Sacyjalnyja sietki robiacca hałoŭnaj krynicaj navin, i heta vyhadna palitykam-papulistam

Daśledčyki adznačajuć, što novy farmat navin, źviazany z kankretnymi asobami (błohierami, influensierami, padkastarami), raźvivajecca chutčej za ŭsio mienavita ŭ ZŠA. Prykład — Džo Rohan, viadomy padkastar, čyje kamientary i naviny na minułym tydni bačyła kala 22% nasielnictva krainy.

U krainach Łacinskaj Amieryki, Afryki i Azii takaja tendencyja isnavała daŭniej, ale ciapier i ZŠA dahaniajuć hetyja rehijony, adnačasova ŭsio macniej addalajučysia ad Jeŭropy, dzie ludzi čaściej karystajucca tradycyjnymi ŚMI.

Aŭtar daśledavańnia Nik Ńjuman padkreśliŭ, što palityki ŭsio čaściej vybirajuć razmovy z błohierami zamiest intervju tradycyjnym žurnalistam, bo heta dazvalaje kantralavać chod hutarki i paźbiahać vostrych pytańniaŭ.

Taki farmat daje palitykam mahčymaść raspaŭsiudžvać vyhadnuju dla siabie infarmacyju praz «družalubnyja» kanały — influensieraŭ, padkastaraŭ i błohieraŭ. Tradycyjnyja ŚMI ž, jak praviła, patrabujuć bolš adkazaŭ i krytyčnaha analizu, čaho papulisty chočuć paźbiehnuć.

Heta pryvodzić da pavieličeńnia ryzyki dezynfarmacyi, bo takija «družalubnyja» krynicy čaściej za ŭsio nie praviarajuć infarmacyju i nie zadajuć składanych pytańniaŭ.

Niahledziačy na papularnaść błohieraŭ i influensieraŭ, 47% apytanych va ŭsim śviecie ličać ich asnoŭnymi raspaŭsiudžvalnikami chłuśni i skažonaj infarmacyi — naroŭni z palitykami. Heta śviedčyć pra toje, što davier da novych farmataŭ padaje, choć jany zastajucca ŭpłyvovymi.

Paśla taho, jak u 2022 hodzie Iłan Mask kupiŭ Twitter (ciapier X), heta płatforma stała papularnaj siarod ludziej z pravymi pohladami. U ZŠA kolkaść takich karystalnikaŭ patroiłasia, u Vialikabrytanii — padvoiłasia. A bolš prahresiŭnyja karystalniki albo pakinuli X, albo stali karystacca im radziej.

Inšyja płatformy, jak Threads, Mastodon ci Bluesky, pakul nie zdoleli značna pašyryć upłyŭ — ich vykarystoŭvajuć dla navinaŭ mienš za 2% ludziej.

TikTok staŭ samaj chutka rastučaj sacyjalnaj sietkaj dla atrymańnia navinaŭ — jaho hladziać 17% apytanych pa ŭsim śviecie, što na 4% bolš, čym letaś.

Taksama ŭsio bolš ludziej, asabliva moładzi da 25 hadoŭ, karystajucca štučnym intelektam (jak čat-botami), kab šukać naviny. Dla hetaj uzrostavaj hrupy ŠI užo ŭdvaja papularniejšy, čym siarod starejšych.

Ale bolšaść apytanych ličyć, što ŠI robić naviny mienš dakładnymi i prazrystymi, bo składana zrazumieć, jak farmirujecca vynik.

Niahledziačy na rost sacsietak, ludzi va ŭsich uzrostavych hrupach pa-raniejšamu pryznajuć nadziejnaść tradycyjnych ŚMI, jakija majuć doŭhaterminovuju reputacyju i pravieranyja mietady padačy infarmacyi. Ale źviartajucca da ich radziej, bo naviny ciapier «prychodziać» praz sacsietki, dzie mienš barjeraŭ i bolš piersanalizacyi.

Daśledavańnie pravodziłasia ŭ 48 krainach, udzieł u im uziali 100 tysiač čałaviek. Jano źjaŭlajecca častkaj štohadovaha hłabalnaha manitorynhu, jaki pravodzicca ŭžo 14-y hod.

• 1
• 0
• 0
• 1
• 2
• 0
• 0
• 0