«Pracoŭny łahier z uzmocnienym charčavańniem». Architektar 17 hadoŭ u Kanadzie — i voś kali adčuŭ siabie svaim

Pierajezd i rynak pracy: «Kali čałaviek prafiesijanał, biez pracy ŭ Kanadzie jon nie zastaniecca»

— Ja pracuju ŭ IT z 1993 hoda. Kab navučycca prahramavańniu jašče ŭ škole, pieršy kampjutar mnie daviałosia spajać, bo ŭroki infarmatyki byli nie vielmi infarmatyŭnyja, a dostup da školnych kampjutaraŭ pa-za miežami hetych urokaŭ adsutničaŭ.

U Kanadu pierabraŭsia ŭ 2008 hodzie pa fiederalnaj prahramie prafiesijnaj emihracyi z atrymańniem statusu pastajannaha rezidenta (PMŽ). Dakumienty dla hetaha pačaŭ afarmlać u 2006 hodzie. Zaraz takoj prahramy ŭžo niama, z aktualnymi prahramami lepš za ŭsio aznajomicca na Canada.ca — aficyjnym sajcie fiederalnaha ŭrada Kanady.

Ciažkaści byli. Maja žonka, naprykład, zusim nie vałodała anhlijskaj. Chacia ŭ jaje niadrennaja niamieckaja, heta nijak nie dapamahała. U vyniku joj daviałosia pajści ŭ kaledž i vyvučyć anhlijskuju. Za hod jana daciahnuła da ESL 9, što pryblizna adpaviadaje CEFR C1 abo krychu vyšej.

Asabista ŭ mianie moŭnych ciažkaściej nie było, ja pryjechaŭ sa svabodnaj razmoŭnaj anhlijskaj i bazavaj francuzskaj. Ale francuzskaja nie patrebnaja, kali vy nie źbirajeciesia pracavać na ŭradavych kantraktach abo žyć u pravincyi Kviebiek pa-za miežami Manreala. U samim Manreali (najbujniejšy horad Kviebieka) jana taksama asabliva nie patrebna.

Uzrovień vałodańnia anhlijskaj pavinien być svabodnym dla kamfortnaha žyćcia, akcent nie maje značeńnia. Hałoŭnaje, kab vas razumieli.

Zaraz pracuju ŭ vielmi bujnoj bijafarmaceŭtyčnaj kampanii z «japonskimi karaniami» (jak lubiać kazać na devby). U jaje kanadskim padraździaleńni, na pazicyi Senior Solution Architect Pharma R&D. Nazvu pakul nie chacieŭ by afišavać.

Viłka dla majoj pazicyi ŭ Kanadzie dastatkovaja vialikaja: 120—200 tysiač kanadskich dalaraŭ (86,4 — 144 tysiačy USD) da vypłaty padatkaŭ, kali heta pastajannaja pazicyja. Kali kantrakt, to 80—135 tysiač kanadskich dalaraŭ (58—97 tysiač USD. — Zaŭv.). Z zarpłaty ŭ Kanadzie vypłačvajucca padachodny padatak, adličeńni ŭ piensijny fond, adličeńni na strachoŭku pa biespracoŭi. U cełym heta 35—50% u zaležnaści ad pamieru zarpłaty.

Uvohule Kanada znachodzicca dzieści pasiaredzinie pamiž Jeŭropaj i ZŠA pa suadnosinach uzroŭniu padatkaŭ, uzroŭniu zarobkaŭ i bałansu pamiž žyćciom i pracaj. Ale ŭ cełym bližej da ZŠA. Kali hruba, kanadskija zarpłaty ŭ IT u cełym pracentaŭ na 20 nižejšyja, čym u ZŠA. Heta kali nie brać u raźlik Kaliforniju abo startapy, što zakryvajuć patrebu ŭ pracoŭnych resursach, płaciačy značna vyšej za rynak.

Pačatkoviec biez dośviedu ŭ Kanadzie moža pajści pracavać za kapiejki ŭ pieršyja paru hadoŭ, kab atrymać dośvied. Pazicyi z zarobkam u 40 tysiač kanadskich dalaraŭ u hod dla džuna jašče treba pašukać, bo aŭtsors prapanuje bolš daśviedčanych śpiecyjalistaŭ za hetyja hrošy.

