Rasijski chakieist z «Bresta» žorstka źbiŭ kazachstanca sa Žłobina. U bijahrafii ŭ ahresara pjanaje kiravańnie i deboš
U čempijanat Biełarusi pa chakiei pryjazdžajuć šmat rasiejcaŭ, jakija chočuć pierazahruzić karjeru ci dahulać da piensii. Časam traplajucca i ludzi sa skandalnym minułym. I jano, byvaje, vypluchvajecca vonki.
U Žłobinie siońnia pačałasia finalnaja sieryja čempijanatu Biełarusi pa chakiei. Miascovy «Mietałurh», jaki pieramahaŭ dva hady zapar, hulaje z «Brestam», jaki dabraŭsia da vyrašalnych matčaŭ zusim niečakana.
U pieršaj hulni favaryty pieramahli vielmi ŭpeŭniena — 6:1. Ale nie hałami zapomniŭsia hety matč. U kancy treciaha pieryjadu, kali ŭsio ŭžo było vyrašana, rasijski napadajučy «Bresta» Jarasłaŭ Kosaŭ źbiŭ uradženca kazachstanskaha Uść-Kamienahorska Arcioma Ancipava z «Mietałurha», jaki lažaŭ na lodzie.
Kosavu, mabyć, nie spadabałasia, što Ancipaŭ u padzieńni adkinuŭ šajbu dalej. Ci jon uspomniŭ sutyčku, jakaja zdaryłasia krychu raniej. Uvohule, vyrašyŭ supiernika «pakarać» — i niekalki razoŭ udaryŭ lažačaha hulca kluškaj.
Rasijanina vydalili da kanca matču, a Ancipaŭ hulniu praciahnuć nie zmoh.
Kali mierkavać pa rehalijach, Kosaŭ — hulec dla čempijanatu Biełarusi navat zorny. Jon hulaŭ za moładzievuju zbornuju Rasii, vystupaŭ za rasijskija top-kłuby, trojčy braŭ Kubak Haharyna — heta hałoŭny trafiej Kantynientalnaj chakiejnaj lihi. Hulcy z takim rename ŭ biełaruskuju ekstralihu zajazdžajuć redka. Tolki kali jany nie zahubili šmatabiacalnuju karjeru z-za skandałaŭ i złoŭžyvańnia mocnymi napojami.
Voś i Jarasłaŭ Kosaŭ šmat u čym prasłaviŭsia za miežami chakiejnaj placoŭki. U 2018 hodzie jon staŭ hałoŭnym hierojem bujnoha skandału ŭ rasiejskim chakiei. Kazanski «Ak Bars», za jaki tady vystupaŭ Kosaŭ, šumna śviatkavaŭ pieramohu ŭ KCHŁ. Aficyjnaja častka płaŭna pieraciakła ŭ bankietnuju. A ranicaj ładna padpityja Kosaŭ i kapitan kamandy Alaksandr Śvitaŭ vyklikali taksi, kab dabracca dadomu.
Kažuć, Jarasłavu nie spadabaŭsia styl kiravańnia taksista i jon prapanavaŭ uziać kiravańnie na siabie. Kiroŭca ŭ nadziei na salidny ček puściŭ pjanaha chakieista za rul. A nieŭzabavie mašynu spynili daišniki. Kosava i taksista pazbavili pravoŭ. Chakieist nibyta abiacaŭ dapamahčy kiroŭcu hrašyma, ale paśla prosta pierastaŭ padymać słuchaŭku.
Karjera chakieista pajšła pa nachilnaj. Jon mianiaŭ adzin kłub za druhim, hulajučy ŭsio horš. U 2019 hodzie Kosaŭ u składzie nižniakamskaha «Naftachimika» pryjechaŭ u dobra znajomuju Kazań. Na hulniu Jarasłava nie zajavili, tamu jon vyrašyŭ adpačyć u hateli. Atrymałasia niekulturna: pjany chakieist błukaŭ pa hateli i hučna łajaŭsia matam.
Supracoŭniki hatela vyklikali palicyju. Kosava aštrafavali na kapiejki i adpuścili. Pracu, praŭda, jon straciŭ. Zatym jon źmianiŭ jašče dva kłuby, minuły hod uvohule prapuściŭ. A ŭ ciapierašnim raptam apynuŭsia ŭ «Breście», jakomu dobra taki dapamoh dabracca da finału — pa mierkach čempijanatu Biełarusi navat u ciapierašniaj formie jon prykmietny. Ale zapomnicca rasiejec vyrašyŭ inšym.
***
«U nas tut nie tajski boks. Bić u šyju hulca kluškaj… Ja liču, što nie pavinna być takich chakieistaŭ u našaj lizie. Treba prosta prybirać i ŭsio. Kroŭ z rota idzie», — zajaviŭ paśla matču hałoŭny trenier «Mietałurha» Dźmitryj Kraŭčanka. Nie pahadzicca ź im ciažka.
Ancipavu naniesieny ŭdar pa šyjnym adździele chrybietnika. Kosavu ž pahražaje da piaci matčaŭ dyskvalifikacyi.
Ciapier čytajuć
Piśmieńnica Taćciana Zamiroŭskaja raskazała pra novuju knihu, sny pra Łukašenku, košt žyćcia ŭ Ńju-Jorku i toje, čamu złuje na niekatorych biełarusaŭ1616
Kamientary