Sioleta pačnuć zabudoŭvać učastak na rahu praśpiekta Niezaležnaści i Vałhahradskaj
Terytoryju, jakuju zaraz zajmaje elektramiechaničny zavod «Ahat», abiacajuć pačać zabudoŭvać šmatpaviarchovikami ŭžo sioleta. Učastak płoščaj 11 hiektaraŭ, raźmieščany kala stancyi mietro «Maskoŭskaja», horadabudaŭniki adznačyli jašče vosiem hadoŭ tamu. Tady hetuju placoŭku z kapitalnymi budynkami sprabavali pradać praz aŭkcyjon, prosiačy za jaje bolš za 5 miljonaŭ dalaraŭ. Ale ź inviestarami nie skłałasia, piša Onliner.by
Pra «załatyja» ziemli (aficyjny adras vytvorčaści — Niezaležnaści, 115, a da ŭvachodu ŭ mietro mienš za 300 mietraŭ) uzhadali ŭ krasaviku 2023 hoda, pradstaviŭšy ceły płan raźvićcia terytoryi.
Pavodle zadumki prajektantaŭ, uzdoŭž praśpiekta Niezaležnaści źjaviacca dziesiacipaviarchovyja damy pa indyvidualnych prajektach.
U kvartale, jaki abmiežavany vulicaj Kiedyški, hramadskaj zabudovaj na Vałhahradskaj, žyłymi damami na praśpiekcie Niezaležnaści i vytvorčaj zonaj, płanujecca ŭźvieści dzieviać šmatpaviarchovikaŭ na 1180 kvater.
«Damy pavinny być nie typavych sieryj, a pa indyvidualnych prajektach. Taksama spatrebiacca dziciačy sad, hramadskija abjekty i šmatuzroŭnievyja parkinhi. U kancepcyi praduhledžanyja zakrytyja i paŭzakrytyja hrupy šmatkvaternych damoŭ z dvarami biez mašyn. Taki pryncyp dazvolić abaranić dvary ad šumu i škodnych vykidaŭ z mahistralaŭ», — adznačali raspracoŭščyki prajekta.
Jany taksama dadavali, što ŭzdoŭž vulic Vałhahradskaj i Kiedyški pabudujuć damy, pieršyja pavierchi jakich buduć addadzienyja pad kramy, majsterni i inšyja nieabchodnyja abjekty.
Akramia taho, praz kvartał projdzie piešachodnaja darožka da mietro.
Da realizacyi prajekta zastajecca zusim mała času (pa horadabudaŭničych mierkach, viadoma).
Jak paviedamiŭ u efiry prahramy «Havoryć i pakazvaje Minsk» kiraŭnik administracyi Pieršamajskaha rajona Vadzim Pieradnia, za terytoryju voźmucca ŭžo sioleta.
«Sioleta pačynajem budaŭnictva žyłoha kompleksu na terytoryi zavoda «Ahat». Vulica Vałhahradskaja budzie pieraŭtvorana. Heta ŭsio dla tych, chto maje patrebu ŭ palapšeńni žyllovych umoŭ. Dziaržaŭnyja zabudoŭščyki realizujuć kancepcyju», — adznačyŭ kiraŭnik rajona, majučy na ŭvazie nie tolki kankretnuju zabudovu na miescy zavoda, ale i inšyja haradskija prajekty UKSaŭ pa vulicy Vałhahradskaj.
Ciapier čytajuć
Suśvietnaja zorka Džejsan Deruła zajechaŭ u Biełaruś. Premjer Turčyn vadziŭ jaho pa Domie ŭrada6
Kamientary