Pa maim ścipłym mierkavańni, kali čałaviek štości ź siabie ŭjaŭlaje ŭ prafiesijnym płanie, to biez pracy ŭ Kanadzie jon dakładna nie zastaniecca. Ale taksama treba razumieć, što kankurencyja na rynku pracy tut značna vyšejšaja.

Da niadaŭniaha času ja b skazaŭ, što ŭ IT važniej paćvierdžany dośvied pracy, čym farmalnaja adukacyja. Ale litaralna para apošnich vypadkaŭ kaža pra advarotnaje. Ludziam daviałosia ŭ terminovym paradku rabić pierakład i evalucyju dypłomaŭ praz WES (Acenku adukacyi na jaje adpaviednaść kanadskim standartam), kab atrymać pracu.

Miedycyna: «Žyvieš u pravincyi bolš za try miesiacy lehalna — atrymlivaješ strachavuju miedycynskuju kartu»

Miedycyna ŭ Kanadzie strachavaja, finansujecca ź biudžetu pravincyi. Praviły ŭ roznych miescach krychu adroźnivajucca, ale ŭ cełym prykładna adnolkavyja. Kali ty žyvieš u pravincyi bolš za try miesiacy lehalna, to atrymlivaješ strachavuju miedycynskuju kartu. Jana pakryvaje miedycynskija patreby akramia dantysta, aftalmołaha.

U pravincyi Antarya (dzie žyvie Artur) ludzi da 25 hadoŭ atrymlivajuć leki pa recepcie biaspłatna.

Strachoŭka ad pracy zvyčajna pakryvaje jašče aftalmołaha i ŭsio, što źviazana z vačyma, akulary/linzy, dantysta u miežach peŭnaj hadavoj sumy. Plus masaž i inšaje pa drobiaziach. Čałaviek na kantrakcie b2b apłačvaje heta sam, ale potym śpisvaje z padatkaŭ jak vydatki.

Vyklik chutkaj dapamohi na dom płatny. Vyklikać doktara na dom nie atrymajecca, ale možna pakinuć apojntmient anłajn. Analizy pakryvajucca pravincyjnaj strachoŭkaj.

U cełym usio pavolniej, čym u Biełarusi. Ale kali vypadak sapraŭdy surjozny, to ŭsio jak u kino: špitali abstalavanyja jak treba.

Ipateka: «Zdajecca, pracentnaja staŭka znoŭ pačała padać»

Kredyt na kuplu žylla nazyvajecca morthrydžam (ipatekaj jaho nazyvajuć u pravincyi Kviebiek).

Minimalny pieršapačatkovy ŭznos na žyllo składaje 10%, maksimalny termin rasterminoŭki z takim uznosam — 25 hadoŭ, a kali zapłacić 20%, to 30 hadoŭ.

Zaraz praviły ŭskładnilisia i čas ad času źmianiajucca. Pryblizna 15 hadoŭ tamu možna było ŭziać nieruchomaść bieź pieršapačatkovaha ŭznosu abo z uznosam u 5% ad pačatkovaha koštu i na termin da 35 hadoŭ. Heta termin amartyzacyi, sam ža dahavor ipateki zvyčajna zaklučajecca na 5 hadoŭ, paśla čaho ŭmovy pierahladajucca.

Zaraz pracent pa kredycie kala 4%, u 2020 hodzie jon byŭ kala 2%. Ale, zdajecca, pracentnaja staŭka znoŭ pačała padać.

Aŭto: «Biez mašyny možna žyć tolki ŭ vialikim horadzie»

Hramadski transpart u pryharadzie dastatkova słaba raźvity — tut patrebna mašyna. Biez mašyny možna žyć tolki ŭ vialikim horadzie.

Usia infrastruktura pa-za centram vialikaha horada aptymizavanaja pad aŭtamabili. Jość bankamaty i apteki, u jakich možna absłuhoŭvacca, nie vychodziačy z mašyny. Heta nazyvajecca drive through.

Kramy časta raźmieščany na vydzielenym učastku ź vialikaj parkovačnaj placoŭkaj — heta nazyvajecca plaza. Ale kram u krokavaj dastupnaści vielmi mała. Tamu kultura šopinhu krychu inšaja. Ludzi całkam mohuć žyć u vioscy, dzie najbližejšyja kramy znachodziacca za 10—15 km ad doma, i zakuplacca raz na tydzień. Vialikaja ladoŭnia i asobnaja marazilnaja kamiera jość u bolšaści.

