«Adnojčy śviakroŭ vykinuła moj fałaimitatar». Biełaruska raskazała, jak sprabuje zachavać intymnaje žyćcio, žyvučy z baćkami

Maryna (imia źmieniena) raspaviadaje, što pieršy hod paśla viasiella jany z mužam sprabavali zdymać kvateru. Kali padličyli, kolki addali «čužoj ciotcy», stała błaha. Žančyna kaža, što rašeńnie dałosia ciažka, ale jany z mužam vyrašyli pierajechać da jaho baćkoŭ. Spadziavalisia, što tak atrymajecca chutčej naźbirać na ŭłasnuju kvateru.

— U śviokra sa śviakroŭju davoli vialikaja kvatera, plus z krasavika pa vierasień jany amal usie vychodnyja pravodziać na leciščy. To-bok ja była ŭpeŭniena, što asablivych prablem nie budzie.

Spačatku Maryna była vielmi zadavolena sumiesnym žyćciom z baćkami muža. Kaža, što śviakroŭ uziała na siabie usie pobytavyja pytańni.

— Ja nie z tych žančyn, kamu pryncypova samoj hatavać. Prychodžu z pracy takaja stomlenaja, što vielmi ŭdziačnaja, kali jość što pajeści. Prybirałasia śviakroŭ taksama sama. Machała rukami, kali my z mužam sprabavali niešta zrabić — kazała: «Adpačnicie lepš, schadzicie kudy-niebudź».

Ale ŭ hetaj dapamohi znajšoŭsia i inšy bok:

— Śviakroŭ lezła navodzić paradak navat u našu šafu — nie, viadoma, cudoŭna, kali ŭsio akuratna raźviešana i staranna raskładziena. Ale niajomka siabie adčuvaješ, kali bačyš, što eratyčny kaścium miedsiastry, jaki ty nadziavała nočču, z tumbački la łožka pieramiaściŭsia na viešałku ŭ šafu.

Maryna sprabavała ščyra pahavaryć z mamaj muža i prasiła pakinuć joj choć niejkuju asabistuju prastoru. Taja byccam by pahadžałasia, chacia i kazała: «Božački, nu mnie ž nie 15 hadoŭ, ja ŭsio razumieju. Niama pra što tut razmaŭlać». Ale ŭžo na nastupnym tydni historyja paŭtarałasia znoŭ.

— Zatoje siabroŭka mnie padkazała łajfchak, jak chavać zmazki — ja ich akuratna staviła ŭ svaju kaśmietyku (a kremaŭ roznych u mianie šmat). Śviakroŭ kaśmietykaj nie cikaviłasia, tamu navat kali b vyrašyła tam navieści paradak, to naŭrad ci stała b čytać, što napisana na ciubikach.

Žančyna kaža, što bolš za ŭsio chvalavałasia pra toje, što śviakroŭ moža znajści ich z mužam seks-cacki.

— Adnojčy jana vykinuła moj fałaimitatar, bo vielmi pakryŭdziłasia za syna. Potym stała chvalavacca i leźci z dušeŭnymi razmovami i da jaho, i da mianie.

U vyniku maładyja znoŭ pierabralisia na kvateru. Ale pakolki dastatkova hrošaj nazapasić nie paśpieli, vyrašyli znoŭ pierajechać da baćkoŭ — na hety raz da baćkoŭ Maryny.

— Tam, viadoma, umovy byli ściplejšyja — u kvatery ŭsiaho dva pakoi. Ale pakul nas było ŭsiaho čaćviora, usio było bolš-mienš narmalna.

Žančyna kaža, što naładzić intymnaje žyćcio ŭ takich umovach było nie vielmi prosta.

— Maje baćki kładucca spać davoli pozna. Televizar hladziać, čytajuć. Tata lubić pa piać razoŭ biehać na kuchniu pa harbatu. Ja nie mahła prosta rassłabicca, kali čuła kroki ŭ kalidory. Bajałasia, što raptam łožak pačnie rypieć.

U vyniku prablemu z łožkam vyrašyli prosta:

— My stali zajmacca seksam na padłozie — ad jaje ŭsio ž padstaŭ nie čakaješ. Darečy, liču heta hodnym łajfchakam — daju takuju paradu ŭsim siabroŭkam, jakija taksama vymušany časova niejak arhanizoŭvać intym u baćkoŭskaj kvatery.

Ale ž ciapier situacyja ŭskładniłasia: u Maryny z mužam jość dzicia, tamu vykarystoŭvać svoj pakoj dla intymu jany bolš nie mohuć. Žančyna kaža, što jany sprabavali damovicca z baćkami, kab dačka spała ŭ pakoi z babulaj i dziadulem. Ale tyja kateharyčna admovilisia. Skazali, nie chočuć pieratvarać svoj pakoj u dziciačy.

— Tamu spačatku my pačali zakryvacca ŭ vańnie. Darečy, tam vada dapamahaje chavać niekatory šum. A paśla my vyrašyli dapracavać kuchniu — dobra, što jaje pamiery dazvalajuć. My nabyli tudy narmalnuju kanapu, a taksama pastavili ŭ dźviery zamok. Ale ž, viadoma, ciapier prychodzicca čakać, kali ŭsie ŭ domie narešcie zasnuć.

Tym, chto choča zachavać paŭnavartasnaje intymnaje žyćcio pobač z baćkami, Maryna raić nie lenavacca.

— My z mužam damovilisia, što vykarystoŭvajem lubuju mahčymaść. Navat u tych vypadkach, kali maje baćki z unučkaj syšli ŭ kramu litaralna na 15 chvilin.

• 5
• 1
• 10
• 7
• 0
• 6
• 0
• 1