Tak zvanyja jeŭradvuški i jeŭratroški ŭsio čaściej sustrakajucca na biełaruskim rynku novaha žytła, patrochi vyciskajučy kłasičnyja kvatery.
Žytło na zachodniejeŭrapiejski manier
Jeŭradvuški pryjšli da nas z krain Zachodniaj Jeŭropy. Tam kvatery takoha farmatu pačali źjaŭlacca jašče ŭ kancy 1970-ch. U Biełarusi jeŭrakvatery zabudoŭščyki pačali budavać tolki z 2010-ch.
Papiarednikami sučasnych jeŭradvušak i jeŭratrošak možna nazvać pieraroblenyja kvatery staroha typu, dzie ciesnyja kuchni haspadary złučali z haścioŭniami.
Abjadnańnie kuchonnaj zony z haścioŭniaj daje mahčymaść atrymać bolš prastornaje pamiaškańnie.
Tamu jeŭradvuški ci jeŭratroški kaštujuć tańniej, čym kłasičnyja kvatery, dzie kuchnia — heta asobnaje izalavanaje pamiaškańnie. Mienavita z-za cany taki farmat žytła stanovicca ŭsio bolš papularnym.
Što lepiej?
Što tyčycca zručnaści i praktyčnaści, tut niama adnaznačnaha adkazu, što lepš. Z adnaho boku, kuchnia-haścioŭnia daje mahčymaść sačyć za padrychtoŭkaj ježy z kanapy abo, naadvarot, hladzieć televizar ci słuchać muzyku z kuchonnaj zony. Heta taksama moža być zručna, kali vam adnačasova treba hatavać ježu i pryhladać za małym dziciom.
Ź inšaha boku, pach i šum ad hatavańnia raspaŭsiudžvajucca na haścioŭniu. I, badaj, samaje hałoŭnaje, što ŭ kvaterach jeŭrafarmatu na adno izalavanaje pamiaškańnie mienš, što asabliva adčuvalna, kali havorka idzie pra jeŭradvušku.
Ale, tym nie mienš, taki farmat kvater nabiraje papularnaść, asabliva ŭ bujnych haradach. U krainach Jeŭropy jeŭrakvatery amal całkam vycieśnili z rynku novabudoŭlaŭ kvatery z asobnymi kuchonnymi pakojami.
Papularnaść kvater jeŭrafarmatu taksama raście i ŭ Biełarusi.
Što z cenami?
Ceny na jeŭradvuški, naprykład, u novabudoŭlach Novaj Baravoj startujuć z 61 500 dalaraŭ za kvateru płoščaj kala 37 «kvadrataŭ». Takoje žytło składajecca sa spalni na 11 m² i kuchni-haścioŭni na 18 m².
Kali b na toj ža płoščy byli asobnyja haścioŭnia i kuchnia, to abodva pamiaškańni byli b vielmi małymi pa pamierach. Da taho ž, dadatkovyja, navat nie niasučyja ścieny, krychu źjadajuć prastoru. Tamu časta vybar na karyść jeŭrafarmatu — heta ŭ pieršuju čarhu ekanomija.
Dla paraŭnańnia, paŭnavartasnyja dvuchpakajovyja kvatery ŭ toj ža Novaj Baravoj majuć 54 kvadratnyja mietry i kaštujuć užo ad 87 tysiač dalaraŭ.
Pry hetym u niekatorych novych damach, jakija budujuć u Minsku, kłasičnych kvater užo nie isnuje. Adnak papularnaść jeŭrakvater raście nie tolki ŭ stalicy.
Tak, naprykład, navat u samym zvyčajnym 18-paviarchovym panelnym domie na ŭskrainie Hrodna 4 z 7 kvater na paviersie — heta ŭžo jeŭradvuški i jeŭratroški.
Kamientary