Jakaść praduktaŭ u roznych cenavych katehoryjach zaŭvažna adroźnivajecca. Ale ŭ cełym ja b nie skazaŭ, što jość niejkaja istotnaja roźnica ź Biełaruśsiu. Navat hłazuravanyja syrki jość. I biełaruskija maroziva i sieladziec, ale pa ich pryjdziecca prakacicca ŭ kramu jeŭrapiejskaj ježy, jakaja za 15 km abo trochi dalej. Ad niekatorych praduktaŭ ź ciaham času advykaješ, naprykład, kansiervy ŭ alei — kali doŭha ich nie jeści, pačynajecca piakotka: šproty, piačonka treski i h. d.

Ekanomija: «Karysny luby navyk pracy rukami, asabliva vykanańnie santechničnych prac, elektryka, plitka i malarnyja raboty»

Paśla pierajezdu pačaŭ bolš karystacca biespracentnaj rasterminoŭkaj, a hrošy inviestavać. Heta, viadoma, kapiejki, ale ź ciaham času moža naźbiracca prystojna.

Sama sistema stymuluje da ekanomii i nazapašvańniaŭ. Časta Kanadu nazyvajuć pracoŭnym łahieram z uzmocnienym charčavańniem, i ŭ hetym jość dola praŭdy.

Nazapašvać i adkładać nieabchodna, bo na dziaržaŭnuju piensiju asabliva nie razhulaješsia. Inviestavać možna kudy zaŭhodna — u akcyi, ETF, nieruchomaść i h. d.

Karysny luby navyk pracy rukami, asabliva vykanańnie santechničnych rabot, elektryki, kładka plitki i malarnyja raboty. Usio heta kaštuje niemałych hrošaj. I časta možna istotna zekanomić, kali rabić heta samastojna, a nie najmać kantraktara.

Naohuł, bazavyja patreby ŭ Biełarusi zakryvajucca značna mienšaj sumaj hrošaj. Ale kali iści dalej za hetyja patreby, vyłaziać niuansy. U Kanadzie zakon prykładna adnolkavy dla ŭsich, nakolki heta mahčyma ŭ našaj realnaści. A z hetaha vynikaje biaśpieka majomaści i nazapašvańniaŭ, jakija nichto nie adbiare.

Chobi i padarožžy: «Mahu padarožničać paŭsiul, ale navošta»

Ja mahu dazvolić sabie padarožničać z kanadskim pašpartam amal u lubym napramku — samaloty z Taronta lotajuć rehularna i ŭsiudy.

Inšaja sprava — navošta. Taronta — dastatkova multykulturny horad, i znajści restaran ź luboju kuchniaj śvietu — dastatkova tryvijalnaja zadača. Heta mocna dematyvuje. Doma dobra: letam pracuje kandycyjanier, zimoj — piečka, pobač aziory, dzie možna kupacca biez škody dla zdaroŭja. Dzikaja pryroda taksama niedaloka, kali chočacca ekstrymu. To-bok mahčymaści jość, ale z žadańniem ciažej, davodzicca siabie prymušać.

Lublu vyjezdy na pryrodu ŭ les. Tut prosta šykoŭnaja rybałka — ale ja da jaje abyjakavy. Vielmi raspaŭsiudžany adpačynak na pryrodzie z namiotam, arendaj katedža abo domu na kołach — jak u kiempinhu ź infrastrukturaj, tak i ŭ dzikaj pryrodzie. Taksama papularnyja pajezdki na kvadracykłach i matacykłach pa pierasiečanaj miascovaści. Kamu cikavyja harnałyžnyja kurorty — tut taksama ŭsio vydatna, i daloka jechać nie treba.

A voś čaho sapraŭdy nie chapaje, dyk heta muziejaŭ. Kab atrymać asałodu ad žyvapisu, treba jechać u Jeŭropu.

U mianie jość jašče davoli niezvyčajnaje chobi — amatarskaje radyjo. Ja chutka zdaŭ na kanadskuju licenziju dla vychadu ŭ efir i znajšoŭ znajomych kaleh pa chobi.

