Papa Francišak daŭ indulhiencyju viernikam z nahody 400-j hadaviny śmierci Jazafata Kunceviča. Jakija ŭmovy dla atrymańnia
12 listapada adznačałasia 400-hodździe sa dnia pakutnickaj śmierci śviatoha Jazafata Kunceviča, biskupa i pakutnika, apiekuna Viciebskaj dyjacezii Katalickaha kaścioła ŭ Biełarusi.
Uračystyja śviatkavańni ŭ honar Jazafata Kunceviča prachodziać u Biełarusi z 16 kastryčnika 2023 hoda pa 25 listapada 2024 hoda.
Vatykan z hetaj pryčyny daje poŭny adpust (indulhiencyju) — na zvyčajnych umovach (spoviedź, kamunija i malitva za Papu) — usim viernikam kožnaha abradu, jakija pakajucca i ździejśniać učynki miłasernaści, naviedaŭšy ź pilihrymkaj jubilejny kaścioł u Biełarusi, vyznačany biskupam Viciebskim ci apostalskim administrataram dla katolikaŭ vizantyjskaha abradu ŭ Biełarusi, a tam voźmuć udzieł u jubilejnych uračystaściach u honar śviatoha Jazafata Kunceviča.
Jubilejnyja kaścioły, vyznačanyja biskupam Viciebskim Aleham Butkievičam:
- katedralny kaścioł Jezusa Miłasernaha ŭ Viciebsku,
- kaścioł Naradžeńnia Najśviaciejšaj Panny Maryi ŭ Brasłavie — dyjacezijalny Sanktuaryj Maci Božaj Brasłaŭskaj,
- kaścioł śviatoha Andreja Baboli ŭ Połacku,
- kaścioł Najśviaciejšaj Trojcy ŭ Hłybokim,
- kaścioł śviatoha Antonija Paduanskaha ŭ Pastavach.
Jubilejnyja cerkvy, vyznačanyja Apostalskim administrataram dla katolikaŭ vizantyjskaha abradu ŭ Biełarusi archimandrytam Siarhiejem Hajekam — hreka-katalickija śviatyni ŭ Połacku, Viciebsku, Breście i ŭ Minsku (carkva Maci Božaj Niastomnaj Dapamohi).
Pažyłyja, niamohłyja i ŭsie, chto pa surjoznych pryčynach nie moža vyjści z domu, mohuć atrymać poŭny adpust, vykonvajučy try zvyčajnyja ŭmovy, i duchoŭna, pierad abrazom śviatoha Jazafata Kunceviča.
400-hodździe pakutnickaj śmierci śviatoha Jazafata Kunceviča adznačajecca ryma-katalickimi i hreka-katalickimi viernikami ŭ Biełarusi. U niadzielu ŭ Viciebskaj katedry adbyłasia prynahodnaja imša, da hetaj daty byŭ zładžany konkurs malunkaŭ i litaraturny konkurs. Mierapryjemstvam sprabavała pieraškodzić Volha Bondarava, ale paciarpieła parazu.
U paniadziełak śpikier parłamienta Litvy Viktoryja Čmilicie-Nilsen padčas aŭdyjencyi ŭ Papy Franciška padaryła pantyfiku faksimile malunka Jazafata Kunceviča, jakoje zachoŭvajecca ŭ biblijatecy Urubleŭskich Litoŭskaj akademii navuk. U Vatykanie pasolstva Litvy ładzić vystavu ŭ honar sv. Jazafata.
***
Zabojstva Jazafata Kunceviča adbyłosia 400 hadoŭ tamu. Pryznačany Połackim mitrapalitam, jon spryjaŭ pašyreńniu ŭnijactva na ziemlach u składzie Rečy Paspalitaj. Pravasłaŭnyja vierniki vinavacili jaho ŭ hvałtoŭnych dziejańniach, pieraśledzie duchavienstva i navat «łacinizacyi» cerkvaŭ, u jakich jon zahadaŭ navieści paradak i pačyścić abrazy.
Aktyŭnaje supraćstajańnie pamiž viernikami dźviuch kanfiesij doŭžyłasia paŭtara hoda i dasiahnuła kulminacyi 12 listapada 1623 hoda. U toj dzień raźjušanyja žychary Viciebska atačyli dom Jazafata Kunceviča, i kali toj vyjšaŭ supakoić natoŭp, jamu raśsiekli hałavu. Potym cieła zabitaha, pryviazaŭšy da noh i šyi kamiani, utapili ŭ Dźvinie. Razrabavaŭšy dom mitrapalita i ŭnijackija chramy, najbolš aktyŭnyja ŭdzielniki buntu ŭciakli z horada.
Adzinaviercy spačatku pachavali mitrapalita ŭ połackim Safijskim sabory, a paśla vyvieźli daloka ŭ Rym, i ciapier moščy śviatoha Jazafata zachoŭvajucca ŭ sabory Śviatoha Piatra. U červieni 1867 hoda Papa Pij ICH abviaściŭ Jazafata Kunceviča śviatym.
Kamientary