Brytanskija kampanii masava pierachodziać na čatyrochdzionku biez straty zarobku
200 kampanij u Vialikabrytanii pierajšli na čatyrochdzionny pracoŭny tydzień na pastajannaj asnovie, zachoŭvajučy pry hetym poŭny zarobak dla svaich supracoŭnikaŭ. U hetych kampanijach pracuje bolš za 5 tysiač čałaviek, piša Devby.io.
Vydańnie The Independent paviedamlaje, što taki hrafik pracy vybirajuć niekamiercyjnyja arhanizacyi i technałahičnyja kampanii, a taksama firmy z kreatyŭnych halin, mašynabudavańnie, rekrutynh i kiravańnie piersanałam, buchhałteryja, banki, finansy, handal i budaŭnictva.
Prychilniki čatyrochdzionnaha pracoŭnaha tydnia śćviardžajuć, što piacidzionny pracoŭny tydzień sastareŭ. Na dumku kiraŭnika kampanii fondu čatyrochdzionnaha pracoŭnaha tydnia (4 Day Week Foundation) Džo Rajła, čatyrochdzionny pracoŭny tydzień z pavieličeńniem volnaha času na 50% daje ludziam mahčymaść vieści bolš ščaślivaje i paŭnavartasnaje žyćcio.
Pavodle apytańnia, kala 6% pracaŭnikoŭ na poŭnuju staŭku ŭ Vialikabrytanii ŭžo pracujuć pa novym hrafiku čatyry razy na tydzień. 58% nasielnictva ličać, što trochdzionnyja vychodnyja stanuć «narmalnym farmatam pracy» ŭ 2030 hodzie, i tolki 22% nie vierać u heta. Fond čatyrochdzionnaha pracoŭnaha tydnia płanuje pravieści jak minimum try novyja piłotnyja prajekty pa ŭkaranieńni čatyrochdzionnaha tydnia ŭ 2025 hodzie.
Niahledziačy na ŭsio bolšuju papularnaść, hety kulturny zruch vyklikaje sprečki. Kansiervatary papiaredžvajuć, što takaja praktyka zapavolić ekanamičny rost. Zhodna z zakanadaŭstvam, supracoŭniki majuć prava zapytać hnutki hrafik pracy, ale pracadaŭcy nie abaviazanyja zhadžacca na heta. Urad taksama zajaviŭ, što ŭ jaho «niama płanaŭ» abaviazvać kampanii pierachodzić na čatyrochdzionny pracoŭny tydzień.
Ciapier čytajuć
Što viadoma pra Maksima Palanskaha i Mikałaja Śvirydava — biełaruskich alpinistaŭ, jakija źnikli ŭ harach Kyrhyzstana2
Kamientary