Palituciekača vyklikali ŭ polskuju prakuraturu pa zapycie Biełarusi. Što adbyvajecca?

Akramia lista ad prakuratury, Dźmitryj atrymaŭ paviedamleńnie ad biełaruskaha MUS z prapanovaj źviarnucca ŭ «kamisiju pa viartańni». Tam nazvanyja vosiem artykułaŭ, u jakich abvinavačvajuć mužčynu. Heta raspalvańnie varažniečy (art.130 č.1), masavyja biesparadki (art. 293 č. 3), arhanizacyja i padrychtoŭka dziejańniaŭ, jakija hruba parušajuć hramadski paradak, ci ŭdzieł u ich (art. 342 č. 1), zakliki da sankcyj (art. 361), stvareńnie ekstremisckaha farmavańnia (art. 361-1 č. 1), paklop na Łukašenku (art. 367 č. 1 i č. 2), źniavaha Łukašenki (art. 368), źniavaha pradstaŭnika ŭłady (art. 369).

Kiejs Pleskačova prakamientavała «Našaj Nivie» pravaabaronca Maryna Kasinierava, kaardynatarka inicyjatyvy dissidentby, jakaja zajmajecca hetaj situacyjaj. Pavodle jaje słovaŭ, hetaja historyja — pieršy publičny vypadak, kali da Polščy źviarnulisia z zapytam ekstradziravać pa palityčnych spravach biełarusaŭ sa statusam mižnarodnaj achovy:

«Dźmitryj maje status dadatkovaj achovy i padaŭ usie nieabchodnyja dakumienty na etapie atrymańnia statusu. I kali polskaja dziaržava jaho nadaje, značyć jana paćviardžaje jaho pieraśled u Biełarusi i niebiaśpieku jaho znachodžańnia tam. 

Tamu pytańnie ŭžo da Polščy, jak jany mohuć i jak buduć rabić svaje miechanizmy bolš efiektyŭnymi pry praviercy takich zapytaŭ z boku takich dziaržavaŭ jak Biełaruś, jakija mohuć vykarystoŭvać hetyja instrumienty mižnarodnaj supracy ŭ miežach palityčnaha cisku. Supraca [pamiž dziaržavami] na hetym uzroŭni dazvalaje vyjaŭlać narkatrafik, handal ludźmi i inšyja złačynstvy, ale kožnaja kraina, u tym liku Polšča, musić znajści šlach, kab filtravać takija zapyty».

Maryna tłumačyć, što navat u Polščy, dzie žyvie bahata biełaruskich palituciekačoŭ, nie daskanała viedajuć, što adbyvajecca ŭ Biełarusi.

Tamu polskaja biurakratyja moža niepavarotliva reahavać na sproby biełaruskaj dziaržavy pieraśledvać biełarusaŭ navat za miežami krainy i praz heta ładzić farmalnyja pravierki zapytu.

Pravaabaronca kaža, što takija farmalnaści ŭ dačynieńni da biełarusaŭ, jakija zaznali palityčny pieraśled, mohuć vyhladać davoli žorstka:

«U takich historyjach šmat niepryjemnych momantaŭ, adzin ź jakich, naprykład, maniera pracy miascovych siłavikoŭ. Ludzi naŭprost iduć pa miescy žycharstva čałavieka, nie ŭ formie, apytvajuć susiedziaŭ i h.d. Heta, naturalna, moža stać tryhieram dla čałavieka, jaki pieražyŭ traŭmatyčny dośvied pieraśledu ŭ svajoj krainie.

Tamu my [pravaabaroncy] i sprabujem reahavać na takija vypadki jak maha bolš apieratyŭna, źbirajučy nieabchodnyja dakumienty, šukajučy jurystaŭ i źviartajučysia da niezaležnych ŚMI».

U prakuratury Dźmitryj daviedaŭsia, što ŭ jahonaj spravie 23 epizody. Prykładna praz try tydni projdzie sud, jaki vyrašyć, ci reahavać na zapyt biełaruskich uładaŭ ab ekstradycyi.

• 2
• 0
• 1
• 20
• 7
• 2
• 13
• 0