Adzin ź litoŭskich bankaŭ zabaraniŭ usie płaciažy, źviazanyja ź Biełaruśsiu. Što heta značyć na praktycy?

«Z 29 krasavika 2025 hoda bank Swedbank budzie rasceńvać jak niedastupnyja nie tolki pramyja, ale i ŭskosnyja apieracyi na rachunkach klijentaŭ u Swedbank, źviazanych z zabaronienymi krainami, uklučajučy Rasiju i Biełaruś», — skazana ŭ paviedamleńni banka.

Bank patłumačyŭ, što pryniaŭ takoje rašeńnie z-za vajny va Ukrainie, jakaja praciahvajecca, ciapierašniaha hieapalityčnaha stanovišča i ryzyki parušeńnia mižnarodnych sankcyj. 

Partnior advakackaj kantory Averus Jonas Sakałaŭskas skazaŭ, što pramy płaciož — heta pieravod na rachunak u zarehistravanym u Rasii banku abo atrymańnie srodkaŭ z takoha banka. Uskosny płaciož — uskosna tyčycca sankcyjanavanaj asoby, subjekta abo dziaržavy, kali hrošy pieravodziać praz pasiarednikaŭ abo trecija krainy. «Inšymi słovami, kali płaciož skanstrujavany tak, što srodki iduć praź niesankcyjanavanuju treciuju krainu (abo fiktyŭnuju kampaniju), ale kančatkovy atrymalnik — subjekt, jaki znachodzicca pad sankcyjami, takaja ździełka ličycca ŭskosnaj i zabaraniajecca roŭna, jak i pramaja», — skazaŭ Delfi ekśpiert.

Juryst advakackaj kantory Glimstedt Ksienija Vialičkienie skazała, što ŭskosnyja płaciažy — heta raźliki, pry jakich adzin bok ździełki ažyćciaŭlaje płaciažy praz rachunki ŭ finansavych ustanovach, zasnavanych u niesankcyjanavanych krainach, adnak adzin z subjektaŭ ździełki abo sam abjekt źviazany z zabaronienaj dziaržavaj. Naprykład, kampanija, zarehistravanaja ŭ zabaronienaj krainie, pradaje tavary litoŭskaj kampanii, a raźlik prachodzić praz rachunak, zarehistravany ŭ finansavaj ustanovie, jakaja znachodzicca ŭ niesankcyjanavanaj krainie.

«A taksama, kali zasnavanaja ŭ sankcyjanavanaj krainie kampanija, pradaje tavary litoŭskaj kampanii abo fizičnaj asobie praz pasiarednika, zarehistravanaha ŭ treciaj krainie. Tavary prychodziać u Litvu, a raźlik prachodzić z pasiarednikam, u jakoha taksama jość rachunak u treciaj krainie, paźniej jon pieravodzić hrošy hałoŭnamu pastaŭščyku, zarehistravanamu ŭ krainie, jakaja znachodzicca pad sankcyjami», — pryviała prykład juryst.

Jašče adzin varyjant: sankcyjnaje pradpryjemstva ŭ zabaronienaj dziaržavie praz daččynuju kampaniju, zarehistravanuju ŭ treciaj krainie (jakaja nie znachodzicca pad sankcyjami), ažyćciaŭlaje ździełki — pradaje tavary i pasłuhi.

«Prykład: litoŭskaja kampanija abo žychar kuplaje tavar u kampanii ES, adnak hety tavar na samaj spravie vyrableny ŭ Rasii. Niahledziačy na toje, što hrošy pieravodziać jeŭrapiejskaj kampanii (a nie naŭprost u Rasiju), heta moža ličycca ŭskosnaj apieracyjaj, źviazanaj z Rasijaj, — srodki faktyčna sychodziać za rasijski tavar», — skazaŭ Sakałaŭskas.

Jašče adzin vypadak: čałaviek pradaje majomaść u Biełarusi (kvateru abo aŭtamabil) i choča pieravieści atrymanyja hrošy na svoj litoŭski rachunak. «Navat kali jon pryviazie hrošy najaŭnymi i pasprabuje ŭnieści ich na rachunak u Litvie, hetaja apieracyja budzie ličycca ŭskosnaj apieracyjaj z sankcyjanavanaj krainaj (pakolki hrošy ź Biełarusi) (…) Bank acenić hetuju ździełku jak ryzykoŭnuju», — rastłumačyŭ Sakałaŭskas.

Vialičkienie kaža, što heta abmiežavańnie aktualna i dla biznesu, i dla žycharoŭ. Pavodle jaje słoŭ, za takija ździełki mohuć być nastupstvy — jak finansavyja sankcyi, tak i pazbaŭleńnie voli da 5 hadoŭ. «Heta abmiežavańnie zakranie i žycharoŭ — asabliva tych, u kaho jość svajaki, čalcy siamji abo siabry ŭ sankcyjanavanych krainach, ź jakimi jany raniej «abmieńvalisia» hrašyma praz pasiarednikaŭ abo inšyja finansavyja ŭstanovy», — skazała Vialičkienie.

• 1
• 0
• 0
• 0
• 0
• 0
• 0
• 0