Znosiny i biełarusy ŭ Kanadzie: «Lišni raz pra Biełaruś starajusia nie ŭzhadvać»

Na moj pohlad, adroźnieńni ŭ mientalitecie pamiž biełarusami i kanadcami davoli istotnyja. Ale nie bolšyja, čym pamiž niemcami i kanadcami abo niemcami i brytancami. Jość vialikaja kulturnaja roźnica pamiž Vialikabrytanijaj i Centralnaj / Uschodniaj Jeŭropaj.

Ja žyvu ŭ Kanadzie ŭžo 17 hadoŭ. Pierastaŭ adčuvać siabie zamiežnikam prykładna praz try hady.

Kanadcy adkrytyja, vielmi vietlivyja i pryjaznyja, što nie pieraškadžaje im trymać dystancyju.

Naohuł, čym daŭžej žyvu tut, tym bolš pierakonvajusia: sami kanadcy — adna z hałoŭnych kaštoŭnaściaŭ Kanady. Heta prajaŭlajecca ŭ drobiaziach. Naprykład, ty čakaješ vyjezdu na ažyŭlenuju vulicu, machnieš rukoj — i ciabie prapuściać. Bačyŭ na ŭłasnyja vočy, jak čałaviek pryviazaŭ matrac da dachu mašyny, i jon u jaho źlacieŭ. Palicejskaja mašyna spyniłasia, i ekipaž dapamoh pryviazać macniej. Kali ty hruziš u mašynu niešta ciažkaje, možaš paprasić luboha vypadkovaha mužčynu dapamahčy — i jon dapamoža. I ty sam z časam pačynaješ rabić toje samaje, navat nie zaŭvažajučy hetaha.

Jakija adnosiny z kalehami? U nas kamanda, jakaja hieahrafična raźmieščana ŭ roznych miescach, pracoŭnyja adnosiny dobryja. Ale nie skažu, što my šmat kantaktujem pa-za pracaj. Ułasna, kali ty z čałaviekam niekalki razoŭ na dzień pierasiakaješsia na mitynhach, hetaha całkam dastatkova.

U Kanadzie nie tak šmat biełarusaŭ. Jość fejsbuk-hrupy kštałtu «Biełarusy ŭ Kanadzie» abo «Biełarusy ŭ Manreali», ale jany nie vielmi aktyŭnyja. Mnohich biełarusaŭ, jakija ciapier žyvuć u Kanadzie, ja viedaŭ jašče da emihracyi. Tych, z kim paznajomiŭsia ŭžo tut, možna pieraličyć na palcach adnoj ruki. Ale ŭsie jany vielmi hodnyja ludzi.

Majo afłajn-koła znosin davoli multykulturnaje. I bolš źviazanaja z ahulnymi kaštoŭnaściami, čym z ahulnaj nacyjanalnaściu. Ź biełarusami bolš kantaktuju praz sacsietki, bo šmat siabroŭ, kaleh i znajomych biełarusaŭ ciapier žyvuć u roznych krainach.

U Kanadzie davoli mocnaja ŭkrainskaja dyjaspara i vysokaja maralnaja padtrymka ŭkrainskaha naroda. Tamu lišni raz pra Biełaruś starajusia nie zhadvać, choć ź niejkim niehatyvam i nie sutykaŭsia. Raniej pra Biełaruś mała chto viedaŭ, ciapier jaje zhadvajuć u kantekście vajny Ukrainy i RF.

Stereatypy

Ja viedaju dva stereatypy pra kanadcaŭ:

1. U Kanadzie lubiać chakiej. Heta praŭda.

U kožnaj vioscy jość kryty katok, i čas na im raśpisany pa hadzinach. U našym horadzie pierad haradskim municypalitetam jość vialiki, ale nie hłyboki fantan pamieram amal jak chakiejnaja placoŭka. Uletku ŭ śpioku tam hulajuć małyja dzieci, uzimku jaho pieratvarajuć u katok, i tam katajecca šmat ludziej. Śpiecyjalnaja mašyna (jaje nazyvajuć «Zamboni» — jak «Ksieraks», pa imieni vytvorcy) čyścić lod kožnuju hadzinu. Zaprasić dziaŭčynu na katok, jak u filmie «Pakroŭskija varoty» ŭ 50-ch hadach — heta całkam prystojna.

