Ukrainski ŭłaśnik biełaruskaha sudna bolš za hod nie moža jaho zarehistravać
Biełaruskaje sudna «Nadzieja» pabudavali ŭ 2002 hodzie ŭ Homieli. Da pačatku poŭnamaštabnaj vajny Rasii suprać Ukrainy ŭ 2022 hodzie jano absłuhoŭvała Rasiju va ŭkrainskich vodach. Jaho aryštavali paśla padtrymki Biełaruśsiu rasijskaha vajennaha ŭvarvańnia, ale, jak stała viadoma «Radyjo Svaboda», ukrainskaja kampanija, jakaja nabyła sudna na aŭkcyjonie 5 lutaha 2024 hoda, dahetul nie moža jaho zarehistravać, bo ŭ rejestrach jano ŭsio jašče ličycca biełaruskim.
Dziaržaŭnaja słužba marskoha i ŭnutranaha vodnaha transpartu i sudnachodstva Ukrainy admoviła novamu ŭłaśniku ŭ rehistracyi, pakolki ŭ dakumientach adsutničała paćviardžeńnie straty prava płavańnia pad dziaržaŭnym ściaham Biełarusi i skasavańnia adpaviednaha zapisu ŭ Dziaržaŭnym sudnavym rejestry Biełarusi.
Dla kamunikacyi ź Dziaržaŭnaj administracyjaj vodnaha transpartu Biełarusi ab nieabchodnaści skasavańnia zapisu i paćviardžeńnia straty prava płavańnia sudna pad ściaham Biełarusi ŭkrainskaja kampanija skarystałasia pasłuhami małdaŭskaha advakackaha biuro Diaciuc Gabriel law office. Biełaruski bok atrymaŭ hety zvarot, ale ničoha na jaho nie adkazaŭ.
Pa abaronu svaich pravoŭ novy ŭłaśnik biełaruskaha sudna źviarnuŭsia ŭ sud, jaki abaviazaŭ Dziaržaŭnuju słužbu marskoha i ŭnutranaha vodnaha transpartu i sudnachodstva Ukrainy vykanać usie farmalnaści, źviazanyja ź pieraafarmleńniem biełaruskaha sudna.
Što papiaredničała
U krasaviku 2022 hoda Dziaržaŭnaje biuro rasśledavańniaŭ Ukrainy zajaviła ab aryšcie i pačatku pracesu nacyjanalizacyi biełaruskaha sudna «Nadzieja» i suchahruznaj baržy, jakija znachodzilisia ŭ akvatoryi Izmailskaha portu na Adesčynie i vykonvali apieracyi dla Rasii ŭ terytaryjalnych vodach Ukrainy.
Biełaruskaje sudna pieradali ŭ kiravańnie Ahienctvu vyšuku i mieniedžmientu aktyvaŭ (ARMA), a ŭ Adeskuju abłasnuju administracyju — dakumienty ab mahčymaj nacyjanalizacyi.
Na prodaž sudna vystavili 5 studzienia 2024 hoda, a aŭkcyjon zaviaršyŭsia 5 lutaha taho ž hoda.
Viadoma, što startavaja cana biełaruskaha sudna była vyznačanaja na ŭzroŭni 1,17 miljona hryŭniaŭ (na momant praviadzieńnia aŭkcyjonu heta składała pryblizna 31 150 dalaraŭ u ekvivalencie) z krokam u 11 706 hryŭniaŭ (311 dalaraŭ u ekvivalencie).
Na nabyćcio biełaruskaha sudna pretendavali 7 udzielnikaŭ — try fizičnyja asoby i čatyry kampanii, ale čatyry ź ich nie byli dapuščanyja da aŭkcyjonu praz toje, što jany nie apłacili harantyjny ŭniosak. Aproč «Ńjuenierdžy» na sudna pretendavali TAA «Nadziejnaja transpartnaja kampanija» i TAA «Prezident Trevieł».
Kančatkovaja cana, za jakuju «Ńjuenierdžy» nabyła biełaruskaje sudna, skłała 4,25 miljona hryŭniaŭ (113 tysiač dalaraŭ u ekvivalencie pavodle kursu na 5 lutaha 2024 hoda).
Pad biełaruskim ściaham «Nadzieja» spačatku ažyćciaŭlała pieravozki kalijnych uhnajeńniaŭ pa Dniapry z Mazyra da Mikałajeva, a paśla madernizacyi (pavieličeńnie bartoŭ, sčepka ź niesamachodnaj baržaj) pačała pieravozić ukrainskaje zbožža. Ale paźniej biełaruskaje sudna pieraviali na Dunaj, dzie jano kursiravała ŭ račnyja party Rumynii i Sierbii.
Karabiel pabudavali ŭ 2002 hodzie ŭ Homieli.
Što viadoma pra novaha ŭłaśnika
TAA «Ńjuenierdžy» pracuje na ŭkrainskim rynku z 2007 hoda. Zhodna sa statutam, asnoŭnym vidam dziejnaści kampanii źjaŭlajecca dapamožnaje absłuhoŭvańnie vodnaha transpartu. Akramia hetaha, TAA ažyćciaŭlaje dapamožnuju dziejnaść u raślinavodstvie, nadaje pasiarednickija pasłuhi ŭ handli sielskahaspadarčaj syravinaj, a taksama zajmajecca vytvorčaściu hatovych karmoŭ dla sielskahaspadarčaj žyvioły.
Kampanija maje ŭniviersalny pieravałačny kompleks u horadzie Izmaił. Jaje terminał znachodzicca ŭ akvatoryi Izmailskaha marskoha handlovaha portu na race Dunaj. Port znachodzicca pad pastajannymi abstrełami rasijskich vojskaŭ.
Zasnavalnica i kančatkovaja bienieficyjarka TAA «Ńjuenierdžy» — adeskaja pradprymalnica Natalla Šaranhova.
Kamientary