«Heta jak VIČ u ludziej». Biełaruska vyratavała biazdomnaha kata i sprabuje vylečyć jaho ŭ Polščy ad ciažkaj chvaroby

Try hady tamu Iryna žyła z chłopcam na ŭskrainie Łodzi — u rajonie, dzie šmatpaviarchoviki susiedničajuć z pryvatnymi damami. Adnojčy, u dvaccacihradusny maroz, maładyja ludzi pačuli na vulicy płač. Spačatku jany nie zrazumieli, chto heta, i stali raspytvać susiedziaŭ. Akazałasia, heta byŭ kot.

— Spačatku nam skazali, što hety kot — chatni, što ŭ jaho jość haspadary i jon tut žyvie. A na vulicu [tolki] vychodzić, — kaža Iryna. — My pačali jaho padsiłkoŭvać i [z časam] daviedalisia, što haspadar napraŭdu jość, ale jon trapiŭ u balnicu. A tyja, chto jamu dapamahaŭ, zabrali dvuch sabak, a kata kinuli.

«Kot u nas budzie, tolki kali my budziem žyć u zamku»

Iryna praciahvała karmić kata. Ale ŭ adzin momant «serca nie vytrymała», i jana prapanavała chłopcu vyłavić žyviołu i advieźci ŭ prytułak. Biełaruska adznačaje, što ŭ Polščy biazdomnych žyvioł nie ŭsyplajuć, u adroźnieńnie ad Biełarusi, tamu hety varyjant zdavaŭsia joj najlepšym dla vyratavańnia kata.

— Ja nie mieła nadziei zabrać kocika da siabie, bo moj chłopiec byŭ kateharyčna suprać. Skazaŭ, što kot u nas budzie, tolki kali my budziem žyć u zamku, u jakim budzie asobny pakoj dla kata. My šmat svarylisia na hetaj hlebie, bo ja vielmi chacieła, — pryznajecca Iryna.

U vyniku Iryna ŭsio ž złaviła kata i pryniesła dadomu. Chłopiec pahadziŭsia na časovuju pieratrymku žyvioły — pakul dla jaje nie znojdziecca novy dom. A potym rastaŭ: kot staŭ prajaŭlać da jaho cikavaść i biez strachu išoŭ na ruki.

— Chłopiec skazaŭ, što heta naš kot i jamu nie treba šukać haspadaroŭ, — uspaminaje biełaruska. — My kupili jamu korm, łatok. Tak Kola zastaŭsia ŭ nas.

«Heta jak VIČ u ludziej»

Užo na treci dzień Iryna paviała kata da vieterynara. Na pryjomie lekar nie vyjaviŭ nijakich prablem, ale prapanavaŭ zdać analizy — na śmiarotnyja chvaroby, šalenstva i lejkoz. Vyniki byli admoŭnymi, za vyklučeńniem apošniaha — jon pakazvaŭ utojenuju formu virusa kacinaha lejkozu.

— Virusny lejkoz u katoŭ — heta jak VIČ u ludziej. Heta pahanaja virusnaja chvaroba. Pieradajecca jana [pamiž žyviołami], naprykład, padčas sumiesnaha vylizvańnia albo ŭ pracesie naradžeńnia, — apisvaje zachvorvańnie Iryna. — Vieterynar prapanavaŭ pakałoć interfieron (supraćvirusny imunamadulujučy preparat) dla prafiłaktyki, ale my na heta nie pajšli. Vieterynar skazaŭ, što, moža, imunitet spravicca i biez preparatu, a hetaja terapija — davoli darahaja. Plus my nie chacieli stresavać kata ŭkołami. Tamu vyrašyli adkłaści.

Ja sieła na kaleni ŭ kalidory i rydała»

Try hady, pa słovach Iryny, Kola žyŭ jak narmalny zdarovy kot. Ale hetaj viasnoj jamu stała drenna: uviečary suboty kot byŭ aktyŭnym, a ranicaj nastupnaha dnia — lažaŭ, nie padnimajučysia, admaŭlaŭsia ad ježy i vady. Dziaŭčyna zabiła tryvohu i paviezła žyviołu ŭ dziažurnuju vietkliniku.

Pavialičyć

— Tam zrabili analizy i paćvierdzili, što virus lejkozu jość, a da jaho jašče i lejkacytoz — kolkaść biełych kryvianych kletak fienamienalna vysokaja. Heta pramy pakazčyk, što pačynaje ŭtvaracca rak kryvi, — kaža biełaruska.

— My pryjechali dadomu, ja sieła na kaleni ŭ kalidory i rydała. Kola — častka siamji. Ja maliłasia, kab jon pažyŭ jašče. Było ciažka pryniać, što śmierć nastolki blizka i što mahčyma budzie patrebnaja eŭtanazija, kab jon nie pakutavaŭ.

Na nastupny dzień Iryna źviazałasia ź vieterynaram, jaki naziraŭ Kolu. Jon paćvierdziŭ dyjahnaz i znoŭ prapanavaŭ terapiju supraćvirusnym preparatam. Iryna pahadziłasia, ale vyrašyła pašukać i alternatyŭnyja varyjanty.

