Va Ukrainie paćvierdzili: biełarus, jakoha vyšukvali ŭ Breście z 2022 hoda, maje status vajennapałonnaha
Va Ukrainie paćvierdzili, što biełarus, jaki ŭ traŭni trapiŭ va ŭkrainski pałon pad Vaŭčanskam Charkaŭskaj vobłaści, maje status vajennapałonnaha. Heta žychar Babrujska Jaŭhien Kamiańkoŭ, jakoha ŭ lipieni 2022 hoda ŭ Biełarusi abviaščali ŭ vyšuk paśla taho, jak jon razam z 13-hadovym padletkam uciok z bresckaha manastyra «Afanasija» ŭ Rasiju, piša «Radyjo Svaboda».
«Vajskoviec Kamiańkoŭ Jaŭhien Andrejevič, naradziŭsia 17 sakavika 1999 hoda, znachodzicca va Ukrainie ŭ statusie vajennapałonnaha», — adkazali «Radyjo Svaboda» ŭ prajekcie «Chaču znajści», stvoranym dla pieradačy svajakam infarmacyi ab vajennapałonnych, źnikłych bieź źviestak ci zahinułych rasijskich vajskoŭcaŭ.
Biełarus moža być uklučany ŭ śpis dla abmienu, kali jahonyja svajaki źviernucca da jahonaha rasijskaha kamandavańnia z adpaviednaj zajavaj.
U červieni 2024 hoda ŭkrainski prajekt «Šukaj svaich», jaki viadzie Uładzimir Zołkin, apublikavaŭ intervju z pałonnym vajskoŭcam rasijskaj armii. U im paviedamili tolki, što jaho zavuć Jaŭhien i jon maje biełaruskaje hramadzianstva.
U hetym intervju Jaŭhien Kamiańkoŭ raskazaŭ, što maje pryjomnych baćkoŭ, bratoŭ i siaścior, ź jakimi nie padtrymlivaje kantaktaŭ, apošni čas zajmaŭsia badziažnictvam, žyŭ u manastyrach. Pavodle adukacyi jon vieterynar. U pałon trapiŭ u vyniku ranieńnia ad padzieńnia drona.
Jaŭhien Kamiańkoŭ raskazaŭ, što ŭ škole vučyŭsia kiepska, cikaviŭsia mahijaj, bo chacieŭ vučycca dobra i mieć dobryja adnosiny ź ludźmi.
Biełarus taksama raskazaŭ, što pierabivaŭsia časovymi pracami, peŭny čas byŭ źviazany z cyhanami i prasiŭ dapamohu dla «dziaciej». Šmat jeździŭ u Rasiju, dzie taksama sprabavaŭ uładkavacca na pracu, ale zaŭsiody traplaŭ u historyi, kali jamu nie apłačvali pracu.
Z apošniaj pracy na cahlanym zavodzie ŭ Dahiestanie jon vymušany byŭ uciakać biez dakumientaŭ. Na adnym z pamiežnych pastoŭ jaho zatrymali dla vyśviatleńnia asoby. Adzin ź miascovych palicyjantaŭ paabiacaŭ jamu dapamahčy i prapanavaŭ pracu. Adnak potym, kali Jaŭhien vykraŭ u jaho paśviedčańnie, toj nibyta advioz jaho ŭ sud, jaki pastanaviŭ vydvaryć u Biełaruś.
Paśla hoda znachodžańnia ŭ izalatary Jaŭhien Kamiańkoŭ padpisaŭ kantrakt u «śpiecpryjomniku» ŭ kancy krasavika 2024 hoda — jamu paabiacali dobry zarobak i hramadzianstva Rasii.
Na terytoryju Ukrainy jaho pierakinuli ŭ traŭni 2024 hoda ŭ składzie 255-ha hvardziejskaha motastrałkovaha pałka Suchaputnych vojskaŭ Rasii, a praź niekalki tydniaŭ mužčyna trapiŭ u pałon. Jon śćviardžaje, što rasiejcy kidali jaho ŭ jamu bieź ciopłaha adzieńnia.
«U dalejšym ja b chacieŭ zastacca na terytoryi Ukrainy i nie viartacca na vajnu, tamu što toje, što jany robiać — heta varjactva. Chacieŭ by paprasić prabačeńnia ŭ ukrainskaha naroda, što ja pahadziŭsia na hetuju vajnu», — skazaŭ Jaŭhien u kancy razmovy.
Jon zaklikaŭ biełarusaŭ nie pahadžacca na ŭdzieł u vajnie suprać Ukrainy.
Va ŭkrainski pałon trapiŭ jašče adzin biełarus, jaki vajavaŭ u składzie rasijskaj armii
Ci realna abmianiać biełaruskich palitviaźniaŭ na rasijskich vajennapałonnych? Tłumačyć Kabančuk
Stali viadomyja abstaviny vyzvaleńnia ź biełaruskich turmaŭ hramadzian Ukrainy
Jak Ukraina vyzvalaje ź Biełarusi svaich. Tłumačeńnie ŭkrainskaha ekśpierta
Kamientary