«Žartaŭ nie budzie». Premjer Łatvii nazvaŭ mabilizacyju dadatkovych sił na biełaruskuju miažu papieradžalnaj akcyjaj
Štohadovy adpačynak słužačym Dziaržaŭnaj pamiežnaj achovy spyniajecca, a aficery, jakija znachodziacca ŭ adpačynku, adklikajucca ź jaho.
Mabilizacyja dadatkovych sił na łatvijska-biełaruskaj miažy — heta papieradžalnaja akcyja i sihnał, što «žartaŭ nie budzie», skazaŭ premjer-ministr Kryšjanis Karyńš u intervju prahramie «Ranišniaja panarama», piša Delfi.lv.
Bieručy pad uvahu hibrydnuju pahrozu, jakaja imkliva raście na łatvijska-biełaruskaj miažy, Dziaržaŭnaja pamiežnaja słužba z aŭtorka mabilizuje dadatkovych dziažurnych pamiežnikaŭ dla ŭzmacnieńnia achovy dziaržaŭnaj miažy.
Heta praaktyŭnaja akcyja, jakaja pavialičvaje našu prysutnaść i pasyłaje vyrazny sihnał našamu hramadstvu i ŭładam Biełarusi, što «tut nie budzie žartaŭ» i źniešniaja miaža jak Łatvii, tak i ES budzie achoŭvacca, — skazaŭ Karyńš, dadaŭšy, što cisk z boku Biełarusi pastupova ŭzmacniajecca.
Jak paviedamlałasia, rašeńnie ab mabilizacyi dadatkovych sił było pryniata ŭ suviazi z rostam hibrydnaj pahrozy na łatvijska-biełaruskaj miažy ŭ paniadziełak, 15 žniŭnia, kali byli vyjaŭleny sproby niezakonnaha pierasiakańnia nacyjanalnaj miažy 96 ludźmi, a taksama zafiksavana ŭzmacnieńnie ŭmiašańnia biełaruskich uład u arhanizacyju patoku nielehałaŭ.
Štohadovy adpačynak słužačym Dziaržaŭnaj pamiežnaj achovy spyniajecca, a aficery, jakija znachodziacca ŭ takim adpačynku, adklikajucca ź jaho.
Dziaržaŭnaja pamiežnaja słužba taksama zapytała dadatkovuju padtrymku ŭ Nacyjanalnych uzbrojenych sił (NUS) i Dziaržaŭnaj palicyi.
U Ministerstvie abarony Łatvii paviedamili, što kiraŭnik viedamstva abarony Inara Murnijece daručyła NUS nakiravać dadatkovyja siły dla padtrymki Dziaržaŭnaj pamiežnaj achovy na łatvijska-biełaruskaj miažy.
Z 5 vieraśnia pa 2 kastryčnika pa ŭsioj Łatvii projduć kompleksnyja vučeńni pa nacyjanalnaj abaronie Namejs-2023, u jakich płanujecca zadziejničać bolš za 8500 łatvijskich vajskoŭcaŭ i zemesarhaŭ (bajcy Nacyjanalnaj hvardyi), a taksama sałdat sił sajuźnikaŭ.
U ramkach padrychtoŭki da Namejs-2023 z 19 pa 20 žniŭnia na terytoryi pamiežnych Rezeknienskaha i Łudzienskaha rajonaŭ projduć palavyja taktyčnyja vučeńni 32-ha piachotnaha bataljona 3-j Łathalskaj bryhady Zemesardze z metaj navučańnia i pravierki ahulnych bajavych mahčymaściaŭ padraździaleńnia.
Sioleta było praduchilena niezakonnaje pierasiakańnie miažy pamiž Łatvijaj i Biełaruśsiu 5799 nielehałami, z humanitarnych mierkavańniaŭ u krainu ŭpuścili 292 čałavieki.
Ciapier čytajuć
Časam niečakanaja historyja biełaruskich himnaŭ: «My vyjdziem ščylnymi radami», «Pahonia», «Žyvie Biełaruś», «Radzima maja darahaja», «Mahutny Boža» (ź VIDEA)1111
Kamientary