Kalinoviec «Kuś»: Luby dziejač biełaruskaj revalucyi pierastanie dla mianie isnavać, kali voźmie ŭdzieł u handli palitviaźniami ŭ abmien na źniaćcie sankcyj

U adnoj z dyskusij u fejsbuku Alaksandr kateharyčna napisaŭ: «Dla mianie asabista luby dziejač pierastanie isnavać jak dziejač biełaruskaj revalucyi, kali jon voźmie ŭdzieł u handli palitviaźniami ŭ abmien na źniaćcie sankcyj».

U razmovie z «Našaj Nivaj» vajar pałka Kalinoŭskaha tłumačyć, što nie razumieje met tych, chto źbirajecca tarhavacca z režymam Łukašenki ŭ abmien na źniaćcie sankcyj. 

«Baču tolki adno pytańnie, pa jakim mohuć być pieramovy z Łukašenkam, — jaho kapitulacyja, — kaža Alaksandr «Kuś». —Umoŭna pra toje, kab jamu dali niejki «Boinh», kab jon moh kudyści źbiehčy».

Na jahony punkt hledžańnia, ludzi, jakija vystupajuć za handal pa pytańni palitviaźniaŭ, pieraśledujuć intaresy, jakija pieraklikajucca ź intaresami režymu. 

«Albo jany vypadkovyja biełarusy ŭ prateście — nie razumiejuć, čamu ludzi sieli ŭ turmu, za što jany zmahalisia.

Maja meta — vyzvaleńnie Biełarusi. Heta aŭtamatam zrobić palitviaźniaŭ volnymi. 

Čamu hetyja ludzi chočuć źniać sankcyi? Heta hałoŭnaje pytańnie. 

Ad kahości ja čuŭ, što palitviaźniaŭ varta vyzvalać lubymi sposabami. Ja dumaju inakš. Tut mnie padabajecca pazicyja Andreja Šarendy, muža palitźniavolenaj Paliny Šarendy-Panasiuk. Jon kateharyčna suprać handlu palitźniavolenymi.

Mnie zdajecca, što kali biełarus śviadoma zmahaŭsia z režymam Łukašenki, jak Mikałaj Statkievič, Pavieł Sieviaryniec, to jon rabiŭ heta nie dziela taho, kab paśla damaŭlalisia ab jaho vyzvaleńni z turmy šlacham lehitymizacyi Łukašenki, źniaćcia sankcyj. A dziela taho, kab režym Łukašenki abrynuŭsia. Heta była ich kančatkovaja meta. 

Vyzvalać ich. I što? Jany skažuć «dziakuj», što z režymu źniali sankcyi? Mnie zdajecca, što čałaviek, jaki śviadoma zmahaŭsia, stanie da apošnich sił trymacca, kab dadušyć. Liču, što hetyja ludzi ŭ turmie navat bolš svabodnyja, čym mnohija biełarusy pa-za miežami jaje», — razvažaje jon.

Alaksandr časam čuje rytoryku, što sankcyi nie pracujuć, nanosiać škodu zvyčajnym biełarusam u krainie.

«Ni ad adnaho čałavieka, kaho ja viedaju ŭ Biełarusi, chto suprać režymu, ja nie čuŭ «zdymicie sankcyi, nam drenna». Takija słovy čuŭ ad biznesoŭcaŭ, jakija nabližanyja i zaležać ad Łukašenki. Baču ŭ hetym, što pad sousam vyzvaleńnia palitźniavolenych niejkaja prasłojka ludziej sprabuje łabiravać inšyja intaresy, ich stan paśla źniaćcia sankcyj tolki palepšycca.

I jašče adzin momant — kali my nie hatovyja pakutavać navat ad sankcyj, to što budzie, kali ŭ Biełaruś zojduć biełarusy sa zbrojaj u rukach, što skažacie pra hetyja padziei? Što heta niebiaśpiečna, niechta moža zahinuć? Budziecie prasić skłaści zbroju, da hetaha budziecie zaŭtra zaklikać? Jak płanujecie zmahacca?» — zadajecca pytańniami jon. 

Sankcyi, pa mierkavańni vajara, pavinny być u kompleksie ź inšymi dziejańniami. A heta — uzbrojeny supraciŭ. 

«Biełarusy zmahajucca z režymam, siedziačy ŭ turmie, ludzi zahinuli — Raman Bandarenka, Andrej Zielcer, Vitold Ašurak i inšyja. Kazać ciapier, što davajcie pierahorniem staronku, kab vyzvalić palitźniavolenych, nielha, — ličyć jon. — Jak tady my zrobim z tymi, chto ciapier na vajnie va Ukrainie, zahinuŭ dziela hetych idej, vyzvaleńnia Biełarusi ad režymu Łukašenki, straciŭ zdaroŭje, atrymaŭ invalidnaść i ryzykuje kožny dzień svaim žyćciom, dabrabytam, asabistym ščaściem?

Lepš karotkaja vajna, čym šmathadovaje isnavańnie ŭ kancłahiery. Mnie na vajnie praściej, čym kali b mnie režym Łukašenki daŭ indulhiencyju i ja zmoh by viarnucca ŭ Biełaruś. Ja b tam nie zmoh dychać pavietram, bo jak možna chadzić pad hetymi łukašysckimi ściahami, trykałorami.

Kali b nie było palitźniavolenych, to, mahčyma, i Biełaruś z paradku dnia ŭžo syšła b. Skazali b, što zrabili svoj vybar, tam užo palitźniavolenych niama, usio dobra. Heta ŭsio baraćba, kožny z nas achviaruje ŭ toj ci inšaj stupieni.

Biez achviar nie byvaje baraćby, a biez baraćby nie byvaje pieramohi». 

Čytajcie taksama: 

Abvinavačanych pa spravie Hajdukieviča asudzili da vielizarnych terminaŭ. Prakopjevu dali zavočna 25 hadoŭ

Pastar pratestanckaj carkvy «Novaje žyćcio»: Nichto nie zastaniecca niepakaranym za znos chrama

U Minsku zatrymali zamiežnika, jaki sarvaŭ try dziaržaŭnyja ściahi

U Minskaj vobłaści ładziać mabilizacyjnyja vučeńni sa zborami

• 54
• 0
• 4
• 2
• 0
• 2
• 2
• 0