Ličycca, što mahnij dapamahaje pry mihreniach, depresii, vysokim kryvianym cisku, prablemach sa snom. Ale nakolki heta navukova dakazana i čym moža być niebiaśpiečny niekantralavany pryjom hetaha mikraelemientu?
Mahnij — žyćciova važny elemient, jaki znachodzicca va ŭsich tkankach arhanizma i nieabchodny dla narmalnaha funkcyjanavańnia kletak. Jon udzielničaje ŭ bolšaści reakcyj abmienu rečyvaŭ, u rehulacyi pieradačy niervovych impulsaŭ i ŭ skaračeńni myšcaŭ. Mahnij taksama praduchilaje spazmy i sadziejničaje krovazvarotu. Aksid i soli mahniju tradycyjna ŭžyvajucca ŭ miedycynie ŭ kardyjałohii, nieŭrałohii i hastraenterałohii.
Deficyt mahniju nazirajecca pry arteryjalnaj hipiertenzii, išemičnaj chvarobie serca, cukrovym dyjabiecie, insulcie, sardečnaj niedastatkovaści. Jaho rańnimi prykmietami źjaŭlajecca młosnaść, ahulnaja stomlenaść, strata apietytu.
Dokazy efiektyŭnaści
Jak piša The New York Times, vyniki asobnych dastatkova abmiežavanych daśledavańniaŭ śviedčać pra stanoŭčy efiekt pryjomu mahniju pry peŭnych stanach.
Tak, niekalki nievialikich kliničnych daśledavańniaŭ zaśviedčyli, što rehularny pryjom hetaha minierału (kala 600 mh u dzień) moža dapamahčy źnizić častatu hałaŭnych bolaŭ pry mihreniach.
Niekalki daśledavańniaŭ, u jakich uziali ŭdzieł 151 čałaviek va ŭzroście ad 50 hadoŭ i starejšych, prademanstravali, što tyja ź ich, chto prymaŭ ad 320 da 729 milihramaŭ mahniju ŭ dzień, zasynali prykładna na 17 chvilin chutčej za tych, chto prymaŭ płaceba. Adnak niezrazumieła, ci paŭpłyvaŭ hety minierał na jakaść snu i jaho praciahłaść.
Ahlady vynikaŭ siami nievialikich kliničnych vyprabavańniaŭ 2023 hoda i daśledavańniaŭ, praviedzienych u 2024 hodzie, pakazali, što dabaŭki mahniju mohuć pamienšyć simptomy depresii i tryvožnaści.
Inšyja karotkaterminovyja daśledavańni pakazali, što mahnij zdolny źnižać kryviany cisk u ludziej z hipiertanijaj, a ŭ ludziej z dyjabietam 2 typu jon moža dapamahčy źnizić uzrovień cukru ŭ kryvi i pakazčyki rezistentnaści da insulinu.
Adnak, niahledziačy na hetyja patencyjnyja pieravahi, niedastatkova danych, kab śćviardžać, što mahnij moža praduchilić takija zachvorvańni, jak dyjabiet ci sardečna-sasudzistyja chvaroby.
Vysnovy, atrymanyja padčas dvuch inšych nievialikich karotkaterminovych daśledavańniaŭ, dazvolili ekśpiertam u 2023 hodzie zajavić, što dabaŭki mahniju mohuć dapamahčy pry chraničnych zaporach.
Śpiecyjalisty źviartajuć uvahu na toje, što ŭsie stanoŭčyja efiekty byli zaŭvažnyja pry praviadzieńni dastatkova abmiežavanych pa kolkaści ŭdzielnikaŭ i časie daśledavańniaŭ. Heta nie dazvalaje z poŭnaj upeŭnienaściu rekamiendavać dabaŭki z mahnijem jak efiektyŭny srodak u praduchileńni roznych parušeńniaŭ zdaroŭja ci ich prafiłaktyki.
Čym niebiaśpiečnyja dabaŭki z mahnijem
Kali ž vy ŭsio ž taki ličycie, što lepš prymać dabaŭki z mahnijem, to śpiecyjalisty źviartajuć uvahu, što niekatoryja ź ich (aksid mahniju, chłaryd mahniju, hlukanat mahniju, sulfat mahniju) mohuć vyklikać niepryjemnyja pabočnyja efiekty: panos, vanitavańnie, spazmy ŭ žyvacie.
Daktary taksama źviartajuć uvahu, što dabaŭki z mahnijem mohuć pieraškadžać pryjomu niekatorych lekaŭ, u tym liku antybijotykaŭ i srodkaŭ ad osteaparozu. A bolš vysokija dozy mohuć być niebiaśpiečnymi dla ludziej z chvarobami nyrak.
Tamu pierad pačatkam pryjomu dabavak z mahnijem (jak i inšych bijadabavak) lepš za ŭsio prakansultavacca z doktaram.
Pa słovach ekśpiertaŭ, značna lepš za pryjom dabavak z mahnijem — prosta raznastajna jeści. Mnoha mahniju ŭ arechach, harbuzovym nasieńni, kunžucie, nasieńni lonu, listavoj zielaninie, babach, celnaziernievych praduktach.
Kamientary