Maci maładafrontaŭcaŭ adkazvajuć S.Siemieniuku i V.Radźku
V.Radźko ci S.Siemianiuk (№28, 31) zakranajuć Prahramu K.Kalinoŭskaha i dziejnaść Hramadzkaha kamitetu abarony represavanych. Chaj by jany pahladzieli nam, maci, u vočy i spytali, ci chočam my svaich synoŭ addavać u turmu, jak «partnercaŭ», ci na «chimiju»?
Jany viedajuć, kolki nam, matulam, babulam hipertanijaŭ i stenakardyjaŭ kaštujuć hetyja kryminalnyja spravy? Ci chočam my našych darahich, razumnych, talenavitych, natchnionych chłopčykaŭ i dziaŭčat addavać u žerła hetaj nienasytnaj represiŭnaj mašyny, zaviedzienaj jašče sa stalinskich časoŭ? Ci možam my z hetym źmirycca?
Voś tamu sabralisia baćki jašče ŭ sakaviku pad ścienami Akreścina, zhurtavalisia, kab abaranić dziaciej, lepšuju moładź, padumać, što my možam razam zrabić. Tak paŭstaŭ Kamitet. Druhija baćki sabralisia ŭ Žodzina la muroŭ viaźnicy. Baćki zarhanizavalisia, ich inicyjatyvu padtrymali lidery demakratyčnaj apazycyi. Dziakujučy svajmu aŭtarytetu u Eŭropie, Ina Kulej i Alaksandar Milinkievič damahlisia atrymać stypendyi i dla biełaruskich junakoŭ i padpisali pahadnieńnie z polskim uradam. Heta my prymajem niečakanyja padarunki suśvietnaj salidarnaści, a nie dyktujem zamiežnym krainam: zrabicie nam tak, ci tak. Palaki całkam prapanavali svaju prahramu: kursy movy, znajomstva z krainaj, dzionnaje navučańnie. My hetyja ŭmovy pryniali z udziačnaściu. My nia možam naviazvać svaje patrabavańni: zrabicie nam zavočnaje adździaleńnie. Jość Ukraina, EHU – kali łaska, zavočnaje. 230 čałaviek – heta zusim nia mnoha, prosta maleńkaja škołka, Biełaruś ničoha nie hublaje, junaki i tam u Eŭropie buduć pracavać na karyść Radzimie, jak heta dobra zrazumieŭ P.Sieviaryniec.
Kali łaska, nie drukujcie plotak ci abstraktnych razvahaŭ, tak prosim my vas, baćki.
Niachaj toj, chto razvažaje, pravilna ci niapravilna robicca, pryjdzie ŭ Kamitet i skaža: 1) Čym ja mahu dapamahčy? 2) Dajcie mnie adrasy viaźniaŭ i ich siemjaŭ, ja napišu listy, zrablu pasyłki.
Dumka pra kantrol nad Kamitetam zusim zdajecca abraźlivaj i bluźnierskaj. U Kamitet uvachodziać pradstaŭniki «Viasny», AHP, ZBS i inšych hramadzkich arhanizacyjaŭ, i baćki. Usie rašeńni prymalisia kalehijalna, i adbor byŭ davoli strohi.
Kažučy pra kantrol, možna pryjści da takoj dumki, jak było z Maryničam: byccam jon sam u siabie skraŭ kamputary. Heta prosta ździek.
Moža, Vy prakantralujecie, kolki svajoj dušy hetyja žančyny addali našym dzieciam, kolki pieradač zanieśli ŭ viaźnicu, kolki svajho zdaroŭja addali, maroziačysia i sustrakajučy ŭnačy z Akreścina?
Kamientary