Padstavaj dla składańnia pratakoła stali nacyjanalnyja ściahi, jakija zabrali ŭ viadomaj hramadskaj aktyvistki.
Pakolki Nina Bahinskaja na sudy pryncypova nie chodzić, to pakul nieviadoma, ci nie dastavili jaje tudy prymusova supracoŭniki milicyi. Infarmacyju pra heta «Biełsatu» paviedamiła krynica ŭ Biełarusi.
Z krynicaŭ «Biełsata» viadoma, što 20 sakavika Bahinskaja była ŭ kvatery syna, kali tudy pryjšli siłaviki ź pieratrusam. Jany zabrali ŭsie nośbity infarmacyi, a taksama try ściahi i płakat z Pahoniaj, jakija naležali Ninie Bahinskaj.
U toj ža dzień Bahinskaja naviedała Śledčy kamitet, kab vyśvietlić los zabranych rečaŭ. Jana padała zajavu z patrabavańniem, kab usio było aformlena pa zakonie — majomaść zabrali tolki paśla taho, jak budzie na heta adpaviednaja pastanova suda.
Krynicy paviedamili, što dziažurny vyklikaŭ u budynak Śledčaha kamitetu milicyjantaŭ i tyja zatrymali žančynu. U adździele milicyi Partyzanskaha rajona milicyjanty źniali maleńki značok z vyjavaj nacyjanalnaha ściaha z kaŭniera palito, u jakoje była apranuta Bahinskaja.
Na jaje skłali pratakoł za «našeńnie ekstremisckaj atrybutyki» i adpuścili dadomu. U vypadku, kali 1 krasavika Nina Bahinskaja nie źjavicca ŭ sudzie, administracyjnuju spravu buduć razhladać zavočna.
Nina Bahinskaja za svaju hramadskuju dziejnaść była pakaranaja šmat razoŭ. Štrafy skłali takuju sumu, što ŭłady apisali jaje majomaść, u tym liku nieruchomaść. Jaje lecišča vystaŭlali na aŭkcyjon. Pałova ŭčastka i pałova doma ciapier zakrytyja dla žančyny, bo jana ŭžo nie moža imi rasparadžacca. Nina Bahinskaja nie adnojčy vykazvałasia, što ličyć dziejańni ŭładaŭ u dačynieńni da jaje biespadstaŭnymi i niezakonnymi.
Kamientary
A łancuhovyja kałabaranty raźbiahucca pry pieršym surjoznym šuchiery i realnaj ŭłasnaj pahrozie z boku naroda.