U mai mohuć zakryć jašče adzin punkt propusku na miažy Biełarusi i Litvy
Takim čynam na biełaruska-litoŭskaj miažy zastaniecca tolki adzin punkt propusku. Hod tamu było šeść.
Punkt propusku «Šalčyninkaj» («Salečniki», ź biełaruskaha boku «Bieniakoni») na miažy Litvy i Biełarusi mohuć zakryć u pačatku maja. Pra heta piša «Kommiersant» sa spasyłkaj na dyrektara pa mižnarodnych transpartnych apieracyjach FM Logistic ŭ Rasii Jarasłava Biełavusava.
Śpiecyjalist udakładniaje, što ciapier termin čakańnia dla hruzavikoŭ u čarzie na miažy ź Litvoj na pamiežnych pierachodach «Kamienny Łoh»/«Miadzininkaj» («Miedniki») i «Bieniakoni»/«Šalčyninkaj» na ŭjezd u Biełaruś składaje 5-6 dzion, na vyjezd — kala 20 dzion.
U čarzie na punkcie propusku biełaruska-polskaj miažy «Kazłovičy»/«Kukuryki» na ŭjezd u Biełaruś fury stajać 14—17 dzion, na vyjezd — 1—2 dni.
Praz takija zatrymki na miažy ź ES staŭki frachtu ŭ mižnarodnych aŭtapieravozkach vyraśli ŭdvaja, paviedamlaje kiraŭnik kirunku mižnarodnych aŭtapieravozak Noytech Supply Chain Solutions Ivan Zacharčanka.
U žniŭni 2023 hoda litoŭcy zakryli punkty propusku «Šumsk» («Šumskas», ź biełaruskaha boku «Łoša») i «Ćvierač» (Ćviaračus, ź biełaruskaha boku «Vidzy»),
U sakaviku byli zakrytyja «Rajharad» («Rajhardas», ź biełaruskaha boku «Pryvałka»), i «Łavaryški» («Łavaryškies», ź biełaruskaha boku «Katłoŭka»).
Takim čynam na biełaruska-litoŭskaj miažy zastaniecca adzin punkt propusku: «Miadzininkaj» («Miedniki», ź biełaruskaha boku «Kamienny Łoh»).
Na łatvijskaj miažy dziejničaje adzin punkt propusku, z polskaj adzin punkt dla lehkavych aŭtamabilaŭ i aŭtobusaŭ, a taksama adzin punkt propusku dla hruzavoha transpartu.
Kamientary