— U Facebook-supołcy kocikaŭ ź lejkozam žančyna-polka raskazała pra davoli novy preparat, małaviadomy ŭ Jeŭropie, jaki lečyć ad hetaj chvaroby. Jaho pačali raspracoŭvać 15 hadoŭ tamu ŭ Azii, ale ŭ prodaž jon pastupiŭ tolki ŭ 2025 hodzie. I jość vypadki navat poŭnaha vylačeńnia kata ad lejkozu, — Iryna pierakazvaje infarmacyju i tłumačyć, što ŭ składzie hetaha preparata try białki, jakija źviazvajuć kletki virusa, pieraškadžajuć im raźvivacca, i stymulujuć kaściavy mozh vypracoŭvać bolš zdarovaj kryvi.

«Maralna było vielmi ciažka paprasić dapamohi»

Ale niekatoryja momanty takoj terapii naściarožvajuć. Naprykład, žančyna raspaviała, što zamović preparat možna tolki z aficyjnaha sajta. Svabodnyja hrošy ŭ žančyny skončylisia litaralna za dva dni: pryjom u vieterynara i analizy abyšlisia ŭ 2 tys. złotych (480 jeŭra), a pryznačany doktaram supraćvirusny preparat — jašče ŭ 1 tys. złotych (240 jeŭra). Na pieršuju dozu inavacyjnaha preparata, jaki kaštavaŭ kala 2 tys. złotych (480 jeŭra), nie chapała.

— Ja pradprymalnica i ja zaŭsiody za toje, kab zarabić hrošy, i maralna mnie było vielmi ciažka na heta vyrašycca (paprasić dapamohi). Ale ŭsio ž adkryła zrzutku (zbor srodkaŭ), — kaža Iryna. — Na ździŭleńnie biełarusy adhuknulisia ŭsim śvietam. I adhuknulisia znajomyja palaki. Spačatku suma zboru była 9 tys. złotych, i pałovu my sabrali niedzie za paru dzion — na pieršuju dozu preparata, na abśledavańni i bady.

Z taho momantu suma zboru pavialičyłasia da 16 tys. złotych (3840 jeŭra). Iryna raskazvaje, što terapija akazałasia bolš składanaj i praciahłaj, čym jana čakała.

— Zaraz zbor nie taki pilny, bo stan Koli stabilizavaŭsia. Jamu lepiej, — kaža jana.

Ale ŭ chutkim časie Iryna daviedałasia, što katu spatrebicca pažyćciovaja terapija. Heta jaje šakiravała. Ale jana nie admoviłasia ad idei lačyć kata.

— Pastarajusia ŭpisać heta ŭ svoj biudžet. Naŭrad ci budu rabić zbory dalej, — kaža biełaruska.

Vieterynar: «Lačeńnie źjaŭlajecca ekśpierymientalnym»

Ci varta lačyć kata ad takoj chvaroby i jakija pierśpiektyvy takoha lačeńnia, MOST spytaŭ vieterynara Janu Žuraŭlovu.

— Virus lejkozu kotak — na dadzieny momant, na žal, nievylečnaje zachvorvańnie, jakoje zabiraje žyćci našych ulubioncaŭ. Hety virus naležyć da siamiejstva retravirusaŭ — taho ž siamiejstva, što i VIČ (virus imunadeficytu čałavieka).

Z dastupnych na siońnia mietadaŭ lačeńnia dla kotak — u zaležnaści ad simptomaŭ i ciažkaści zachvorvańnia — vykarystoŭvajecca simptamatyčnaja terapija. Isnujuć taksama ekśpierymientalnyja pratakoły lačeńnia, naprykład z užyvańniem preparata RetroMad1 (mienavita jaho paraili Irynie), ci RetroMad1 u kambinacyi ź interfieronam.

Pavodle najaŭnaj infarmacyi, hetaja terapija dobra pieranosicca katami, surjoznych pabočnych efiektaŭ nie vyjaŭlena. Adnak, na žal, daśledavańni pravodzilisia na nievialikich hrupach, tamu kazać pra vysokuju efiektyŭnaść pakul nie davodzicca.

Pakolki lačeńnie źjaŭlajecca ekśpierymientalnym, praciahłaść kursa moža źmianiacca — jak zhodna z novymi rekamiendacyjami padčas daśledavańniaŭ, tak i z ulikam indyvidualnych asablivaściej i patreb kankretnaha kocika.

Praciahłaść pieršaha kursa — 90 dzion, paśla čaho varta acanić virusnuju nahruzku i ahulny stan kata.

Maja asabistaja dumka — varta pasprabavać chacia b dziela ekśpierymientu, i ja budu vielmi rada, kali kocik budzie adčuvać siabie lepš i heta jakasna padoŭžyć jamu žyćcio.

• 1
• 0
• 0
• 0
• 0
• 6
• 0
• 0