Ad NCHŁ da kamandy Łukašenki. Historyja chakieista Kanstancina Kalcova, jaki zahinuŭ u Majami
18 sakavika ŭ Majami zahinuŭ były biełaruski chakieist Kanstancin Kalcoŭ. Jaho žyćcio abarvałasia ŭ momant karjernaha rostu — maładoha treniera praročyli na pasady ŭ minskim «Dynama» i zbornaj Biełarusi. Ale jakim byŭ jahony karjerny šlach? Sabrali niekalki faktaŭ pra Kanstancina Kalcova.
Adzin z hałoŭnych talentaŭ biełaruskaha chakieja, ale ličyŭ, što ŭsiaho dabiŭsia ciažkaj pracaj
Kanstancin Kalcoŭ debiutavaŭ za minskaje «Junactva» ŭ darosłym chakiei va ŭzroście 17 hadoŭ, paśla čaho pajechaŭ u Rasiju. Za akijanam zaŭvažyli talenavitaha biełarusa, i ŭ 1999-m hodzie «Pitsburh» jaho vybraŭ na drafcie NCHŁ (štohadovy kirmaš maładych hulcoŭ) užo ŭ pieršym raŭndzie.
Kalcova vybrali pad ahulnym 18-m numaram z usich maładych zorak. Vyšej za jaho ź biełarusaŭ kaciravalisia ŭ svoj čas tolki Rusłan Salej (9 numar, 1996) i Andrej Kaścicyn (10 numar, 2003).
Da ZŠA biełaruski forvard dajechaŭ nie adrazu. Zdaryłasia heta tolki ŭ siezonie 2002/03, pryčym Kalcoŭ bolš času pravodziŭ u farm-kłubie «Pitsburha».
Małady chakieist u pačatku nulavych pierapisvaŭsia z zaŭziatarami na internet-forumie haziety «Presboł» i pisaŭ pra siabie nastupnaje: «Ja — nie talent. Kali ja čahości dasiahaju, to tolki praź vielizarnuju pracu — kali ad treniroŭki hublaješ prytomnaść abo, prabačcie za vyraz, bluješ».
Hulaŭ z adnoj lehiendaj chakieja i ŭražvaŭ chutkaściu druhuju
Za akijanam u Kalcova nie ŭsio atrymałasia. U svoj druhi siezon za «Pitsburh» forvard uziaŭ udzieł va ŭsich 82 matčach NCHŁ, ale jaho kamanda stała najhoršaj u lizie.
Pryčym biełarus hulaŭ u adnoj trojcy z kanadcam Marya Leḿjo, jakoha ličać adnym z najlepšych chakieistaŭ u historyi. A svajoj chutkaściu Kalcoŭ uražvaŭ zusim junaha na toj momant Sidni Krośbi.
U 2004-m liha syšła ŭ łakaŭt praz zabastoŭku hulcoŭ, a Kanstancin Kalcoŭ viarnuŭsia spačatku ŭ minskaje «Dynama», a paśla ŭ maskoŭski «Spartak». Paśla zakančeńnia zabastoŭki biełarus znoŭ pajechaŭ u «Pitsburh», ale siezon 2005/06 staŭ pravalnym dla forvarda.
Pieršym siarod biełarusaŭ vyjhraŭ KCHŁ
U siaredzinie nulavych Kalcova padpisaŭ «Sałavat Jułajeŭ», adzin z najbolš tytułavanych rasijskich kłubaŭ. U intervju viartańnie biełarus kamientavaŭ nastupnym čynam:
«Była prapanova «Kałambusa», ale ŭ Rasii płaciać bolš».
Za šeść siezonaŭ va Ufie forvard vyjhraŭ čempijanat Rasii, a ŭ 2011-m staŭ pieramožcam Kantynientalnaj chakiejnaj lihi — čempijanatu z rasijskich i ŭschodniejeŭrapiejskich kamand.
Doŭhi čas Kalcoŭ byŭ adzinym biełarusam, jaki mieŭ status čempijona KCHŁ.
Šmat hadoŭ hulaŭ za kamandu Łukašenki i padpisaŭsia za ŭładu
Kalcoŭ skončyŭ karjeru chakieista ŭ 2016 hodzie — minskaje «Dynama» vyrašyła nie prapanoŭvać novy kantrakt 35-hadovamu vieteranu.
Hulec znajšoŭ sabie novy kalektyŭ davoli chutka. Im stała kamanda Alaksandra Łukašenki. Pieršy matč Kalcoŭ pravioŭ u Škłovie na adkryćci chakiejnaj areny i adznačyŭsia zakinutaj šajbaj.
Vystupleńni za łukašenkaŭskuju kamandu chakieist sumiaščaŭ z trenierskaj karjeraj. U 2018 hodzie jon navat prapuściŭ hulniu «Dynama», dzie pracavaŭ trenieram, kab zhulać na Kaladnym turniry.
Falsifikacyja vybaraŭ i pratesty nijak nie paŭpłyvali na žadańnie być u adnoj kamandzie z Łukašenkami, a ŭ 2020-m jon padpisaŭ praŭładny list, zajaviŭšy, što sport pavinien być pa-za palitykaj.
Kalcova praročyli ŭ treniery «Dynama» i zbornaj
Apošni siezon minskim kłubam i zbornaj kiravaŭ rasijski trenier Dźmitryj Kvartalnaŭ. Ale «Dynama» praviało dastatkova blakły siezon, standartna vylecieŭšy ŭ pieršym raŭndzie płej-of KCHŁ. Zbornaja ž pad mižnarodnym banam pieravažna haniaje tavaryskija matčy z rasijanami.
U lutym źjavilisia čutki, što Kvartalnaŭ u Minsku nie zatrymajecca, a na jaho miesca pryjdzie Kanstancin Kalcoŭ. Małady biełaruski trenier niabłaha siabie zarekamiendavaŭ asistentam hałoŭnaha treniera ŭ «Sałavacie Jułajevie». I mieŭ dośvied kiravańnia nacyjanalnaj zbornaj: u 2021 i 2023 hadach jon padmianiaŭ hałoŭnych trenieraŭ.
Ahienctva Winners abviarhała infarmacyju pra intares «Dynama» da Kalcova, ale za niekalki hadzin da hibieli 42-hadovaha treniera stała viadoma, što jon pakidaje «Sałavat Jułajeŭ».
«Naša Niva» — bastyjon biełaruščyny
PADTRYMAĆŽurnalist pra śmierć Kalcova: Ciažka ŭjavić, što ciapier adčuvaje Sabalenka
Dźvie trahiedyi Sabalenki. U 42 hady pamior bojfrend tenisistki, a da hetaha amal u takim ža ŭzroście — jaje baćka
Kanstancin Kalcoŭ zahinuŭ u Majami
Salej, Cypłakoŭ, Kalcoŭ — losy biełaruskich chakieistaŭ, jakija pieršymi skarali NCHŁ, vydalisia trahičnymi
U ZŠA zahinuŭ chakieist Kanstancin Kalcoŭ — bojfrend Aryny Sabalenka
Ciapier čytajuć
«Heta była žyvaja kamiera sačeńnia». Što rabiła viciablanka Kaciaryna, kab vyzvalicca praz 5 hadoŭ zamiest prysudžanych 12 hadoŭ10
Kamientary