Niekalki hadoŭ tamu byŭ viasioły vypadak. Na matčy NHL pamiž Toronto Maple Leafs i amierykanskaj kamandaj Carolina Hurricanes u Taronta bramnik «Karaliny» atrymaŭ traŭmu, a zapasny ŭžo byŭ traŭmiravany. Trenier amierykancaŭ nie razhubiŭsia i całkam łahična vyrašyŭ: usie kanadcy bolš-mienš umiejuć hulać u chakiej. I pastaviŭ na bramu kiroŭcu «Zamboni»: usio adno jon čyścić lod padčas pierapynkaŭ, a kali idzie hulnia, ničoha nie robić. U vyniku Hurricanes abyhrali tarontaŭcaŭ ź likam 6:3, dakazaŭšy, što zvyčajny kanadziec, u pryncypie, moža zhulać za kamandu NHL, kali ŭžo vielmi treba.

2. Kanadcy mała ŭvahi nadajuć adzieńniu. Heta praŭda, ale nie zusim.

I heta tyčycca ŭ asnoŭnym anhłamoŭnaj častki Kanady. U Kviebieku da adzieńnia staviacca značna surjoźniej. Byŭ vypadak: na turniry ŭ Atavie nam zamovili vielmi darahi hatel z vyhladam na parłamient u samym centry horada. My i inšyja baćki ź dziećmi jechali ŭ lifcie razam z frankamoŭnaj paraj. Na ichnim fonie my vyhladali jak delehacyja addalenaha kałhasa ź filma «Śvinarka i pastuch», jakaja pryjechała ŭ Maskvu.

«Zahadzia «pyłasoście» rynak vakansij»

Vy kažacie, što «svaim» siabie adčuli ŭ Kanadzie praz try hady. A jak Kanada daje zrazumieć, što ty pakul jašče «nie svoj»?

Heta najpierš pobytavyja pytańni: dzie što kupić, ci biaśpiečna pić vadu z-pad krana, zachvareła dzicia — kudy biehčy, jakija jość varyjanty ź dziciačymi sadami / škołaj / vyšejšaj adukacyjaj, kolki što kaštuje, ci jość pralnyja i sušylnyja mašyny, što bolš-mienš aščadna staviacca da adzieńnia. U płanie bytavoj techniki mnie vielmi dapamoh forum niamieckich ekspataŭ u ZŠA. Pryvykańnie da miascovaj miedycynskaj sistemy i nabyćcio nieruchomaści zaviaršyli hety praces u vyniku.

Atrymańnie hramadzianstva ŭ Kanadzie — heta rucina? Ci jość niuansy?

Heta davoli prosty praces u paraŭnańni z atrymańniem stałaha miesca žycharstva. Važna razumieć, što vynikam atrymańnia hramadzianstva źjaŭlajecca samo hramadzianstva i siertyfikat naturalizacyi. Pašpart pry hetym nie vydajuć, i jon naohuł nie patrebny, kali nie pierasiakaješ miažu. Treba pražyć 3 hady z apošnich čatyroch (čas, praviedzieny za miažoj, nie ŭličvajecca). Kali ty padaŭ niedakładnuju infarmacyju, hramadzianstva mohuć pazbavić navat praz šmat hadoŭ, dla hetaha niama terminu daŭniny.

Majoj siamji jaho dali davoli chutka, u jakaści dokazu padarožžaŭ ja zrabiŭ kopiju ŭsich staronak našych pašpartoŭ — i ŭsio prajšło chutka, zaniało prykładna paŭhoda, nie bolš. Ale ja viedaju čałavieka, jaki zhubiŭ biełaruski pašpart sa svaimi štampami, i jaho muryžyli hady dva, a to i bolej.

Ci byŭ rost biełaruskaj emihracyi ŭ Kanadu ŭ 2020—2022 hadach? Ci paŭpłyvali padziei tych hadoŭ na aktyŭnaść dyjaspary?

Nie, i voś čamu. Kanada nikoli nie davała biełarusam nijakich pasłableńniaŭ dla atrymańnia pracoŭnaj vizy abo vidu na žycharstva. Typovy emihrant ź Biełarusi — heta, chutčej za ŭsio, ajcišnik abo inžynier ź viedańniem anhlijskaj movy.

Paśla taho, jak zakryli prahramu prafiesijnaj emihracyi, samym papularnym mietadam zastałasia emihracyja praz vyšejšuju adukacyju, ale płacić $15k+ kanadskich za hod navučańnia dla biełarusaŭ usio jašče davoli doraha. Voś ukraincaŭ pa CUAET pryjechała vielmi šmat, heta vielmi zaŭvažna.

