Arastovič: Metaj vahnieraŭcaŭ mohuć stać Vilnia ci Dźvinsk

Pra heta zajaviŭ były daradca Ofisa prezidenta Ukrainy Alaksiej Arastovič na łatvijskim telekanale TV3, piša Delfi.lv.

Pavodle jaho słoŭ, ciapier kiraŭnictva Rasii i Biełarusi na najvyšejšym uzroŭni viadzie infarmacyjnuju kampaniju suprać biaśpieki Polščy, Litvy i Łatvii. Adnak pahrozy, jakija prahučali, naprykład, pra žadańnie vahnieraŭcaŭ ździejśnić ekskursiju pa Varšavie, ihnaravać nie varta, bo jany mohuć stać realnaściu.

Arastovič ličyć, što realnaj metaj «Vahniera» moža być nie Polšča, a Vilnia i Dźvinsk (Daŭhaŭpiłs), raźmieščanyja niedaloka ad miažy ź Biełaruśsiu.

U situacyi kłasičnaj hibrydnaj vajny na polskaj miažy mahli b pačacca pravakacyi, jakija adciahnuć na siabie ŭvahu, a tym časam natoŭpy ŭciekačoŭ z bajevikami «Vahniera» prarvuć biełaruska-litoŭskuju i biełaruska-łatvijskuju miežy i pasprabujuć praniknuć unutr Litvy i Łatvii, paznačyŭ mahčymyja pahrozy eks-daradca Ofisa prezidenta Ukrainy.

Arastovič padkreśliŭ, što spynić takuju płyń uciekačoŭ budzie składana, a kali rabić heta z dapamohaj zbroi, to Łatvija i Litva «buduć drenna vyhladać», bo ŭciekačoŭ nielha budzie adroźnić ad bajevikoŭ. Siarod napadnikaŭ mohuć być vahnieraŭcy ŭ cyvilnym z aŭtamatami, schavanymi pad kurtkami.

Pry hetym Arastovič nieadnarazova padkreśliŭ, što heta samy niebiaśpiečny scenar, da jakoha treba rychtavacca. Taksama moža być tak, što nijakich realnych dziejańniaŭ suprać Polščy, Litvy ci Łatvii vahnieraŭcy ź Biełarusi nie pačnuć albo na miažy buduć adbyvacca adnosna drobnyja pravakacyi.

Arastovič upeŭnieny, što ŭrady Łatvii, Litvy i Polščy dastatkova surjozna staviacca da mahčymych pahroz, a vojski NATA hatovyja da roznych scenaroŭ raźvićcia padziej.

Ekśpiert aceńvaje ataku z Suvałkskaha kalidora jak małaimaviernuju, bo heta vielmi doŭhi šlach praz zonu, jakaja ŭžo šmat hadoŭ ličycca niebiaśpiečnaj u vajennych adnosinach. Maskva viedaje, što dla pieramohi patrebnyja raptoŭnyja i niečakanyja dziejańni, takija, jak uvarvańnie ŭ Dźvinsk (Daŭhaŭpiłs) i Vilniu.

Pa słovach byłoha daradcy, ciapier Maskvie važna akazać cisk na Zachad, kab stvaryć pieradumovy dla pieramoŭ i mahčymaściaŭ tarhavacca. «Havorka nie idzie pra toje, što Rasija pačnie vajnu z NATA, pakul heta infarmacyjnyja pravakacyi, jakija pavinny paŭpłyvać na mierkavańnie Zachadu, (…) kab stvaryć Maskvie spryjalnyja pieradumovy dla pieramoŭ», — reziumavaŭ Arastovič.

Jon dadaŭ, što Rasija zaŭsiody moža śćviardžać, što jana nie maje dačynieńnia da pravakacyj «Vahniera» i što jana «pasprabuje ź imi damovicca», kab jany bolš tak nie rabili. Takim čynam Rasija zdymaje ź siabie adkaznaść i pazicyjanuje siabie jak pasiarednika ŭ pieramovach.

• 7
• 0
• 2
• 6
• 3
• 0
• 6
• 0