. Ciapier znajšoŭ stažyroŭku na Java-prahramista. Treba budzie zdać dla hetaha test pa anhlijskaj. Nie viedaju, ci atrymajecca, pasprabuju», — padsumoŭvaje Źmicier.
«Zasumavaŭ pa marozivie». Pieršaje mini-intervju na voli palitviaźnia Furmanava, jaki prachodziŭ pa «spravie Cichanoŭskaha»
U BDTU zładzili pakazalny sud nad dvuma studentami. Jašče 30 čakajuć čarhi
Aktyvist Ilja Mironaŭ raskazaŭ, navošta pisaŭ skarhi na Azaronka i jak stavicca da padazreńniaŭ u svoj bok
Ciapier čytajuć
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku19
Kamientary