Mahčyma, ja pamylajusia, ale dyjaspara nie vielmi zaŭvažnaja pa-za miežami anłajn-supolnaściej, bo, na moj pohlad, biełarusaŭ niašmat, jany nie žyvuć kampaktna i davoli dobra intehravanyja ŭ miascovaje hramadstva.

Jość mierkavańnie, što paśla 2020 hoda biełarusy nie tak intensiŭna «rastvarajucca» ŭ novych krainach, trymajucca bolš zhurtavana.

Ja b nie nazvaŭ heta «rastvareńniem», ja b nazvaŭ heta «nie vysoŭvacca». My niejak razmaŭlali z adnoj znajomaj polkaj pra emihrantaŭ, i jana ad dušy prajšłasia pa ruskich i ŭkraincach, asabliva ŭ Varšavie. Ja pytajusia: ok, a što ź biełarusami, možaš ich taksama krychu pakrytykavać? Jana adkazała, što biełarusa ciažka identyfikavać siarod inšych ruskamoŭnych, a siarod tych, kaho jana identyfikavała jak biełarusaŭ, niama nikoha, chto b dastaŭlaŭ niejkija prablemy.

Uvohule, stali jany bolš rastvaracca ci mienš — mnie ciažka sudzić z-za dosyć nizkaj kancentracyi biełarusaŭ u Kanadzie. Ryzyknu vykazać zdahadku, što kaeficyjent rastvareńnia biełarusaŭ u Kanadzie paśla 2020—2022 hadoŭ asabliva nie źmianiŭsia.

Jak u Kanadzie staviacca da zajaŭ Trampa? Ci adčuvajucca niejkija realnyja efiekty ad jahonych słovaŭ/ekanamičnaj palityki?

Tut vielmi zaŭvažnaja kulturnaja karelacyja ź biełarusami. Siaredni kanadziec padumaŭ: «kałdyr niejki» i staŭ radziej jeździć u ZŠA i mienš kuplać amierykanskija tavary. Pa internecie chodziać fota palic z hniłoj amierykanskaj kłubnicaj, jakuju nichto nie kuplaje, i inšaje. U płanie pasiŭnaj ahresii kanadcy i biełarusy vielmi padobnyja, jak i paterny pavodzin, kali žyvieš pobač ź nie zaŭsiody adekvatnym, ale bolš mocnym susiedam.

Nakont nastupstvaŭ — tak, ekanomiki krain doŭhi čas byli ciesna intehravanyja, i ciapier Kanada šukaje novyja rynki. Premjer niadaŭna kazaŭ, što «my pojdziem tudy, dzie nas nie viedajuć, ale čakajuć, budziem pradavać pa čajnaj łyžcy klonavaha siropu, pa traktary» i h. d. Karaciej, vobraznyja paraŭnańni. Adzinaje vyklučeńnie — da samaha kanca krasavickich vybaraŭ nie viedali, chto ž u ich pieramoža.

Čaho nie chapaje ź biełaruskaj realnaści?

Afłajn-kamunikacyi z tymi, chto zastaŭsia.

Kali b vy prymali rašeńnie zaraz, pierajechali b u Kanadu znoŭ?

Tak, ale pastaraŭsia b zrabić heta krychu raniej.

Što paraicie tym, chto tolki płanuje pierajezd u Kanadu?

• Pierakanacca, što vy svabodna vałodajecie anhlijskaj movaj.
• Nazapasić finansavuju «padušku».
• Pierakanacca, što ŭ vas jość paćvierdžany i relevantny dośvied pa śpiecyjalnaści ŭ viadomych u Kanadzie kampanijach.
• Vielmi ŭvažliva filtravać infarmacyju, bo mierkavańni pra Kanadu vielmi roznyja. Jak kažuć, one man's trash is another man's treasure — prymiarajcie ŭsio na siabie i hladzicie z ułasnaj viežy.
• Kali ŭ vas jość siamja — prysłuchajciesia da mierkavańnia žonki i padletkaŭ. Kali jany nie zhodnyja, vy zamiest padtrymki atrymajecie kłubok prablem.
• Zahadzia «pyłasoście» rynak vakansij i šukajcie pracu. Atrymać miascovy numar ciapier lohka — zrabicie heta.

• 16
• 0
• 1
• 1
• 1
• 0
• 0
• 0