«Heta pravakacyja». Batutysta Litvinoviča na Alimpijadzie spytali ab padtrymcy Łukašenki
Dvuchrazovy alimpijski čempijon u skačkach na batucie paśla pieramohi ŭ Paryžy parazvažaŭ ab niejtralnym statusie.
Biełaruski batutyst Ivan Litvinovič paśla zavajovy zołata na Alimpijadzie ŭ Paryžy adkazaŭ na pytańnie ab niejtralnym statusie.
Padčas uznaharodžańnia dvuchrazovaha čempijona zamiest himna hrała miełodyja, abranaja MAK. Žurnalisty paprasili Litvinoviča prakamientavać hety fakt, piša insidethegames.biz.
«Što tut skazać? Heta inšaja miełodyja. Naš himn lepšy. Viadoma, na nastupnych Alimpijskich hulniach ja chacieŭ by vystupać pad svaim ściaham i himnam», — adznačyŭ Litvinovič.
Akramia taho, u alimpijskaha čempijona spytali pra jaho prysutnaść na Hulniach u kantekście jaho raniejšaj padtrymki biełaruskaj dziaržavy, a ŭ pryvatnaści Alaksandra Łukašenki. Na hetaje pytańnie spartsmien adkazvać nie staŭ.
«Ja nie chaču adkazvać na hetyja pytańni. Vy zadajecie hetyja pytańni, kab spravakavać mianie. Ja budu adkazvać tolki na pytańni pra sport», — skazaŭ Litvinovič.
Ivan zavajavaŭ zołata ŭ skačkach na batucie na druhoj Alimpijadzie zapar. U 2021 hodzie jon padpisaŭ list u padtrymku Alaksandra Łukašenki, jaki byŭ spuščany ź Minsportu ŭ adkaz na list spartoŭcaŭ u padtrymku svabodnych vybaraŭ i suprać hvałtu.
Paśla pieramohi ŭ Tokia Litvinovič tłumačyŭ, što padpisaŭ list, bo «sport pavinien być pa-za palitykaj»:
«Ja nie pahłyblaŭsia ŭ hetuju temu. Tak, ja padpisvaŭ list. Padpisvaŭ, što sport pa-za palitykaj, ja zaŭsiody hetaha prytrymlivaŭsia. Što adbyvajecca, toje adbyvajecca. Mianie heta nie tyčycca, mianie heta nie zakranuła».
Ciapier čytajuć
«Čamu my pavinny niejak uščemlivać siabie?». Dyrektarka RTBD patłumačyła, čamu pastaviła śpiektakl pavodle Puškina ŭ adnym z apošnich teatraŭ krainy, jaki pracavaŭ pa-biełarusku5959
Kamientary