U padkładańni vybuchoŭki ŭ pejdžary «Chiezbały» abvinavačvajecca «Masad»
Adnu ź viersij pra toje, z čym moh być źviazany masavy vybuch pejdžaraŭ u rukach i kišeniach členaŭ šyickaj hrupoŭki ź Livana «Chiezbała», vykłała vydańnie Sky News Arabia.
Paviedamlajecca, što ŭ pryładach členaŭ «Chiezbały» była zakładzienaja vybuchoŭka PETN (pientaerytryttetranitrat) — bieły parašok kryštaličnaha vyhladu, adčuvalny da ciapła i treńnia.
Heta dazvoliła dystancyjna pierahravać i padryvać lityjevyja batarei ŭnutry pryład. U kožnuju pryładu nibyta było zakładziena pa 20 hramaŭ vybuchoŭki.
Vybuchovaniebiaśpiečnaje rečyva nibyta pryviali ŭ dziejańnie dystancyjna, pavysiŭšy tempieraturu ŭ batarejach da 96 hradusaŭ Celsija.
«Chiezbała» ŭviała hetyja pryłady ŭ ekspłuatacyju 5 miesiacaŭ tamu. Raniej kiraŭnik arhanizacyi kazaŭ, što jaje členam nieabchodna pazbaŭlacca ad telefonaŭ, bo ich adsočvaje izrailskaja raźviedka. Ale pra zamovu pejdžaraŭ nibyta daviedalisia ŭ izrailskaj śpiecsłužbie «Masad», zapłanavali apieracyju i ŭzhadnili jaje ź izrailskim premjeram Bińjaminam Nietańjachu, členami jaho kabinieta i kiraŭnikami śpiecsłužbaŭ, paviedamlaje Axios sa spasyłkaj na krynicy.
Usio adbyłosia na nastupny dzień paśla taho, jak śpiecpradstaŭnik ZŠA naviedaŭ Izrail i papiaredziŭ Nietańjachu pra nastupstvy eskałacyi ŭ Livanie.
Pry hetym Dziarždepartamient ZŠA rašuča admaŭlaje svaju datyčnaść da hetaj ataki. Pres-sakratar viedamstva Mećju Miler zajaviŭ, što ZŠA nie datyčnyja da siońniašnich masavych vybuchaŭ pejdžaraŭ aktyvistaŭ «Chiezbały», i Vašynhton nie viedaje, chto moh heta zrabić.
Usiaho, pa apošnich źviestkach Ministerstva achovy zdaroŭja Livana, ranieńni ŭ vyniku apieracyi atrymali jak minimum 2750 čałaviek. Inšyja, nieaficyjnyja krynicy havorać i pra kala 4000 paciarpiełych (ź ich 400 ciažka paranienych), u tym liku členy kamandnaha składu hrupoŭki (nazyvajecca ličba 11 čałaviek). Paviedamlajecca, što jość jak minimum 9 zahinułych, siarod ich syn člena livanskaha parłamienta Ali Amara, paviedamlaje Reuters.
«Chiezbała» zajaviła, što rychtuje akcyju adpłaty. «My ličym izrailskaha voraha całkam adkaznym za hety złačynny napad, u vyniku jakoha paciarpieli mirnyja žychary», — havorycca ŭ zajavie hrupoŭki.
Asudziła sieryju vybuchaŭ pejdžaraŭ pa ŭsim Livanie i arhanizacyja CHAMAS, zajaviŭšy, što heta eskałacyja, jakaja pryviadzie Izrail tolki da «pravału i parazy».
Da hetych papiaredžańniaŭ staviacca surjozna. Prynamsi, avijakampanii Air France i Lufthansa užo zajavili pra admienu svaich najbližejšych rejsaŭ u Izrail. U svaju čarhu, CACHAŁ (izrailskaja armija) paviedamiła, što rychtujecca da adkazu «Chiezbały» za «ataku z vykarystańniem pejdžaraŭ», u krainie pavialičany ŭzrovień bojehatoŭnaści.
Tym časam ułady Livana źviarnulisia ŭ AAN z prośbaj pryciahnuć Izrail da adkaznaści. Ale pradstaŭnik AAN adznačyŭ, što arhanizacyja pakul nie vałodaje dastatkovaj infarmacyjaj pra vybuchi, choć i asudžaje hibiel mirnaha nasielnictva.
Ad vybuchu pejdžara «Chiezbały» paciarpieŭ pasoł Irana ŭ Livanie
Izrail pravioŭ kibierataku na členaŭ «Chiezbały». Pejdžary 1200 bajevikoŭ adnačasova ŭzarvalisia prosta ŭ kišeniach VIDEA
Sałaŭjoŭ śćviardžaje, što za vybuchi pejdžaraŭ u Livanie adkazny izrailski ahient «Machšyr Kiešer». Rahoča ŭvieś internet
Kamientary