Što adbyłosia z palitviaźniem Piatrom Staracitaravym, adnym z samych bahatych biznesmienaŭ Homielščyny?

Piotr Staracitaraŭ uvachodziŭ u top-50 samych bahatych biznesmienaŭ Homielščyny. Uradženiec miastečka Cierachaŭka pad Dobrušam, jon pabudavaŭ bujny biznes u Mazyry — jaho kampanija «Łotas» vypuskała žalezabietonnyja vyraby, hazasilikatnyja błoki, zajmaŭsia meblaj. U najlepšyja časy na pradpryjemstvie było da 1200 supracoŭnikaŭ. U «Łotasa» byli svoj karjer u Mazyrskim rajonie i filijały ŭ Rasii. Sam Staracitaraŭ byŭ pravasłaŭnym miecenatam, taksama pieraličvaŭ hrošy na dapamohu žyviołam.

Usio ŭ žyćci 65-hadovaha biznesmiena źmianiłasia paśla pačatku rasijskaj ahresii va Ukrainie. Staracitaraŭ mieŭ vyraznuju antyvajennuju pazicyju, jakuju tranślavaŭ praz sacsietki, u pryvatnaści, praz svoj akaŭnt u fejsbuku. Heta i stała pryčynaj kryminalnaha pieraśledu.

6 lutaha 2023 hoda Piatra Staracitarava zatrymali supracoŭniki HUBAZiKa. Źlivačny milicejski kanał vykłaŭ videa ź jaho ŭdziełam.

Jamu inkryminiravali ažno piać artykułaŭ:

• č. 1 art. 368 — abraza prezidenta;
• č. 1 art. 367 — paklop u dačynieńni da prezidenta;
• č. 3 art. 361 — zakliki da sankcyj ci inšych dziejańniaŭ, nakiravanych na pryčynieńnie škody nacyjanalnaj biaśpiecy Biełarusi;
• art. 369-1 — dyskredytacyja Biełarusi;
• č. 1 art. 130 — raspalvańnie varožaści.

Jašče da zatrymańnia ŭ Staracitarava byli značnyja prablemy sa zdaroŭjem — branchijalnaja astma, arteryjalnaja hipiertenzija, — a ŭ źniavoleńni jany abvastrylisia. Tym nie mienš jaho praciahvali trymać za kratami. Padčas znachodžańnia ŭ SIZA u biznesmiena zdaryŭsia insult, uvieś čas jon pravodziŭ u miedčaści SIZA.

Niahledziačy na ŭsio heta, 21 žniŭnia 2023 hoda sudździa Jaŭhien Šaršnioŭ na zakrytym pracesie prysudziŭ Staracitaravu piać hadoŭ kałonii.

10 listapada 2023 hoda adbyŭsia razhlad apielacyjnaj skarhi biznesmiena ŭ Viarchoŭnym sudzie. Staršynia sudovaj kalehii Pavieł Karšunovič pakinuŭ prysud niaźmiennym, i toj ustupiŭ u zakonnuju siłu. Uśled za hetym KDB dadaŭ biznesmiena ŭ śpis «terarystaŭ».

14 śniežnia 2023 hoda adbyŭsia jašče niezaŭvažany sud nad biznesmienam — pra «inšyja pytańni, źviazanyja z pryviadzieńniam prysudu ŭ vykanańnie». Što heta mahło być? Chutčej za ŭsio, albo vypraŭleńnie drobnaj niedakładnaści ŭ prysudzie, albo prośba pra admienu prysudu ŭ suviazi ź ciažkaj chvarobaj.

Takija situacyi — kali čałavieka z vyniesienym prysudam i krytyčnym stanam zdaroŭja adpraŭlajuć dadomu z kałonii (ci SIZA) — zdarajucca. Kamisija prychodzić da vysnovy, što miedycynskaja dapamoha bolš nie maje sensu i nie daść nijakaha vyniku. Ale hetyja vypadki adzinkavyja.

U lubym razie nieviadoma, čym skončyŭsia toj dadatkovy sud nad biznesmienam.

Adnak nieŭzabavie — nie adrazu, a praź miesiac, — 18 studzienia 2024 hoda, Staracitarava prybrali sa śpisu «terarystaŭ». Heta i stała dadatkovaj začepkaj, kab vyśvietlić, što adbyłosia z palitviaźniem. 

Reč u tym, što jość tolki niekalki pryčyn, kab čałaviek u Biełarusi pierastaŭ być «terarystam». U adpaviednaj pastanovie Savieta ministraŭ pieraličanyja vosiem punktaŭ, ź jakich da fizičnych asobaŭ, asudžanych u Biełarusi, moža padychodzić čatyry:

• admova ad pieraśledu na etapie śledstva (spynieńnie spravy);
• admiena prysudu praz adsutnaść składu złačynstva;
• najaŭnaść pahašanaj sudzimaści;
• śmierć čałavieka.

Što z hetaha pasuje da situacyi Staracitarava? Niezrazumieła, choć, viadoma, my spadziajemsia na lepšyja varyjanty.

Kali ŭjavić, što Staracitarava sapraŭdy adpuścili 14 śniežnia 2023 hoda, to, zhodna z zakonam, sudzimaść ź jaho musiła b zdymacca ciaham piaci hadoŭ (daterminova — praz dva z pałovaj), bo adno sa «złačynstvaŭ», u jakim jaho vinavacili, ličycca ciažkim. Takim čynam, jaho sudzimaść nie mahła źniacca.

Usie inšyja ludzi, vyklučanyja raniej z «terarystyčnaha» śpisu, całkam adbyli termin i zmahli praź niejki čas pahasić sudzimaść. Akramia Ramana Pratasieviča, jakoha svaim ukazam hučna pamiłavaŭ Łukašenka. A voś pra Staracitarava padobnych navinaŭ niama.

Pra biznesmiena z taho času ŭvohule ničoha nie čuvać. Jon nie źjaviŭsia ŭ sacsietkach, usie staryja kantakty, jakija my znajšli z dapamohaj prajekta Digital intelligence team, nieaktyŭnyja. Sajt kampanii i jaje telefony niedastupnyja, choć na momant, kali vychodziła milicejskaje videa sa Staracitaravym, jany pracavali.

Kali vam štości viadoma pra los Piatra Staracitarava, prosim paviedamić u «Našu Nivu». My ŭśviedamlajem prava siamji zachoŭvać tajamnicu pryvatnaha žyćcia, ale ličym, što los kožnaha palitviaźnia maje vyklučnuju hramadskuju značnaść.

• 4
• 0
• 0
• 3
• 5
• 21
• 3
• 0