U Paŭnočnaj Karei praciahvajecca rasśledavańnie niaŭdałaha spusku na vadu novaha eśminca, jaki adbyŭsia 21 traŭnia na sudnabudaŭničym zavodzie. Pavodle paviedamleńniaŭ Centralnaha telehrafnaha ahienctva Karei, 24 traŭnia śledčaja hrupa dała spravazdaču Centralnaj vajennaj kamisii ab chodzie praviadzieńnia pravierak — zatrymali troch čałaviek.
Incydent adbyŭsia padčas aficyjnaj cyrymonii, na jakoj prysutničaŭ kiraŭnik KNDR Kim Čen Yn. Karabiel straciŭ raŭnavahu padčas spusku na vadu, u vyniku čaho byŭ paškodžany korpus i dnišča. Kim Čen Yn nazvaŭ heta «złačynstvam, vyklikanym nieaściarožnaściu, biezadkaznaściu i nienavukovym empiryzmam».
Pavodle aficyjnych źviestak, novych paškodžańniaŭ sudna paśla incydentu nie vyjaŭlena, i bryhada ramontu praciahvaje adnaŭlenčyja raboty zhodna z hrafikam.
Pry hetym jurydyčnyja orhany raspačali śledčyja dziejańni, i ŭžo zatrymanyja try słužbovyja asoby sudnabudaŭničaha zavoda: hałoŭny inžynier zavoda Kan Čžon Čchol, kiraŭnik cecha zborki korpusa Chan Hien Chak, namieśnik dyrektara pa administracyi Kim Jon Chak.
Jany padazrajucca ŭ słužbovaj niadbajnaści, jakaja mahła pryvieści da avaryi.
Kamientary