Da 2027 hoda štučny intelekt moža dasiahnuć uzroŭniu «krainy hienijaŭ». Što majecca na ŭvazie?
Kiraŭnik kampanii, jakoj naležyć papularny čat-bot Claude, prahnazuje, što čakać ad štučnaha intelektu ŭ nastupnyja dva hady.
Štučny intelekt (ŠI) zdolny dasiahnuć uzroŭniu «krainy hienijaŭ» užo ŭ pieryjad 2026—2027 hadoŭ, papiaredžvaje amierykanski pradprymalnik Daryjo Amadei, hienieralny dyrektar kampanii Anthropic, čyj čat-bot Claude napramuju kankuryruje z papularnym ChatGPT ad kampanii Open AI.
Uzrovień «krainy hienijaŭ», pra jaki havoryć hiendyrektar Anthropic, aznačaje, što štučny intelekt zmoža vałodać kalektyŭnym intelektualnym patencyjałam, paraŭnalnym z mahčymaściami vielmi talenavitaj i razumnaj hrupy ludziej na ŭzroŭni cełaj krainy. Heta nie prosta asobnyja zdolnaści ŠI da analizu, raźlikaŭ ci aŭtamatyzacyi pracesaŭ čałaviečaj žyćciadziejnaści, ale i mahčymaść prymać kompleksnyja rašeńni i raspracoŭvać novyja idei ŭ maštabach, jakija raniej byli dasiažnyja tolki kvalifikavanaj čałaviečaj supolnaści.
Inšymi słovami, taki ŠI budzie mieć značna šyrejšy śpiektr zdolnaściaŭ: ad vynachodnictva novych technałohij da raspracoŭki stratehij u samych roznych halinach, jak heta rabiła b vielmi raźvitaja intelektualnaja elita asobnaj krainy.
Heta značyć, što ŠI moža stać samadastatkovaj siłaj i pryvieści da kardynalnych źmien u ekanomicy, palitycy i inšych śfierach, što stvaraje surjoznyja ryzyki dla isnujučych sistem kantrolu, adznačaje Amadei.
Pradprymalnik nazvaŭ try krytyčnyja zadačy, jakija stajać pierad čałaviectvam u kantekście raźvićcia ŠI: zabieśpiačeńnie lidarstva ŭ halinie demakratyčnych dziaržaŭ, lepšaje kiravańnie ryzykami biaśpieki i padrychtoŭka da ekanamičnych zruchaŭ, jakija mohuć spravakavać supierintelektualnyja niejrasietki (naprykład, ryzyka tatalnaha biespracoŭja ŭ śviecie).
Na fonie hetaha Amadei vykazaŭ rezkuju krytyku ŭ adras niadaŭniaha samitu pa pytańniach ŠI ŭ Paryžy, nazvaŭšy jaho «stračanaj mahčymaściu». Na im krainy Jeŭrasajuza nastojvali na žorstkich miechanizmach kantrolu ŠI, a pradstaŭniki ZŠA i Vialikabrytanii admovilisia padpisać ahulny płan rehulavańnia haliny, paličyŭšy jeŭrapiejskija inicyjatyvy «masiŭnymi» i «zadušlivymi» dla raźvićcia technałohij.
Na dumku Amadei, admova ad bolš efiektyŭnych mier kantrolu nad sistemami ŠI na karyść imklivaha rostu prybytku ad ich ekspłuatavańnia pryviadzie da taho, što čałaviectva ŭvohule nie zmoža kantralavać halinu, a aŭtarytarnyja krainy atrymajuć jašče bolš daskanałyja sistemy štučnaha intelektu i vykarystajuć ich dla daminavańnia ŭ śviecie.
Kamientary