Viciebski vykładčyk dakazaŭ «słušnaść» idej Kim Ir Sena, jaho ŭznaharodzili ŭ KNDR
Napiaredadni vizitu biełaruskaj delehacyi ŭ Pchieńjan na sajcie Centralnaha telehrafnaha ahienctva Karei (CTAK) źjaviłasia navina pra ŭznaharodžańnie biełaruskaha navukoŭca ŭładami KNDR, paviedamlaje «Biełsat».
Zhodna z paviedamleńniem, vučonaja stupień doktara hramadska-palityčnych navuk KNDR nadadzienaja zahadčyku kafiedry Viciebskaj dziaržaŭnaj vieterynarnaj akademii Biełarusi.
«Jon rastłumačyŭ i dakazaŭ słušnaść i vydatnaść samabytnych idej i palityki našaj krainy, zasnavanych na tradycyjach revalucyjnaj adukacyi, jakija stvaryŭ vialiki pravadyr tavaryš Kim Ir Sen», — havorycca ŭ aficyjnym paviedamleńni.
Cyrymonija nadańnia zvańnia adbyłasia 15 krasavika ŭ Mansudeskim pałacy źjezdaŭ. U joj uziali ŭdzieł namieśnik premjer-ministra KNDR Čon Syn Huk, namieśnik staršyni Karejskaha tavarystva dziejačaŭ hramadskich navuk Pak Čchol Čžun, kiraŭničyja rabotniki Dziaržaŭnaj atestacyjnaj kamisii i Karejskaha tavarystva dziejačaŭ hramadskich navuk, čalcy delehacyi arhanizacyj vyvučeńnia idej čučche (miascovaj ideałohii) z roznych krain.
Imia navukoŭca ŭ paviedamleńnie nie nazyvajecca, ale na sajcie Viciebskaj dziaržaŭnaj vieterynarnaj akademii pad hetaje apisańnie padychodzić Siarhiej Dziaviatych, zahadčyk kafiedry sacyjalna-humanitarnych dyscyplinaŭ i ahrabiznesu. Naprykład, u 2017 hodzie jon ładziŭ u akademii vystavu «Paŭnočnaja Kareja: dalokaja i blizkaja», a letaś razam sa studentam fakulteta vieterynarnaj miedycyny naviedvaŭ dypłamatyčny pryjom u ambasadzie KNDR u Minsku.
Zhodna z aficyjnaj bijahrafijaj, Dziaviatych u 1989 hodzie skončyŭ zaainžynierny fakultet Viciebskaha vieterynarnaha instytuta (ciapier akademija), u 2000 hodzie — fiłałahičny fakultet Viciebskaha dziaržaŭnaha ŭniviersiteta pavodle śpiecyjalnaści «nastaŭnik rasiejskaj movy i litaratury», u 2018 hodzie — Mižnarodny ŭniviersitet MIPSA pavodle śpiecyjalnaści «pravavoje rehulavańnie zamiežnaekanamičnaj dziejnaści»; mahistr pravaznaŭstva.
Jon čalec Rasijskaha psichałahičnaha tavarystva i Rasijskaha hieahrafičnaha tavarystva, z 2017 hoda — hanarovy čalec Sajuza žurnalistaŭ KNDR.
16 krasavika ŭ Pchieńjan prybyŭ namieśnik ministra zamiežnych spraŭ Biełarusi Jaŭhien Šastakoŭ. Biełaruskija dziaržaŭnyja miedyi nie paviedamlali pra heta, ale pra vizit raskazała CTAK.
Ciapier čytajuć
Śpiecsłužby źbirajuć infarmacyju pa čatach dyjaspary. Najpierš šukajuć studentaŭ5
Kamientary