Rasijskija i biełaruskija śpiecsłužby arhanizujuć ataki na biełarusaŭ u Litvie — Dziaržbiaśpieka Litvy
Litoŭskija śpiecsłužby paćvierdzili, što šmatlikija pravakatyŭnyja vypady ŭ bok biełarusaŭ i litoŭcaŭ robiacca śpiecyjalna dla taho, kab vyklikać niehatyŭnaje staŭleńnie da biełarusaŭ, jakija žyvuć u Litvie. Rasijskija i biełaruskija vyviedvalnyja słužby płanavali hvałtoŭnyja ataki suprać biełarusaŭ, jakija pražyvajuć u Litvie, paviedamlaje Departamient dziaržaŭnaj biaśpieki (DDB).
Litoŭskaja vyviedka zafiksavała sproby rasijskich i biełaruskich śpiecsłužbaŭ arhanizavać hvałtoŭnyja akty suprać biełarusaŭ, što žyvuć u Litvie. Meta apieracyi — pasiejać varožaść, strach i stvaryć vobraz Litvy jak ksienafobskaj krainy, paviedamlaje DDB.
Pavodle zajavy departamienta, z 2023 hoda śpiecsłužby Rasii i Biełarusi pravodziać infarmacyjna-psichałahičnuju apieracyju na terytoryi Litvy, skiravanuju na padaŭleńnie biełaruskaj dyjaspary i raspalvańnie mižnacyjanalnaj varožaści.
Apieracyja pačałasia z hroznych listoŭ i fejkavych videa, jakija raspaŭsiudžvalisia nibyta ad imia «lićvinistaŭ». Ź viasny 2024 hoda takaja aktyŭnaść pierajšła ŭ realnaje asiarodździe: na vulicach pačali źjaŭlacca nadpisy z łozunhami «Vilnia naša!» i inšyja pravakacyjnymi nadpisami, paviedamlaje DDB.
Uletku 2024-ha pačalisia akty vandalizmu suprać abjektaŭ, źviazanych ź biełaruskaj dyjasparaj u Vilni: raźbityja vokny kramy, stralanina pa kaplicy ź pnieŭmatyki, paškodžańni Biełaruskaha kulturnaha centra. Na ścienach źjaŭlalisia nadpisy suprać apazicyi, u tym liku na budynku Jeŭrapiejskaha humanitarnaha ŭniviersiteta.
Z 2025 hoda, pavodle DDB, pačalisia sproby znajści vykanaŭcaŭ hvałtoŭnych napadaŭ na biełarusaŭ u Litvie. Padazravanyja arhanizatary — ludzi, što pradstaŭlajucca žycharami krain ES. Jany prapanujuć maładym biełarusam udzieł u fejkavych prajektach, naprykład, u zdymkach videa, dzie ŭ realnaści mierkavałasia ździejśnić napad.
Adnačasova viaducca pošuki vykanaŭcaŭ u telehram-kanałach i hrupach u sacsietkach, asabliva siarod finansava ŭraźlivych asob: biespracoŭnych, studentaŭ, małazabiaśpiečanych. Zadačy varjirujucca ad fatahrafavańnia abjektaŭ da hvałtoŭnych dziejańniaŭ ź fiksacyjaj na kamieru.
DDB papiaredžvaje: dziejnaść rasijskich i biełaruskich śpiecsłužbaŭ u Litvie zastajecca vysokaaktyŭnaj i ahresiŭnaj, a vykonvańnie takich zadańniaŭ ciahnie za saboj kryminalnuju ci administracyjnuju adkaznaść. Pry vyjaŭleńni padobnych vypadkaŭ DDB zaklikajuć nieadkładna źviartacca da ich pa telefonie +370 700 70 007 abo na e-mail: [email protected].
Kamientary