Małdaŭskich vybarščykaŭ z Rasii viazuć hałasavać u Minsk aŭtobusami i samalotam
Rasijskija i biełaruskija ŚMI masava publikujuć kadry z hramadzianami Małdovy, jakija prybyvajuć z Rasii ŭ Minsk i Baku dla hałasavańnia ŭ druhim tury prezidenckich vybaraŭ svajoj krainy, źviarnuŭ uvahu Reform.news.
Prapahandysty zajaŭlajuć, što ludzi pryjechali i prylacieli «za svoj košt» i hetaje rašeńnie «vymušanaje», vyklikanaje «deficytam» vybarčych učastkaŭ u RF. Ludzi, jakija prybyli, śćviardžajuć, što aścierahalisia niedachopu biuluteniaŭ u Maskvie. Adna z žančyn kaža, što 3-4 aŭtobusy naniała dyjaspara.
«Učora ŭviečary hramadzianie Małdovy, jakija znachodziacca ŭ Maskvie i inšych rehijonach Rasii, adpravilisia za svoj košt u Baku, Minsk i Kišynioŭ, kab addać svaje hałasy. Heta vymušanaje rašeńnie — adkaz na biezzakońnie z boku dziejnych uładaŭ Małdovy, jakija adkryli tolki dva vybarčyja ŭčastki ŭ Rasii. Hetyja ŭčastki nie zmohuć źmiaścić usich achvotnych prahałasavać», — piša ahientcva «Minsk-Naviny».
«Sputnik Biełaruś» publikuje kadry z sałona samalota ź ludźmi, jakija demanstrujuć na kamieru pašparty Małdovy.
«Da žycharoŭ Małdovy, jakija žyvuć u Biełarusi i pryjechali z Kurska, jakija stajać u čarzie pierad ambasadaj Respubliki ŭ Minsku, z Maskvy vylatajuć sotni suhramadzian, jakim niama dzie hałasavać», — takim kamientarom supravadžajecca videa.
«Kala ambasady pastavili fud-kort i ŭklučyli narodnuju muzyku, — piša resurs. — Sahrecca la ambasady ludziam prapanujuć aktyvisty BRSM, jakija razdajuć haračuju harbatu i piražki».
Pavodle infarmacyi «Minsk-Navin» na 10:20 u čarzie kala ambasady stajali «kala 200 čałaviek». Paviedamlałasia, što ludzi pryjechali z Maskvy, Kalininhrada, Kurskaj i Biełharodskaj abłaściej Rasii.
Niekatoryja prybyli ŭ Minsk ź dziećmi.
«My pryjechali na troch aŭtobusach — u kožnym kala 50 čałaviek», — raskazali Alina i Neli.
Dla hałasavańnia ŭ Minsku nadrukavana 2 tysiačy biuleteniaŭ, u Maskvie — 10 tysiač.
U Baku i ŭ Minsku adkryta pa adnym vybarčym učastku ŭ budynkach pasolstvaŭ Małdovy. U Rasii pracujuć dva ŭčastki — u budynku pasolstva Małdovy ŭ Maskvie.
NewsMaker.md źviarnuŭsia pa kamientar ab stanoviščy na vybarčych učastkach u Minsku i Baku ŭ MZS Małdovy.
«My vitajem rost cikavaści vybarščykaŭ za miežami krainy da siońniašnich vybaraŭ. Supracoŭniki vybarčych učastkaŭ kirujuć situacyjaj u adpaviednaści z normami», — zajaviła pres-sakratar MZS Lilijana Barbarošy.
Padčas pieršaha tura prezidenckich vybaraŭ u Małdovie rasijskija resursy publikavali kadry z čerhami da vybarčych učastkaŭ u Maskvie. Ministerstva zamiežnych spraŭ Małdovy zajaviła, što jany byli stvoranyja štučna z dapamohaj «sprobaŭ niezakonnaj arhanizacyi pieravozki vybarščykaŭ da vybarčych učastkaŭ».
«U pracesie padrychtoŭki da vybaraŭ my źviarnuli ŭvahu rasijskich uładaŭ na sproby niekatorych arhanizacyj arhanizavana dastaŭlać hramadzian da vybarčych učastkaŭ u našaj ambasadzie ŭ Maskvie. Takim čynam, my ličym, što čerhi na dvuch vybarčych učastkach u Rasii byli stvoranyja štučna z metaj pieraškodzić vybarčamu pracesu. U suviazi z hetym my znoŭ źviartajem uvahu rasijskich uładaŭ i lubych arhanizacyj na niedapuščalnaść niezakonnaj transparciroŭki vybarščykaŭ da ŭčastkaŭ», — padkreślivali ŭ MZS.
«Adznačajem, što ŭčastki ŭ Maskvie zabiaśpiečanyja maksimalnaj kolkaściu vybarčych biuleteniaŭ — 5000 dla kožnaha ŭčastka. Rašeńnie adkryć vybarčyja ŭčastki ŭ Rasijskaj Fiederacyi tolki ŭ budynku ambasady było pryniata z-za niemahčymaści zabiaśpiečyć u inšych haradach i miescach usie patrabavańni biaśpieki, kab harantavać adsutnaść pahroz dla našych hramadzian, jakija pryjduć hałasavać, i dla rabotnikaŭ vybarčych kamisij, jakija zabiaśpiečvajuć arhanizacyju pracesu», — dadali ŭ viedamstvie.
Siońnia ŭ Małdovie prachodzić druhi tur prezidenckich vybaraŭ. Kandydatami vystupajuć dziejny prezident Maja Sandu i były hienieralny prakuror Małdovy Alaksandr Stajanohła.
«Hałandski architektar», jaki adbudavaŭ Vostruju bramu i pastaviŭ sabie dom-krepaść u Hajciuniškach, akazaŭsia nijakim nie hałandcam. Ale jaho spadčyna zachaplaje1010
Kamientary